သျှမ်းပြည် တောင်ကြီးခရိုင် ပင်လောင်းမြို့အဝင်ရှိ စစ်ကောင်စီ စစ်ဆေးရေးဂိတ်တွင် စားနပ်ရိက္ခာ နှင့် ဆေးဝါး သယ်ယူမှု အကန့်အသတ်ကို တိုက်ပွဲဖြစ်ပြီးနောက်ပိုင်း ပိုမိုတင်းကြပ်လာသဖြင့် ဒေသခံများ အခက်ခဲကြုံတွေ့နေရကြောင်း စုံစမ်း သိရှိရသည်။
အောင်ပန်းလမ်းခွဲမှ ပင်လောင်းမြို့သို့ သွားလမ်းရှိ စစ်ကောင်စီ စစ်ဆေးရေးဂိတ်တွင် ယခင်က ဆန်၊ ဆီ၊ ဆား နှင့် ဆေးဝါးသယ်ယူမှုကို အကန့်အသတ်ဖြင့် သယ်ယူခွင့်ပေးခဲ့သည်။
ပြီးခဲ့သည့် ဖေဖော်ဝါရီ (၂၄) ရက် တိုက်ပွဲဖြစ်ပွားပြီးနောက် ကားတစ်စီးလျှင် ဆန် (၂၄) ပြည်အိတ် တစ်အိတ်နှုန်း နှင့် စားသုံးဆီကို (၁၀) ပိဿ သယ်ယူခွင့်ပေးပြီး စစ်ဆေးတင်းကြပ်မှုတွေ ပိုမိုပြုလုပ်လာနေကြောင်း ပင်လောင်းဒေသခံ တစ်ဦးက သျှမ်းသံတော်ဆင့်ကို ပြောသည်။
“ကားတစ်စီးကို ဆန်တစ်အိတ်ပဲ ပေးသယ်တယ်ဗျ။ စားသုံးဆီဆိုလည်း ၁၀ ပိဿ ဘူးကြီးတစ်ဘူးဘဲ ပေးသယ်တယ်။ ဆိုင်ဖွင့်ပြီး ရောင်းရတဲ့သူတွေအတွက်တော့ ခက်တာပေါ့ဗျာ။ အရင်က ကားတစ်စီးစာ သယ်ရတာ၊ အခုက အဲ့လိုသယ်ရတော့ ခက်တာပေါ့ “ ဟု ၎င်း ဒေသခံတစ်ဦးက ပြောသည်။
အဆိုပါ စစ်ကောင်စီ စစ်ဆေးရေးဂိတ်တွင် ကန့်သတ်ထားသည့် အကိုက်အခဲ ပျောက်ဆေးအပါအဝင် သတ်မှတ် ထားသည့် ပမာဏထက် သယ်ယူမှုတွေ ပြုလုပ်ပါက ကားသိမ်းဆည်းခြင်း၊ လူကိုခေါ်ယူစစ်ဆေး မေးမြန်းခြင်းလည်း ပြုလုပ်နေကြောင်း သိရသည်။
“ ဆေးဝါးတွေကျတော့ အကိုက်အခဲ ပျောက်ဆေးပါရင် လုံးဝသယ်ခွင့်မပေးဘူး။ ခိုးသယ်လို့လည်း မရဘူးဗျ။ သူတို့မိရင် ကားကိုသိမ်းတယ်။ လူကိုခေါ်စစ်တယ်။ ဘယ်သူ့အတွက် ဝယ်ပေးတာလဲ၊ ဘယ်ဈေးဆိုင်မှာလဲ အကုန်မေးတယ်။ ထောက်ခံစာကော တောင်းတယ်။ ထောက်ခံစာမပါရင်လည်း ကားသိမ်းပြီး ကားသမားကို ၃ နာရီလောက်ကြာအောင် စစ်ဆေးမေးမြန်းမှုတွေ လုပ်တယ် “ ဟု ၎င်းက ထပ်လောင်းပြောသည်။
ထို့အပြင် ပင်လောင်းမြို့တွင် တိုက်ပွဲကြောင့် နေရပ်စွန့်ပြီး ထွက်ပြေးတိမ်းရှောင်နေရသည့် စစ်ရှောင်ဦးရေဟာ ၆ ထောင်ဝန်းကျင်ရှိနေပြီး အဆိုပါ စစ်ကောင်စီ စစ်ဆေးရေးဂိတ်တွင် စားနပ်ရိက္ခာ နှင့် ဆေးဝါး သယ်ယူခွင့်ကို အကန့်အသတ်ဖြင့် သယ်ယူခိုင်းသောကြောင့် စစ်ရှောင်များအတွက်လည်း အခက်ခဲကြုံတွေ့နေရကြောင်း သိရသည်။
“ စစ်ရှောင်တွေက အခက်ခဲဆိုတာ ရှိနှင့်ပြီးသားလေ။ အဓိက စားဖို့သောက်ဖို့ ဆန်၊ ဆီ၊ ဆေး၊ ဆား ကအရေးကြီးတယ်လေ။ စစ်ရှောင်စခန်းမှာက တစ်ရက် တစ်ရက်ကို အနည်းဆုံး ဆန်အိတ် (၂၀) ကျော်လောက် ကုန်တယ်။ ကျနော်တို့လည်း အကန့်အသတ်နဲ့ သယ်ရတော့ ခက်တာပေါ့ဗျာ။ စစ်ရှောင်တွေ အများကြီးရှိတယ် “ ဟု စစ်ရှောင်ကူညီသူ ဒေသခံတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီသည် စားနပ်ရိက္ခာ နှင့် ဆေးဝါးများကို အကန့်အသတ်ဖြင့် သယ်ယူခိုင်းရာမှာ ဒေသခံများက ပြည်သူ့ကာကွယ်ရေးတပ်ဖွဲ့ PDF ကို ထောက်ပံ့ပေးမည်ဟု ဆိုသည့် စိုးရိမ်ချက်၊ အကြောင်းပြချက်ကြောင့် လွတ်လွတ်လပ်လပ် သယ်ယူခွင့်မပေးကြောင်း ဒေသခံများ၏ ပြောချက်အရ သိရသည်။
ထို့ကြောင့် ပင်လောင်းမြို့ပေါ်ရှိ အခြေခံစားသောက်ကုန်ပစ္စည်း ဆန်၊ ဆီ၊ ဆား နှင့် ဆေးဝါးများ ယခင်ထက် ဈေးနှုန်းပိုမြင့်တက်လာနေသလို စားသုံးသူများအတွက် အခက်ခဲ ကြုံတွေ့နေရကြောင်း သိရသည်။
Leave a Comments