အရှေ့တောင် အာရှမှာ အလှဆုံးရေတံခွန် အဖြစ် တင်စားထားသည့် သျှမ်းပြည် မိုင်းရှူးမြို့နယ် ဟိုင်းပါကျေးရွာရှိ ဟိုင်းပါရေတံခွန်အနီးတွင် စေတီ တစ်ဆူ တည်ဆောက်နေသည့် သတင်းသည် လူမှုကွန်ရက်စာမျက်နှာမှာ အငြင်းပွားမှုတွေ မြင့်တက်နေကြောင်း စုံစမ်းသိရသည်။
အဆိုပါ စေတီတည်ဖို့ရန်အတွက် မြေနေရာကို ဟိုင်းပါဒေသခံများက မိုင်းရှူးမြို့ သံဃာတော်များ ထံသို့ မြေဧက ၁ ဧက နီးပါး လှူဒါန်းထားကြောင်းလည်း သိရသည်။
“မိုင်းရှူးမြို့နယ်က သံဃာတော် အဖွဲ့နဲ့ ဟိုင်းပါ ဒေသခံတွေ အပါအဝင် မိုင်းရှူးမြို့နယ် တစ်ခုလုံးက ပြည်သူ တွေရဲ့ သဘောတူညီ ချက်နဲ့တည်ထားတဲ့ စေတီဖြစ်ပါတယ်၊ ပြီးတော့ ဒီနေရာကလည်း ဟိုင်းပါရေတံခွန်နဲ့ နီးတယ် ဆိုပေမဲ့လည်း ဟိုင်းပါ ရေတံခွန်အလှကို ကွယ်နေတာလည်း မဟုတ်ဘူး” ဟု မိုင်းရှူးမြို့မှ ဦးဇင်း တစ်ပါးက သျှမ်းသံတော်ဆင့်ကို မိန့်သည်။
ထိုစေတီ တည်ခြင်းဖြင့် ဟိုင်းပါ ရေတံခွန်အနီးတစ်ဝိုက် လာရောက်သောက်စား မူးယစ်နေကြသည့် ဖြစ်ရပ်ကိုလည်း တားမြစ်နိုင်ကြောင်းလည်း ဦးဇင်းက ဆက်မိန့်သည်။
တစ်ဖက်တွင်လည်း ဟိုင်းပါ ရေတံခွန်အနီး စေတီတည်ခြင်း နှင့် ပတ်သက်ပြီး လူမှုကွန်ယက် စာမျက်နှာပေါ်မှာ အငြင်းပွားမှု တွေ ဖြစ်နေသည်။
ယင်းကဲ့သို့ သဘာဝ ရေတံခွန်နားတွင် စေတီဘုရားလာရောက်တည်ခြင်း နှင့် ပတ်သက်ပြီး တချို့ကလည်း သာသနာကို အကြောင်းပြကာ ကိုယ်ကျိုးရှာနေကြခြင်းသာ ဖြစ်ကြောင်း လူမှုကွန်ယက်ပေါ် ရေးတင်သူ လည်း ရှိသည်။
“ဟိုင်းပါ ရေတံခွန်ဆိုတာ ခေတ်ပျက်မှာတောင် ဒီလောက်လုပ်စားလို့ကောင်းနေတာ အနာဂတ်မှာသာဆို စီးပွားရေး အရ အရမ်းတွက်ချေကိုက်မယ့် အကွက်အကွင်း ဖြစ်မယ်” ဟု လူမှုကွန်ယက် အသုံးပြုသူ တစ်ဦးက ၎င်း၏ Facebook တွင် ရေးတင်ထားသည်။
