သျှမ်းပြည် လွိုင်လင်ခရိုင် လွိုင်လင်မြို့ ရပ်ကွက် ၄ ရှိ မွေတော်ဘုန်းကြီးကျောင်း ဆရာတော် ပျံလွန်တော်မှုသည်ကို အကြောင်းပြပြီး လောင်းကစားဝိုင်း ဖွင့်လှစ်ခဲ့ကြောင်း သတင်းရရှိသည်။
ပြီးခဲ့သည့် ဧပြီ ၂၂ ရက်နေ့တွင် လွိုင်လင်မြို့ မွေတော် ကျောင်းထိုင်ဆရာတော် ပျံလွန်တော်မှုသွားခဲ့ပြီး ဧပြီ ၂၄ ရက်နေ့မှစပြီး လောင်းကစားဝိုင်းကို ဘုန်းကြီးကျောင်းဆောင်၏ အနောက်ဘက်တွင် လောင်းကစားဝိုင်း ဖွင့်လှစ်ခဲ့ကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ လွိုင်လင်မြို့ မွေတော်ဘုန်းကြီးကျောင်းထိုင်ဆရာတော်က ပျံလွန်တော်မှုသွားတာကို အကြောင်းပြပြီးတော့ လောင်းကစားဒိုင်တွေက လောင်းကစား လာဖွင့်နေတာ။ မကြာမီ ကလည်း ပင်လုံမှာ သွားဖွင့်တယ်။ အခုက ဘုန်းကြီးပျံတော်မှုတာကို အကြောင်းပြပြီး ထပ်လာဖွင့်တယ်” ဟု ၎င်းက ပြောသည်။
အဆိုပါ မွေတော်ကျောင်းတွင်း ဖွင့်လှစ်ထားသည့် လောင်းကစားဝိုင်းများကိုလည်း တာဝန်ရှိသည့် သူများက ခွင့်ပြုထားကြောင်း အထက်ပါ လွိုင်လင်မြို့ ဒေသခံက ပြောသည်။
“ လောင်းကစားဒိုင်တွေ စီးပွားရှာနေကြတာ။ တာဝန်ရှိတဲ့ အကြီးပိုင်းတွေကလည်း သိရက်နဲ့ ခွင့်ပြုချက်တွေ ပေးထားတာ။ ဒီနေ့ထိ ဖွင့်နေသေးတယ်။ ဘာမှ မပြောဘူး” ဟု ၎င်းက ထပ်လောင်းပြောသည်။
မွေတော်ကျောင်းထိုင်ဆရာတော်ကို ပြီးခဲ့သည့် ဧပြီ ၂၈ ရက်နေ့တွင် သဂြိုလ်ခဲ့ကြောင်း သိရသည်။
လောင်းကစားဝိုင်းတွေ များပြားလာသည့်အတွက်ကြောင့် လောင်းကစားဝိုင်းမှ တစ်ဆင့် သူခိုး၊ ဓားပြ တွေများပြားလာမှာကို ဒေသခံများက စိုးရိမ်နေကြသည်။
“ အခုခေတ်က ဘာပဲလုပ်လုပ် လောင်းကစားဝိုင်းတွေက ပါလာပြီ။ ဘယ်နား ဖြစ်ဖြစ်ရှိနေတာပဲ။ အခုတောင် လောင်းကစားကြောင့် သူခိုးတွေ များလာပြီလေ။ နောက်ဆိုရင် ဒီထက် ပိုများလာမှာပေါ့။ သူခိုး ၊ ဓားပြတွေ ပိုများလာမှာကိုတော့ စိုးရိမ်ရတာပေါ့” ဟု လွိုင်လင်မြို့ ဒေသခံ အမျိုးသမီးတစ်ဦးက ပြောသည်။
စစ်တပ်က အာဏာသိမ်းပြီးနောက်ပိုင်း သျှမ်းပြည်အတွင်း လောင်းကစားဝိုင်းတွေ ပိုများပြားလာခဲ့ပြီး သူခိုး ၊ ဓားပြတိုက်မှုတွေလည်း ပိုများလာခဲ့သည်။
အဆိုပါ လောင်းကစားဝိုင်း၏ နောက်ဆက်တွဲ သူခိုး ၊ ဓားပြတွေ များပြားလာသည့်အတွက်ကြောင့် ဒေသခံ ပြည်သူများက စိုးရိမ်စိတ်ဖြင့် နေထိုင်နေကြရပြီး လုံခြုံမှု မရှိကြောင်း သိရသည်။
