ယမန်နေ့ မေလ ၁ ရက်နေ့တွင် ကျရောက်သည့် ”ကမ္ဘာ့အလုပ်သမားများနေ့” တွင် တရားမျှတမှု ရရှိရေး အတွက် ထိုင်းနိုင်ငံ ချင်းမိုင်ရောက် မြန်မာရွှေ့ပြောင်းအလုပ်သမားများ စုပေါင်းကာ ချီတက်ဆန္ဒပြ တောင်းဆိုကြသည်။

လက်ရှိ ထိုင်းရောက် မြန်မာရွှေ့ပြောင်းအလုပ်သမားများ အတွက် ထိုင်းအစိုးရမှ သတ်မှတ်ပေးထားသည့် ရွှေ့ပြောင်းလုပ်သားများ ဆိုင်ရာ ဥပဒေ နှင့် အခွင့်အလမ်းများရှိသော်လည်း ပွဲစားများမှ လုပ်ဆောင်မှုသည် ဥပဒေ နှင့် ဆန့်ကျင်မှုများ ရှိနေကြောင်း ဆန္ဒပြမှုတွင် ပါဝင်သူ ချင်းမိုင်ရောက် ရွှေ့ပြောင်းလုပ်သားများ၏ အတိုင်ပင်ခံ ပီထောင်းခမ်းက သျှမ်းသံတော်ဆင့်ကို ပြောသည်။

“ကျနော်တို့ စုပေါင်းပြီး ဆန္ဒပြ တောင်းဆိုရတဲ့ အကြောင်းရင်းက အဓိက ကတော့ ရွှေ့ပြောင်း လုပ်သားတွေ အတွက် တရားမျှတမှု ရချင်ပါတယ်။ အခု ထိုင်းအစိုးရက ထုတ်ထားတဲ့ ဥပဒေတွေ နဲ့ မကိုက်ညီဘဲ ပွဲစားတွေက လုပ်စားနေတာ တွေ့ရတယ်၊ ဒါ့ကြောင့် ကျနော်တို့ ထိုင်းရောက်တဲ့ ရွှေ့ပြာင်းလုပ်သားတွေ အားလုံး တရားမျှတမှု ရချင်တယ်၊ လုံခြုံမှုတွေလည်း ရချင်တယ်” ဟု ပီထောင်းခမ်းက သျှမ်းသံတော်ဆင့်ကို ပြောသည်။

အဆိုပါ ကမ္ဘာ့အလုပ်သမားများနေ့ အတွက် ချီတက် ဆန္ဒပြမှုကို ထိုင်းနိုင်ငံ ၊ ချင်းမိုင်ခရိုင်၊ ချင်းမိုင်မြို့တွင် ထိုင်းစံတော်ချိန် ညနေ ၆ နာရီမှ ည ၉ နာရီအထိ ကျင်းပပြုလုပ်သွားခဲ့ပြီး တောင်းဆိုချက်များကို ကြွေးကြော်ခြင်း၊ ရွှေ့ပြောင်းလုပ်သားများ၏ အခက်အခဲများကို ကြွေးကြော်ခြင်းများ ပြုလုပ်ခဲ့ကြောင်း သိရသည်။

ထို့အပြင် ချင်းမိုင်ရောက် ရွှေ့ပြောင်းလုပ်သားများကို ထိုင်းလုပ်သားများ နှင့် ထပ်တူ အခွင့်အရေး ရစေချင်ကြောင်းလည်း ကမ္ဘာ့အလုပ်သမားများနေ့ ဆန္ဒပြမှုတွင် ပါဝင်သူ သျှမ်းရွှေ့ပြောင်းလုပ်သား နန်းယိင်းခမ်းက သျှမ်းသံတော်ဆင့်ကို ဆက်ပြောသည်။

“ကျမတို့ ရွှေ့ပြောင်း လုပ်သား အဓိက ရင်ဆိုင်နေရတဲ့ အခက်အခဲကတော့ Passport ၊ Visa နဲ့ အလုပ်သမားကဒ် ရရှိရေးတွေ ဖြစ်ပါတယ်။ တချို့က အလုပ်သာ လုပ်နေပြီးတော့ ပိုက်ဆံ မရတာတွေလည်း ရှိနေတယ်၊ ဒါကြောင့် ဒီနေ့ ဆန္ဒပြမှုမှာက ထိုင်းလုပ်သား တွေနဲ့ ထပ်တူ ကျမတို့လည်း အခွင့်အရေးတွေ အတူတူ ရနိုင်စေဖို့ တောင်းဆိုပါတယ်” ဟု နန်းယိင်းခမ်းက သျှမ်းသံတော်ဆင့်ကို ပြောသည်။

ချီတက် ဆန္ဒပြမှုတွင် MAP Foundation , Empower, HRDF, BEAM Education Foundation တို့ အပါအဝင် တခြား ရွှေ့ပြောင်း လုပ်သား အဖွဲ့အစည်းများစွာကလည်း ပါဝင်ခဲ့သည်။

ထိုင်းရောက် ရွှေ့ပြောင်းလုပ်သားများသည် Passport , Visa ကိစ္စ အပါအဝင် အလုပ်သမားကဒ် ရရှိရေး အတွက်လည်း ပူပန်နေကြရကြောင်းလည်း သိရသည်။

ယင်းကဲ့သို့ ကိစ္စများကြောင့် ရွှေ့ပြောင်းလုပ်သားများ အဆင်ပြေပြေ အလုပ်လုပ်နိုင်ရေးအတွက် သက်ဆိုင်ရာ ဝာာဝန်ရှိသူများကို ကူညီဆောင်ရွက်ပေးစေလိုကြောင်းလည်း ရွှေ့ပြောင်းလုပ်သားများ က တောင်းဆိုနေကြသည်။