သျှမ်းပြည် လားရှိုးခရိုင် လားရှိုးမြို့နယ် နမ့်တွန်းကျေးရွာအုပ်စု ဟောင်လိတ်ရွာတွင် နေထိုင်သည့် အမျိုးသမီးတစ်ဦး တောင်ယာနေ့စားလိုက်ရင်း တောင်ယာထဲ၌ မိုင်းနင်းမိပြီး ပြင်းထန်ဒဏ်ရာ ရရှိခဲ့ကြောင်း စုံစမ်းသိရသည်။
ယမန်နေ့ မေလ ၁ ရက် နံနက်ပိုင်း ၁၀ နာရီအချိန်၌ နမ့်တွန်းကျေးရွာအုပ်စု ဟောင်လိတ်ရွာတွင် နေထိုင်သည့် အမျိုးသမီးတစ်ဦးသည် နေ့စားအလုပ်သွားချိန် တောင်ယာထဲ၌ လက်ကျန် မိုင်းတစ်ဦးကို နင်းမိရာ ပေါက်ကွဲပြီး ညာဖက်မျက်လုံးတစ်ဖက် မိုင်းကျည်စထိမှန် ပြင်းထန်ဒဏ်ရာ ရရှိခဲ့ကြောင်း နမ့်တွန်းကျေးရွာဒေသခံ တစ်ဦးက သျှမ်းသံတော်ဆင့်ကို ပြောသည်။
“ သူတို့က လက်လုပ်လက်စားဆိုတော့ သူများဆီက လုပ်အားလိုက်တာ။ လုပ်အားလိုက်ရင်း တောင်ယာထဲမှာ အရင်က အကြွင်းကျန်တဲ့ မိုင်းတစ်လုံး နင်းမိပြီး ပေါက်ကွဲသွားတာ။ ညာဖက်မျက်လုံး၊ မျက်နှာမှာ ပေါက်ကွဲသွားတဲ့ မိုင်းစ နည်းနည်းမှန်သွားတာပေါ့။ ဒဏ်ရာကတော့ နည်းနည်းပြင်းတဲ့ အခြေအနေပါဗျ “ ဟု ၎င်းဒေသခံ တစ်ဦးက ပြောသည်။
အဆိုပါ ထိခိုက်ဒဏ်ရာရသူ နေ့စား အလုပ်သမား အမျိုးသမီးတစ်ဦးကို လားရှိုးဆေးရုံသို့ ပို့ဆောင်ထားပြီး လက်ရှိ ထိခိုက်ဒဏ်ရာရသူ အမျိုးသမီးတစ်ဦး အခြေအနေဟာ ပြန်ကောင်းမွန်လာပြီး အစားအသောက်လည်း ပြန်လည်စားနိုင်ပြီဖြစ်ကြောင်း ၎င်းက ဆက်ပြောသည်။
ပြီးခဲ့သည့် ၂၀၁၉ ခုနှစ်မှစပြီး လားရှိုးမြို့နယ် နမ့်တွန်းကျေးရွာအုပ်စု ဟောင်လိတ်ရွာ အနီးတဝိုက်တွင် တိုင်းရင်းသားလက်နက်ကိုင်တပ်ဖွဲ့များ တိုက်ပွဲ ဖြစ်ပွားခဲ့ကြပြီး အဆိုပါ နယ်မြေအတွင်း မြေမြှုပ်မိုင်းများကို မြှုပ်ထားခဲ့ကြောင်း သိရသည်။
လက်ရှိ တိုက်ပွဲဖြစ်ပွားခဲ့သည့် နယ်မြေအတွင်းတွင် လက်ကျန် မြေမြှုပ်မိုင်းများ မရှင်းလင်းနိုင်သေးသဖြင့် ပေါက်ကွဲမှုက ထပ်မံဖြစ်ပွားနေကာ နေ့စားလိုက်သည့် တောင်ယာအလုပ်သမားအတွက် စိုးရိမ်ထိတ်လန့်မှု ဖြစ်ရသလို တောင်ယာအတွင်းသို့ မသွားရဲကြတော့ကြောင်း ၎င်းက ထပ်လောင်း ပြောသည်။
“ စိုးရိမ်မှုတော့ ဖြစ်သွားတာပေါ့ဗျာ။ ဒီဒေသမှာက အဲ့လိုလည်း သိပ်မဖြစ်ဖူးတော့ လန့်သွားတဲ့ အခြေအနေ၊ စိုးရိမ်မှုတွေတော့ များသွားတာပေါ့။ တောင်ယာ သွားဖို့တောင် မသွားရဲကြတော့ဘူး။ အဲ့မှာ တောင်ယာတွေ ရှိတော့ အဲ့ဖက်တောင်သူတွေ ခြေလှမ်းဖို့ စိုးရိမ်နေရတယ် “ ဟု ၎င်းက ထပ်လောင်းပြောသည်။
ထို့အပြင် လားရှိုးမြို့နယ်တွင် တအာင်း (ပလောင်) အမျိုးသားလွတ်မြောက်ရေးတပ်မတော် (TNLA)၊ ကချင်အမျိုးသား လွတ်မြောက်ရေးတပ်မတော် (KIA)၊ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) နှင့် ကိုးကန့်တပ်မတော် (MNDAA) တို့ လှုပ်ရှားရာ နယ်မြေတစ်ခုလည်း ဖြစ်သည်။
Leave a Comments