မြန်မာနိုင်ငံတွင် နိုင်ငံခြားသားများ တရားမဝင် ဝင်ရောက်လာပြီး အွန်လိုင်းလိမ်လည်မှု နှင့် အွန်လိုင်းလောင်းကစား တွင် ပါဝင်ပတ်သက်နေသောကြောင့် သျှမ်းပြည်လေကြောင်း ခရီးစဥ်တွင် နိုင်ငံခြားသားများကို သွားခွင့်မပြုဘဲ စိစစ်ဟန့်တားသွားမည်ဟု စစ်ကောင်စီ၏ ထုတ်ပြန်ကြေညာချက်အရ သိရသည်။

နိုင်ငံခြားသားများသည် အွန်လိုင်းလိမ်လည်မှု (Online Scam) နှင့် အွန်လိုင်းဂိမ်းလောင်းကစား (Online Gambling) တွင် ပါဝင်ကျူးလွန်နေကြသဖြင့် ပုံရိပ်မထိခိုက်စေရေး ကာကွယ်နိုင်ရန် တရားဥပဒေ စိုးမိုးရေးလုပ်ငန်းများကို စစ်ဆင်ရေး ကာလသတ်မှတ်ပြီး မေ ၆ ရက်မှစတင်ကာ သျှမ်းပြည်သို့ သွားမည့် နိုင်ငံခြားသားများကို လိုက်ပါခွင့်မပြုရန် စစ်ကောင်စီ ကွပ်ကဲမှု အဖွဲ့ ခွဲမှူး ဒုတိယ ရဲမှူးကြီး ဇော်မင်းသန့် လက်မှတ်ဖြင့် ထုတ်ပြန်ထားသည်။

“နိုင်ငံခြားသားတွေကို လက်မှတ်မရောင်းဖို့၊ ကြိုတင် ဝယ်ယူထားတဲ့ နိုင်ငံခြားသားတွေကိုလည်း လက်မှတ် ပြန်ပယ်ဖျက်ဖို့ စာလာတယ်။ ကျနော်တို့ အခု နိုင်ငံခြားသားတွေကို လေယာဥ်လက်မှတ် မရောင်းပေးတော့ဘူး” လို့ လေယာဥ်လက်မှတ်ရောင်းသည့် အမျိုးသား တစ်ဦးက သျှမ်းသံတော်ဆင့်ကိုပြောသည်။

စစ်အာဏာသိမ်းပြီးနောက်ပိုင်း သျှမ်းပြည် လောက်ကိုင်မြို့၊ တာချီလိတ်မြို့များတွင် အွန်လိုင်း လိမ်ညာမှု၊ အွန်လိုင်း လောင်းကစားများကို ကျယ်ကျယ်ပြန့်ပြန့်လုပ်ဆောင်လာပြီး၊ ထိုထဲတွင် တရုတ်နိုင်ငံသား နှင့် ထိုင်းနိုင်ငံသား အများစု ပါဝင်ကြောင်း ထိုနယ်မြေတွင် နေထိုင်သည့် ဒေသခံများက ပြောဆိုသည်။

“များသောအားဖြင့်တော့ တရုတ်နဲ့ ထိုင်းတွေက ပိုများတယ်။ လေကြောင်းလိုင်း မသွားရရင်လည်း သူတို့ကတော့ တနည်းမဟုတ် တနည်းသွားကြမှာပဲ။ တရုတ်တချို့ဆိုရင် မှတ်ပုံတင် ဝယ်ထားတာရှိတယ်လေ” ဟု လားရှိုးဒေသခံ အမျိုးသားတစ်ဦးက ဆိုသည်။

လေကြောင်းခရီးစဉ် အတွင်း နိုင်ငံခြားသားများပါခွင့် ပိတ်ပင်ထားသော်လည်း UN ဝန်ထမ်းများ၊ သံရုံးဝန်ထမ်းများ နှင့် INGO ဝန်ထမ်းများ မပါရှိကြောင်း၊ ထိုဝန်ထမ်းများဖြစ်ပါက အမည်စာရင်းကို လေကြောင်းလိုင်းသို့ ၂ ရက် ကြိုတင်ပေးပို့ရန်လည်း ထုတ်ပြန်ချက်တွင် ဖော်ပြထားသည်။

မြန်မာ – ထိုင်း – တရုတ် သုံးနိုင်ငံ ပူးပေါင်းပြီး စစ်ဆင်ရေးကာလ တစ်ခု သတ်မှတ် ဆောင်ရွက်လျက် ရှိသောကြောင့် ထိုကာလအတွင်း မေ ၆ ရက်မှစ၍ သျှမ်းပြည် တဝှမ်းရှိ လေဆိပ်သို့ လေယာဉ်ဖြင့် လိုက်ပါမည့် နိုင်ငံခြားသားများအား စိစစ် ဟန့်တားသွားရန် ညွှန်ကြားထားသည်။

ပြီးခဲ့သည့် မေလ ၂ ရက်က တရုတ်နိုင်ငံတော် ကောင်စစ်ဝန် နှင့် တရုတ်နိုင်ငံခြားရေးဝန်ကြီး မစ္စတာကျင်းဂန် နှင့် ဗိုလ်ချုပ်မှုးကြီး (ငြိမ်း) သန်းရွှေ တို့ နေပြည်တော်တွင် တွေ့ဆုံဆွေးနွေးခဲ့ပြီးနောက် ယခုကဲ့သို့ စစ်ကောင်စီမှ ညွှန်ကြားစာ ထုတ်ပြန်ခြင်းဖြစ်သည်။