Thursday, April 18, 2024

သျှမ်းတပ် (၂) တပ် တိုက်ပွဲကြောင့် နွေရာသီ သျှမ်းစာသင်တန်းကျောင်း ရပ်နားထားရ

Must read

သျှမ်းပြည် လဲချားမြို့နယ်အတွင်း သျှမ်းတပ် (၂) တပ် တိုက်ပွဲကြောင့် နွေရာသီ သျှမ်းစာသင်တန်းကျောင်းများ (၁၀) ကျောင်းကျော် မဖွင့်လှစ်နိုင်ခဲ့ကြောင်း စုံစမ်းသိရှိရသည်။

Photo: သံဃာတော် (ပိတ်သွားသည့် နွေရာသီ သျှမ်းစာသင်ကျောင်းရှေ့)

ဧပြီ (၁၁) ရက်နေ့မှ စတင်ပြီး သျှမ်းတပ် (၂) တပ် တိုက်ပွဲကြောင့် လဲချားမြို့နယ်အတွင်း တိုက်ပွဲပြင်းထန်စွာ ဖြစ်ပွားမှုကြောင့် နွေရာသီ သျှမ်းစာသင်တန်းကျောင်း (၁၀) ကျောင်းကျော် ကျောင်းသား/သူ စုစုပေါင်း (၃၀၀) ကျော် သျှမ်းစာသင်ကြားခွင့် ဆုံးရှုံးခဲ့ရကြောင်း စုံစမ်း သိရှိရသည်။

“သံဃာတော်တွေ ဦးဆောင်ဖွင့်လှစ်တဲ့ ဗုဒ္ဓယဥ်ကျေးမှုကျောင်းတွေ၊ သျှမ်းသင်တန်းကျောင်းတွေ (၁၀) ကျောင်းထက်မနည်း ပိတ်ထားရတယ်။ ဒါကလည်း တိုက်ပွဲရဲ့ အကျိုးဆက်တွေ ဖြစ်တယ်။ မျိုးဆက်သစ်တွေ အတွက်တော့ စိတ်မကောင်းဘူး။ သျှမ်းစာသင်ဖို့ အခွင့်အရေးက နွေရာသီ (၂) လလောက်ပဲရှိတယ်။ အဲ့ဒါကို တိုက်ပွဲထပ်ဖြစ်တော့ ကျောင်းတွေ ပိတ်လိုက်ရတာ လွန်စွာ စိတ်မကောင်းဖြစ်မိတယ်” ဟု လဲချားမြို့ရှိ သံဃာတော်များမှ စစ်ဘေးရှောင်များကို သွားရောက်ကူညီလှူဒါန်းစဥ် တွေ့ခဲ့ရသည့် အဖြစ်အပျက်များကို သျှမ်းသံတော်ဆင့် ကို ပြောသည်။

လက်ရှိ လဲချားမြို့ပေါ်တွင် ဟော်ခမ်းကျောင်းတိုက်မှာ စစ်ရှောင်များ (၄၃) ဦး ၊ ကျောင်းခမ်း ကျောင်းတိုက် ( ၈၆) ဦး၊ ဝါဆိုကျောင်းတိုက် (၁၈၁) နှင့် ဆလိုင်းခုမ်ကျောင်း (၁၃၀) ဦး စစ်ဘေးရှောင် စုစုပေါင်း (၄၄၀) ဦးရှိပြီး စစ်ရှောင်စခန်း (၄) ခု ဖွင့်လှစ်ထားကြောင်း သိရှိရသည်။

ထိုစစ်ရှောင်များသည် လဲချားမြို့နယ် ဝမ်ဆန်းကျေးရွာအုပ်စု ၊ ဝမ်ကျယ်ကျေးရွာအုပ်စု နှင့် ဟိုင်းဆိုင်ကျေးရွာ အုပ်စု တို့မှ ဒေသခံများ ဖြစ်ကြသည်။

လဲချားမြို့နယ်အတွင်း သျှမ်းတပ် (၂) တပ် တိုက်ပွဲဖြစ်ပွားပြီး မြေမြှုပ်မိုင်းများ ရှင်းလင်းပေးမှု မရှိခြင်းကြောင့် ဒေသခံ တောင်သူများ မိုင်းအန္တရာယ်ကိုပါ စိုးရိမ်ရသည့်အတွက် ခြံသို့ မသွားရဲကြောင်း ဒေသခံများက ပြောဆိုကြသည်။

“စိုက်ပျိုးတယ်ဆိုတာလည်း သူ့ရာသီနဲ့အတူ စိုက်ပျိုးရတယ်လေ။ သူ့ရာသီအချိန်နဲ့အမှီ မစိုက်ပျိုးနိုင်ရင်လည်း ကောက်ပဲသီးနှံ ကောင်းကောင်းတွေ မရတော့ဘူး။ အထွက်နှုန်းလည်း နည်းတယ်။ မရှုံးရင်တောင်မှ အထွက်နှုန်း များများရဖို့ထက် နည်းနည်းပဲရတော့တာပေါ့ “ ဟု လဲချားဒေသခံ တောင်သူ တစ်ဦး ကပြောသည်။

သျှမ်းတပ် (၂) တပ်ဖြစ်သည့် SSPP/SSA နှင့် RCSS/SSA တို့က ထိတွေ့တိုက်ပွဲ ဖြစ်ပွားရာ လဲချားမြို့နယ် အတွင်းသို့ နှစ်ဖက်တပ်ဖွဲ့မှ စစ်အင်အား အများအပြား ဖြည့်တင်း လှုပ်ရှားမှု ရှိနေကြောင်းလည်း သိရသည်။

Leave a Comments

- Advertisement -spot_img

Latest article