သျှမ်းပြည် ကျောက်မဲခရိုင် နောင်ချိုမြို့နယ် အတွင်း တိုက်ပွဲများ ငြိမ်သက်သွားသော်လည်း မြေမြှုပ်မိုင်း အန္တရာယ် နှင့် တိုက်ပွဲအတွင်း ကျန်နေသေးသည့် လက်နက် အန္တရာယ်များကြောင့် စစ်ရှောင်များက နေရပ်မပြန်နိုင်သေးကြောင်း သိရသည်။

မိုင်းအန္တရာယ်များ ရှိနေမှုကြောင့် စစ်ဘေးရှောင်များ နေရပ်မပြန်နိုင်သည့်အပြင် ကျေးရွာအတွင်းရှိ ဒေသခံများကလည်း လယ်ယာ မသွားရဲသည့်အတွက် စားသောက်ရေး၊ နေထိုင်ရေး နှင့် ငွေရေးကြေးရေးများလည်း ခက်ခဲလာကြောင်း နောင်ချို ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

“ခေးနင်းကျေးရွာ အုပ်စု (ဒိုးပင်ရွာ) မှာတော့ စစ်ရှောင်တွေ အကုန်ပြန်ရောက်ပြီ၊ ဒါပေမဲ့ ရွာနား တစ်လျှောက်မှာ မိုင်းတွေ ဆင်ထားတဲ့ လက္ခဏာတွေ တွေ့ရတော့ အပြင်မထွက်ရဲကြဘူး၊ တောင်ယာ အလုပ်ခွင်ကိုလည်း မသွားရဲဘူး၊ ဘယ်တပ်ဖွဲ့က မိုင်းတွေမှန်းလည်း မသိကြဘူး” ဟု အမည်မဖော်လိုသူ ဒေသခံ အမျိုးသားက သျှမ်းသံတော်ဆင့်ကို ပြောသည်။

တိုက်ပွဲသံ ငြိမ်သက်သွားသည့် ၁၀ ရက်တာ ကာလအတွင်းတွင် ဒေသခံများ၏ ကျွဲများသည် မြေမြှုပ်မှိုင်းများကို နင်းမိ ပေါက်ကွဲမှုကြောင့် ၆ ကောင်ထက်မနည်း သေဆုံးမှုရှိနေကြောင်းလည်း သိရသည်။

ဧပြီလ နောက်ဆုံးပတ်တွင် ခေးနင်းရွာ (ဒိုးပင်ရွာ) ဒေသခံ အမျိုးသား နှစ်ဦး တောင်ယာမှ အပြန် လမ်းဘေး၌ ဟင်းရွက်ခူးနေစဥ် မိုင်းပေါက်ကွဲမှု ကြုံတွေ့ရပြီး ဆေးရုံသို့ ပို့ဆောင် ကုသထားရကြောင်း ၎င်းအမျိုးသား က ဆက်ပြောသည်။

“တိုက်ပွဲက ပြီးသွားပေမဲ့ ပေါက်ကွဲသံတွေတော့ နေ့တိုင်းနီးပါး ကြားနေရတယ်၊ တခါလေ ကျွဲ၊ နွားတွေကို ထိ တယ်၊ တခါလေလည်း လူထိတယ်ပေါ့။ နေ့တိုင်းဖြစ်နေတယ်၊ အဲ့ဒါကြောင့် ကျနော်တို့လည်း ဘယ်နေရာမှ မသွားရဲ၊ မလုပ်ရဲ နဲ့ နေထိုင်စားသောက်ရေးတွေက တစ်နေ့ထက် တစ်နေ့ ပိုပို ခက်ခဲလာတယ်” ဟု အထက်ပါ အမျိုးသား ဆိုသည်။

တိုက်ပွဲ ဖြစ်ပွားမှု အပြီးတွင် အာဏာသိမ်း စစ်ကောင်စီ တပ်ဖွဲ့သည် ကျေးရွာအတွင်းသို့ ရောက်လာပြီး ရွာနား အနီးတစ်ဝိုက်တွင် မိုင်းထောင်ထားမှု ရှိနေသည်ဟု ပြောဆိုခဲ့ကြောင်းလည်း ဒေသအတွင်း အသက် (၅၀) ကျော် အမျိုးသား တစ်ဦးက သျှမ်းသံတော်ဆင့်ကို ပြောသည်။

“စစ်သားတွေက ရွာနားမှာ မိုင်းထောင်ထားမှု ရှိတယ်ဆိုတာကို လာပြီးပြောသွားတယ်၊ ဝန်ခံသွားတယ်၊ ရွာသား တွေက သူတို့ကို ဖြုတ်ပေးခိုင်းတော့ မဖြုတ်အားသေးဘူးတဲ့၊ အားတဲ့ အချိန်မှ လာဖြုတ်ပေးမယ်လို့ ပြောသွားတယ်၊ အခုချိန်က လုပ်ငန်းခွင် ဝင်ရတော့မယ့် အချိန်လည်း ဖြစ်နေတယ်၊ အခုလို ဖြစ်နေရင် လုပ်ငန်းတွေ ဘယ်လိုလုပ်နိုင်မလဲ” ဟု အသက် (၅၀) ကျော် အမျိုးသား တစ်ဦးက ဆိုသည်။

လက်ရှိတွင် နောင်ချိုဒေသခံများအနေဖြင့် ကျေးရွာအနီး ရှိနေသည့် မြေမြှုပ်မိုင်းများ၊ တိုက်ပွဲအတွင်း ကျန်နေသည့် လက်နက်များကို ရှင်းလင်းပေးစေလိုကြောင်း တောင်းဆိုနေကြသည်။

ပြီးခဲ့သည့် ဧပြီလ ၅ ရက်နေ့မှ ၂၂ ရက်နေ့အထိ နောင်ချိုမြို့တွင်းတွင် အာဏာသိမ်း စစ်ကောင်စီ တပ်ဖွဲ့ နှင့် ပြည်သူ့ကာကွယ်ရေး ပူးပေါင်း တပ်ဖွဲ့တို့ အကြား ထိတွေ့တိုက်ပွဲ ဖြစ်ပွားခဲ့ပြီး ဒေသခံ ၁၅၀၀ ကျော် စစ်ရှောင် ထွက်ပြေးရသည့် အပြင် နေအိမ် ၂၄ လုံး အရပ်သား ၃ ဦးသေ ၄ ဦး လက်နက်ကြီး ထိမှန်ခဲ့သည်။