သျှမ်းပြည် လွိုင်လင်ခရိုင် လဲချားမြို့နယ်အတွင်း တစ်လနီးပါးကြာလာသည့် သျှမ်းတပ် နှစ်တပ်ကြား တိုက်ပွဲကြောင့် ထောင်နှင့်ချီသော စစ်ဘေးရှောင်များက နေရပ်မပြန် နိုင်သေးကြောင်း စုံစမ်းသိရသည်။

ပြီးခဲ့သည့် ဧပြီလ ၁၁ ရက်မှ စတင်ကာ ယနေ့ မေလ ၄ ရက်နေ့အထိ ရှမ်းပြည်တိုးတက်ရေးပါတီ (SSPP/ SSA) နှင့် သျှမ်းပြည်ပြန်လည်ထူထောင်ရေး ကောင်စီ (RCSS/SSA) တို့ သည် လဲချားမြို့ အရှေ့ဘက်တွင် တစ်လ နီးပါး တိုက်ပွဲ ဖြစ်ပွားနေသည့်အတွက် စစ်ရှောင်နေရသည့် ဒေသခံများသည် နေရပ်မပြန်နိုင်သေးသည့် အပြင် စားနပ်ရိက္ခာများအတွက်လည်း ခက်ခဲနေကြကြောင်း သိရသည်။

“အခုမှာ စစ်ဘေးရှောင်တွေက ဘုန်းကြီးကျောင်းတွေမှာ မှီခိုနေကြရတယ်၊ လက်ရှိ အနေအထားအရ အလိုအပ် ဆုံးကတော့ ဟင်းသီးဟင်းရွက်တွေ၊ စားနပ်ရိက္ခာတွေပေါ့၊ အခု ကူညီထောက်ပံ့ပေးနေတဲ့ အလှူရှင်တွေကလည်း ဒေသအတွင်းက လဲချားမြို့ခံတွေပဲ ဖြစ်နေကြတယ်၊ ရပ်ဝေးက ထောက်ပံ့ပေးတဲ့ အလှူရှင်တော့ မရှိသေးဘူး” ဟု လဲချားမြို့ စစ်ဘေးရှောင်ကို ကူညီပေးနေသူ တစ်ဦးက သျှမ်းသံတော်ဆင့်ကို ပြောသည်။

အဆိုပါ စစ်ဘေးရှောင်များသည် ဟဲဆိုင်ကျေးရွာအုပ်စု (ဢိူင်ႇဝၢၼ်ႈႁၢႆးသႅင်)၊ ဝမ်ထီကျေးရွာ အုပ်စု ၊ ပန်ဆန်းကျေးရွာအုပ်စု ၊ ဝမ်ဆန်းကျေးရွာ အုပ်စု၊ ဝမ်ကျယ် ကျေးရွာ အုပ်စု၊ နားပွဲ ကျေးရွာ အုပ်စု နှင့် နောင်ကော်ကျေးရွာ အုပ်စုတို့က စစ်ဘေးရှောင်များ ဖြစ်ကြောင်းသိရသည်။

လက်ရှိတွင် လဲချားမြို့ပေါ်ရှိ ဆွေမျိုးအိမ်များနှင့် ဟော်ခမ်းကျောင်းတိုက်၊ ကျောင်းခမ်းကျောင်းတိုက်၊ ဝါဆိုကျောင်းတိုက် နှင့် စလိုင်းခုမ် ကျောင်းတို့တွင် စစ်ရှောင်ခိုလှုံနေကြကြောင်းလည်း စစ်ရှောင်ကူညီသူက ဆက်ပြောသည်။

“ပစ်ခတ်သံတွေတော့ နေ့စဥ်နီးပါး ထွက်ပေါ်လာနေတယ်၊ တချို့က ဝမ်စိမ်းဘက်ကို စစ်ရှောင်ထွက်ပြေး သွားတာလည်း ရှိတယ်၊ စစ်ဘေးရှောင်တွေက တစ်နေရာတည်းမှာ စုနေနေတာမျိုး မဟုတ်တော့ လူဦးရေ စုစုပေါင်းကို မသိရသေးဘူး၊ ခန့်မှန်းရသလောက်ဆိုရင်တော့ ၁၀၀၀ ကျော်တယ်” ဟု စစ်ရှောင်ကူညီသူက ပြောသည်။

လက်ရှိအချိန်သည် လုပ်ငန်းခွင်ဝင်ရမယ့် စိုက်ပျိုးရာသီ ဖြစ်သဖြင့် စစ်ရှောင်များကလည်း နေရပ်ပြန်နိုင်ရေး အတွက် မျှော်လင့်နေကြကြောင်းလည်း သိရသည်။

“ဒီလိုချိန်မှ စပြီး မလုပ်နိုင်ရင် စိုက်ပျိုးရေးတွေက နောက်ကျတော့မယ်၊ ဒီနှစ်မလုပ်ရရင် နောက်နှစ်မှာ ဘာစား ရမလဲ၊ ဒီလို ပစ်ခတ်မှုတွေ ဖြစ်တာက ဒေသခံတွေ အတွက် တော်တော်ကို ထိခိုက်တယ်” ဟု လဲချားမြို့နေ အမျိုးသမီးတစ်ဦးကလည်း သျှမ်းသံတော်ဆင့်ကိုပြောသည်။

ယင်းကဲ့သို့ ထိတွေ့တိုက်ပွဲ ဖြစ်ပွားမှုကြောင့် လဲချားမြို့နေ ဒေသခံ လူငယ်လူရွယ်များ နိုင်ငံရပ်ခြား၊ ထိုင်းနိုင်ငံဘက် ထွက်ပြေးသူများလည်း အများအပြား ရှိလာကြောင်း စုံစမ်းသိရသည်။

ထို့အပြင် အဆိုပါ ဒေသအတွင်းတိုက်ပွဲကြောင့် နွေရာသီကာလ သျှမ်းစာသင် စာသင်ကျောင်း ၁၃ ကျောင်းထက်မနည်း ပိတ်ရပြီး ကျောင်းသား လူငယ်များလည်း ၃၆၀ ထက်မနည်း စာသင်ခွင့် ကင်းလွတ်နေကြကြောင်း သိရသည်။