ကရင်နီပြည် ဒီမော့ဆိုမြို့ အနောက်ဖက်ခြမ်းရှိ ချယ်ရီကုန်း စစ်ရှောင်စခန်းကို စစ်ကောင်စီမှ တိုက်လေယာဉ်ဖြင့် ဗုံးကြဲတိုက်ခိုက်ခဲ့သဖြင့် လူထိခိုက်ဒဏ်ရာ ရရှိခဲ့ကြောင်း စုံစမ်း သိရှိရသည်။
ယမန်နေ့ (ဧပြီလ ၂၇ ရက်) ည ၁၁ နာရီခွဲအချိန် ဒီမော့ဆို အနောက်ဖက်ခြမ်းရှိ ချယ်ရီကုန်း စစ်ရှောင်စခန်းကို အကြောင်းမဲ့ စစ်ကောင်စီတပ်ဖွဲ့မှ တိုက်လေယာဉ်ဖြင့် ဗုံးကြဲတိုက်ခိုက်ခဲ့သောကြောင့် လူထိခိုက်ဒဏ်ရာရသူ နှင့် သေဆုံးမှုများလည်း ရှိခဲ့ကြောင်း ဒီမော့ဆို ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ စစ်ရှောင်စခန်းဘက်ကို ကြဲချတာပါ။ စပြီးတော့ ဗုံးကြဲတာတော့ ည ၁၁ နာရီဝန်းကျင်လောက်က ကြဲတာ။ ည ၁၁ နာရီခွဲလောက်တော့ အတွဲလိုက်ပစ်တဲ့ ၂ လုံးတွဲ လက်နက်ကြီးတွေနဲ့ပါပစ်တယ်။ စစ်ရှောင်တွေတော့ ပုန်းခိုကျင်းရှိတဲ့နေရာ ပုန်းကြတယ်။ အသက်ဘေးလွတ်အောင် ပြေးရတာပါပဲ “ ဟု ၎င်း ဒေသခံတစ်ဦးက ပြောသည်။
အဆိုပါ စစ်ကောင်စီမှ တိုက်လေယာဉ်ဖြင့် ဗုံးကြဲမှု နှင့် ပတ်သက်ပြီး သျှမ်းသံတော်ဆင့်သတင်းဌာနမှ အသေးစိတ်ကို ဆက်သွယ်မေးမြန်းရာမှာ မြေပြင်၏ ဖုန်းလိုင်းအခက်ခဲကြောင့် ဆက်သွယ်၍ မရသေးပေ။
ထို့အပြင် ဒီမေ့ာဆို အနောက်ဖက်ခြမ်းရှိ ချယ်ရီကုန်း စစ်ရှောင်စခန်းတွင် စစ်ရှောင်ဦးရေ ရာနှင့်ချီ ခိုလှုံနေကြောင်းလည်း သိရသည်။
“ စစ်ရှောင်ဦးရေတော့ ရာဂဏန်းနဲ့ ရှိတာပါ။ သူတို့ မူလရွာမှာ နေထိုင်မရတော့လို့ ရွာတွေအုပ်စုအလိုက် စစ်ရှောင်ကြတဲ့ စခန်းတွေပါ” ဟု ၎င်းက ထပ်လောင်း ပြောသည်။
အလားတူ (ဧပြီလ ၁၅ ရက်) မွန်းလွဲ ၁ နာရီအချိန်ခန့်တွင်လည်း ဖယ်ခုံမြို့နယ် စစ်ရှောင်ပြည်သူများ အသုံးပြုသည့် ဆောင်းဖွေးဆေးရုံကို စစ်ကောင်စီမှ Mi 35 တိုက်လေယာဉ်ဖြင့် ဗုံး ၄ လုံးထက်မနည်း ဗုံးကြဲ တိုက်ခိုက်ခဲ့သောကြောင့် စစ်ရှောင်ကလေးအပါအဝင် သူနာပြု ၁ ဦးနှင့် အမျိုးသမီး ၁ ဦး ထိခိုက်ဒဏ်ရာ ရရှိခဲ့သည်။
Leave a Comments