မြန်မာနိုင်ငံတွင် ထောင်ဒဏ် အနှစ် ၂၀ ချမှတ်ခံထားရသော မြန်မာနောင်းသတင်းဌာန၏ ဓာတ်ပုံသတင်းထောက် စိုင်းဇော်သိုက်ကို နယူးယောက်အခြေစိုက် သတင်းသမားများ ကာကွယ်စောင့်ရှောက်ရေးကော်မတီ (CPJ) က ၎င်း၏ ၂၀၂၆ ခုနှစ် အပြည်ပြည်ဆိုင်ရာ သတင်းလွတ်လပ်ခွင့်ဆုအတွက် ရွေးချယ်လိုက်ကြောင်း သြဂုတ် ၅ ရက်တွင် ထုတ်ပြန်ကြေညာသည်။

ဆုပေးအခမ်းအနားကို ၂၀၂၆ ခုနှစ် နိုဝင်ဘာ ၁၉ ရက်တွင် အမေရိကန် နယူးယောက်မြို့၌ ကျင်းပမည်ဖြစ်ကြောင်း သိရသည်။

စိုင်းဇော်သိုက်ကို ၂၀၂၃ ခုနှစ် မေလ ၂၃ ရက်တွင် ရခိုင်ပြည်နယ် စစ်တွေမြို့၌ သတင်းလိုက်ရင်း ဖမ်းဆီးခဲ့ပြီး၊ ထိုနှစ် စက်တင်ဘာလတွင် စစ်ခုံရုံးက အင်းစိန်ထောင်၌ ထောင်ဒဏ် အနှစ် ၂၀ နှင့် အလုပ်ကြမ်းစေခိုင်းရန် စီရင်ချက်ချခဲ့ခြင်း ဖြစ်သည်။

၎င်းသည် ၂၀၂၁ ခုနှစ် စစ်အာဏာသိမ်းပြီးနောက် သတင်းထောက်တစ်ဦးအား အနှစ်ရှည်ဆုံးချမှတ်ခဲ့သည့် ထောင်ဒဏ်များအနက် တစ်ခုအပါအဝင် ဖြစ်သည်။

CPJ ၏ ထုတ်ပြန်ချက်အရ စိုင်းဇော်သိုက်သည် ထောင်ဒဏ်ကျခံနေစဉ် ရုပ်ပိုင်းဆိုင်ရာ ညှဉ်းပန်းနှိပ်စက်ခံရမှုများနှင့် ပြင်းထန်သော ကျန်းမာရေးဝေဒနာများအတွက် ဆေးဝါးကုသမှု ငြင်းပယ်ခံနေရကြောင်း သိရသည်။

CPJ ၏ ၂၀၂၅ ခုနှစ် စာရင်းအရ မြန်မာနိုင်ငံသည် ကမ္ဘာ့နိုင်ငံများအနက် သတင်းထောက်များကို ဒုတိယအများဆုံး ထောင်ဒဏ်ချမှတ်သည့် နိုင်ငံဖြစ်သည်။

CPJ က စိုင်းဇော်သိုက်၏ ဖြစ်စဉ်သည် လွတ်လပ်သော မီဒီယာများကို နှုတ်ပိတ်ရန် မြန်မာစစ်အစိုးရ၏ လုပ်ရပ်များကို ဖော်ပြနေသည်ဟု ဆိုသည်။

စိုင်းဇော်သိုက်သည် ပြီးခဲ့သည့် ဇွန်လက နယ်စည်းမခြားသတင်းထောက်များအဖွဲ့ (RSF) ၏ သတ္တိရှင်ဆု (Courage Prize) ကိုလည်း ရရှိထားခဲ့သည်။