ဟိုင်းပါ ရေတံခွန်ကို စေတီ တည်လိုက်ပါက ရေကူးရန် ခက်ခဲသွားနိုင်ပြီး၊ ပျော်ပါးရန်လည်း အဆင်မပြေ နိုင်ကြောင်း ပြောဆိုမှုများရှိသော်လည်း တဖက်မှာ ထိုဟိုင်းပါ ရေတံခွန်သည် ရေကူးရန် ရေဆော့ရန် ခက်ခဲသည့်နေရာဖြစ်ကြောင်းလည်း ဒေသခံများက ပြောဆိုသည်။
“ ဟိုင်းပါ ရောက်ဖူးသူတိုင်းသိတယ်။ အဲ့နေရာက ဘစ်ကနီ နဲ့ ရေကူးဖို့မပြောနဲ့ ရေကနက်တယ်။ ရေဆော့ဖို့လည်းခက်ခဲတယ်” လို့ ဒေသခံ အမျိုးသမီးတစ်ဦးကပြောသည်။
ဟိုင်းပါကျေးရွာနေထိုင်သည့် ပြည်သူများအနေဖြင့် ရေတံခွန် အနီး စေတီ တည်ဆောက်မည်ကို ကြိုတင်သိရှိပြီးသာဖြစ်ကြောင်း၊ စေတီတည်ခြင်းနှင့်ပတ်သက်ပြီး ကျေးရွာနေထိုင်သူများအနေဖြင့် ကန့်ကွက်ခြင်းမရှိကြောင်းလည်း သိရသည်။
ဟိုင်းပါကျေးရွာသည် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ၏ ထိန်းချုပ်သည့် နေရာဒေသဖြစ်ပြီး၊ ၂၀၁၅ ခုနစ်တွင် SSPP နှင့် စစ်ကောင်စီ တပ်တို့ တိုက်ပွဲဖြစ်ပွားခဲ့ပြီး ဒေသခံ အများအပြား ထွက်ပြေးတိမ်းရှောင်ခဲ့ရသည်။
ထိုကိစ္စ နှင့် ပတ်သက်ပြီး SSPP ပြောရေးဆိုခွင့်ရှိသူ ဗိုလ်မှူး ဖုန်းဟန် က “ စေတီ တည်လိုက်ခြင်းအားဖြင့် ဟိုင်းပါ ရေတံခွန် အလှကို ဖျက်ဆီးတာလည်း မဟုတ်ဘူး။ လိုင်းပေါ်မှာ အငြင်းပွားမှု တွေရှိနေတယ်ဆိုတာကလည်း လာလည်တဲ့သူတွေအတွက် အနှောက်အယှက် ဖြစ်မှာစိုးလို့တဲ့။ ဘာမှ ဖြစ်စရာ အကြောင်းမရှိဘူး။ သာသနာ ထွန်းကားတယ်လို့ မြင်တက်ရင် ကောင်းမယ်။ တချို့ ကလည်း အကြောင်းရင်းကို မသိဘဲနဲ့ ဝေဖန်ဖို့ပဲ သိကြတယ်” ဟု သျှမ်းသံတော်ဆင့်ကိုပြောသည်။
ထိုဒေသသည် အနက်ရောင်နယ်မြေ အဖြစ်သတ်မှတ်ခဲ့ပြီး ၂၀၁၈ ခုနစ်နောက်ပိုင်းမှ စပြီး ခရီးသွားလည်ပတ်သူများပြားလာသည်။
ဟိုင်းပါ ရေတံခွန်ကို စစ်ကောင်စီတပ်ဘက်မှ ရေအားလျှပ်စစ်ထုတ်ယူရန် အတွက် လျာထားသည့် နေရာတစ်ခုဖြစ်ကြောင်းသိရသည်။
ဟိုင်းပါ ရေတံခွန်သည် နာမည်ကျော် ရေတံခွန် တစ်ခုဖြစ်ပြီး နွေရာသီ ၊ ဆောင်းရာသီ ရောက်တိုင်း ရပ်နီးရပ်ဝေးမှ ပြည်သူများက လာရောက် အပန်းဖြေရာ နေရာ တစ်ခုဖြစ်သည်။
Leave a Comments