သျှမ်းပြည် ဖယ်ခုံမြို့နယ်ရှိ ဆောင်းဖွေးဆေးရုံကို စစ်ကောင်စီတပ်ဖွဲ့မှ တိုက်လေယာဉ်ဖြင့် ဗုံးကြဲတိုက်ခိုက်ခဲ့သောကြောင့် စစ်ရှောင်များ ထိခိုက်ဒဏ်ရာ ရရှိခဲ့ကြောင်း စုံစမ်းသိရှိရသည်။
ယနေ့ (ဧပြီလ ၂၅ ရက်) နေ့လယ် ၁ နာရီကျော် အချိန်ခန့် ၌ စစ်ကောင်စီမှ တိုက်လေယာဉ်ဖြင့် အသုံးပြုပြီး စစ်ရှောင်များ အသုံးပြုနေသည့် ဆောင်းဖွေးဆေးရုံကို ပွိုင့် ၅ ဖြင့် လေးလုံးထက် မနည်း ဗုံးကြဲတိုက်ခိုက်ခဲ့သဖြင့် အနီးတဝိုက်ရှိ စစ်ရှောင်စခန်း အပါအဝင် ဆေးခန်းလာပြသည့် စစ်ရှောင်များလည်း ထိခိုက်ဒဏ်ရာ ရရှိခဲ့ကြောင်း စစ်ရှောင်တစ်ဦးက သျှမ်းသံတော်ဆင့်ကို ပြောသည်။
“စစ်ကောင်စီက တိုက်လေယာဉ် နဲ့ ဗုံးလာကြဲသွားတာဗျ။ အဆောင်တွေ၊ ကားတွေ အတော်များများ ပျက်စီးသွားတယ်။ လူနာကတော့ လောလောဆယ် ကယ်ထုတ်နေဆဲ အတည်ပြုလို့ မရသေးဘူး။ ဒီဆေးရုံက ကျနော်တို့ စစ်ဘေးရှောင်လူနာကို ကုပေးတာ။ မိခင်ကော ကလေးငယ်တွေကော အဲ့ဆေးရုံနားမှာဘဲ လာကုကြတယ်” ဟု ၎င်းက ပြောသည်။
စစ်ကောင်စီမှ တိုက်လေယာဉ်ဖြင့် ဗုံးကြဲ တိုက်ခိုက်မှုကြောင့် အနီးအနားရှိ စစ်ရှောင်းစခန်းအပါအဝင် ဆေးခန်းလာပြသည့် စစ်ရှောင်များမှာလည်း ထိခိုက်ဒဏ်ရာရရှိခဲ့သည်ဟု သိရသော်လည်း အသေးစိတ်ကိုတော့ မသိရသေးပေ။
“ သူတို့ ဗုံးကြဲတဲ့အချိန်က အဲ့ဒီ ဆေးရုံးရှေ့မှာ ကျနော်တို့ စစ်ရှောင်စခန်းတွေလည်း ရှိတယ်။ လူအင်အားလည်း အတော်များတယ်။ ဖယ်ခုံ၊ ဒီမော့ဆိုဖက်က အကုန်လုံးအဲ့မှာ စစ်လာရှောင်ကြတာ။ ထိခိုက်ဒဏ်ရာ ရတဲ့သူတွေတော့ များတယ် “ ဟု ၎င်းက ထပ်လောင်းပြောသည်။
လက်ရှိ စစ်ကောင်စီတပ်ဖွဲ့မှ တိုက်လေယာဉ်ဖြင့် ဗုံးကြဲတိုက်ခိုက်ခဲ့သောကြောင့် ဆေးရုံ၊ ကား နှင့် စစ်ရှောင်များ ထိခိုက်ဒဏ်ရာရပြီး အဆိုပါ ထိခိုက်ဒဏ်ရာရသူများကို ဆေးဝါးကုသပေး နေလျက်ရှိကြောင်း သိရသည်။
သျှမ်း – ကယား နယ်စပ်ဒေသ တလျှောက်တွင် နေ့စဉ်နီးပါး စစ်ကောင်စီမှ တိုက်လေယာဉ်ဖြင့် ပျံဝဲနေလျက်ရှိပြီး စစ်ရှောင်စခန်းများကိုလည်း ဗုံးကြဲ တိုက်ခိုက်နေခဲ့ကြောင်းလည်း သိရသည်။
