သျှမ်းပြည် လောက်ကိုင်မြို့နယ်ရှိ ကာစီနိုရုံများတွင် ဖဲရှိုးအလုပ် လုပ်ကိုင်ချင်သူများအတွက် အခြေခံ ဖဲရှိုးသင်တန်းဖွင့်လှစ်ပေးပြီး သင်ကြားပေးနေကြောင်း စုံစမ်းသိရှိရသည်။

စစ်တပ်က အာဏာသိမ်းပြီးနောက်ပိုင်း လောက်ကိုင်မြို့သို့ သွားရောက်ပြီး ကာစီနိုရုံတွင် ဖဲရှိုးအလုပ် လုပ်ကိုင်ချင်သူများအတွက် လောက်ကိုင်မြို့တွင် အခြေခံ ဖဲရှိုးသင်တန်းကို ဖွင့်လှစ်ပေးနေပြီး တစ်ဦးလျှင် တရုတ်ယွမ်ငွေ (၅၀၀) ယွမ်၊ မြန်မာငွေ ကာလပေါက်စျေး ကျပ်ငွေ ၂ သိန်း ဖြင့် သင်တန်းပေးနေကြောင်း သင်တန်းပေးနေသူ အမည်မဖော်လိုသူ ဒေသခံ တစ်ဦးက ပြောသည်။

“ တချို့တွေကျ တစ်လ တက်ရတယ်။ တချို့တွေကတော့ တစ်လခွဲ၊ နှစ်လ တက်ရတယ်။ သင်ယူတဲ့ အပေါ်မှာဘဲ မူတည်တယ်။ အဲ့ဒီ တရုတ်ယွမ် ၅၀၀ ပေးပြီး မတတ်မချင်း သင်လို့ရတယ်။ အဲ့ဒီ အတတ်သင်က ၁၂ မျိုး လောက် သင်ပေးတယ်။ ဖဲရုံမှာ ကစားတာနဲ့ ပတ်သက်ပြီး အကုန်လုံး သင်ပေးတယ်။ ကာစီနိုရုံမှာ ဖဲဝေတဲ့ အလုပ်တွေပေါ့ “ ဟု ၎င်းက ပြောသည်။

လက်ရှိ သင်တန်းတွင် တက်ရောက်နေသည့် သင်တန်းသားများ စုစုပေါင်း ၇၀ ဦး ထက်မနည်း ရှိနေပြီး အဆိုပါ သင်တန်းထဲ၌ သင်တန်းသူ ၃၀ ဦးကိုတော့ အဆောင်ဖွင့်လှစ်ပြီး လက်ခံသင်ကြားပေးနေကြောင်း သိရသည်။

“ယောင်္ကျားလေးကိုတော့ အဆောင် လက်မခံဘူးဗျ။ အပြင်မှာ အခန်းငှားပြီးတော့ ဒီမှာလာတက်လို့တော့ ရပါတယ်။ ချက်မစားချင်ဘူးဆိုရင် စားစရိတ်ကို ကျပ်ငွေ ၄ သိန်း လောက်ပေးပြီး အဆာင်မှာ စားလို့ရတယ်။ အဆောင်မှာတော့ ယောင်္ကျားလေး မလက်ခံဘူး “ ဟု ၎င်းက ထပ်လောင်းပြောသည်။

ထို့အပြင် စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတွင် စစ်ရေး ပဋိပက္ခ ဖြစ်ပွားပြီး နိုင်ငံရေး မတည်ငြိမ်မှုကြောင့် စီးပွားရေး၊ ပညာရေး၊ အလုပ်အကိုင် အခွင့်အလမ်း ရှားပါးလာရာ လူငယ်များက ဝမ်းရေးအတွက် ကောင်းကျိုး၊ ဆိုးကျိုး အလုပ်မျိုးကို မရွှေးနိုင်ကာ နေရပ်စွန့်ပြီး တိုင်းတစ်ပါးသို့ ထွက်ခွာကြရကြောင်း လူငယ်တစ်ဦးက သုံးသပ်ပြောသည်။

“ပိုက်ဆံဝင်တဲ့ နေရာက ကောင်းတာလား၊ မကောင်းတာလားလို့ မသုံးသပ်တော့ဘူးလေ။ အခုက အရေးကြီးတာ အသက်ရှင် နေထိုင်ဖို့ဆိုတော့ ဘယ်လောက်ဘဲ မကောင်းတဲ့ အလုပ်ဖြစ်နေပါစေ အဓိက ပိုက်ဆံဝင်နေတယ် ဆိုတာနဲ့ ဘဲ လုပ်နေရတာ။ ပျော်လို့ လုပ်နေရတာ မရှိသလောက်ပါပဲ။ ဖဲ ဝေသင်တန်းဆိုလည်း အရင်ပုံစံတိုင်း ဆိုရင် ကဲ့ရဲ့ကြမယ်ဖြစ်ချင်း ဒီခေတ်ပျက် အစိုးရ လက်ထက်မှာတော့ ဒါက လူငယ်တွေကို ပိုက်ဆံဝင်အောင် လုပ်ပေးနေတယ်လို့ ဆိုရမှာဘဲ “ ဟု ၎င်းက ပြောသည်။

အလားတူ စစ်တပ်က အာဏာသိမ်းပြီးနောက်ပိုင်း လောက်ကိုင်မြို့ အပါအဝင် မိုင်းလားမြို့ရှိ ကျားဖြန့် ( လိမ်စားရတဲ့အလုပ်) ကို သွားရောက်လုပ်ကိုင်သူများသည် လူ့အခွင့်အရေး ချိုးဖောက်ခံရခြင်း၊ ရိုက်နှိက် ခံရခြင်း နှင့် ရက်စက် ခံရခြင်းတို့လည်း ရှိနေကြောင်း သိရသည်။