ထိုင်းရောက် မြန်မာနိုင်ငံသားများ ပတ်စပို့ သက်တမ်းတိုးရန်အတွက် လက်ရှိမှာ စစ်ကောင်စီမှ ထုတ်ထားသည့် စည်းမျဉ်းကန့်သတ်ချက်များကြောင့် အခက်ကြုံတွေ့နေရကြောင်း စုံစမ်းသိရှိရသည်။
နိုင်ငံကူးလက်မှတ် အမျိုးအစားဖြစ်သည့် အလည်အပတ် ပတ်စပို့ ( PV) နှင့် ပညာရေး ပတ်စပို့ (PE) ကို ယခု ၂၀၂၃ ခုနှစ် နောက်ပိုင်းမှစပြီး သက်တမ်းတိုးလျှင် မြန်မာနိုင်ငံတွင် နေထိုင်သည့် ဒေသမှ ရဲစခန်းထောက်ခံစာ ပါရှိရမည် ဖြစ်ကြောင်း ချင်းမိုင်မြို့ ကောင်စစ်ဝန်ချုပ်ရုံးမှ (ဧပြီလ ၁၇ ရက်) တွင် ထုတ်ပြန်ထားသည်။
အလားတူ မြန်မာနိုင်ငံတွင် နေထိုင်သည့် ဒေသမှ ရပ်ကွက်ရုံး ထောက်ခံစာအပြင် ပြန်တမ်းဝင် အရာရှိ တစ်ဦးထောက်ခံစာ၊ မိဘနှစ်ပါး ထောက်ခံချက်နှင့်အတူ နိုင်ငံသား စိစစ်ရေးကတ်၊ ကာယရှင်များ၏ ပြည်ပရောက်ရှိ နေချိန် ဆောင်ရွက်မှုအသေးစိတ် ကိုယ်ရေးစာ နှင့် ကျောင်းတက်ရောက်နေပါက ကျောင်း နှင့် ပတ်သက်သည့် အထောက်အထားများ ပါရှိရမည်ဟု ထုတ်ပြန်ချက်တွင် ရေးသားဖော်ပြထားသည်။
“ သူတို့က နိုင်ငံရေး နဲ့ ပတ်သက်တဲ့သူကို စာရင်း အတိအကျ လိုချင်တာ။ ပြည်တွင်းမှာဘယ်နေရာ နေတာကအစ မိဘနာမည်တွေ အကုန်လုံးသိချင်တယ်။ အချက်အလက်တွေ အကုန်လုံးသိချင်လို့ အခုလို လုပ်လိုက်တာ “ ဟု ထိုင်းရောက် မြန်မာရွှေ့ပြောင်း အလုပ်သမားတစ်ဦးက သျှမ်းသံတော်ဆင့်ကို ပြောသည်။
ယခင်က နိုင်ငံကူးလက်မှတ် အမျိုးအစား အလည်အပတ် ပတ်စပို့ (PV) နှင့် ပတ်သက်၍ သက်တမ်းတိုးလျှင် ပြန်တမ်းဝင် အရာရှိတစ်ဦး ထောက်ခံစာကို တောင်းယူရခြင်း မရှိခဲ့သော်လည်း စစ်တပ်မှ အာဏာသိမ်းပြီး နောက်ပိုင်းမှသာ ဖြစ်ပေါ်လာခဲ့ကြောင်း သိရသည်။
ထိုသို့ နိုင်ငံကူးလက်မှတ်အမျိုးအစားဖြစ်သည့် အလည်အပတ် ပတ်စပို့ (PV) နှင့် ပညာရေး ပတ်စပို့ (PE) ကို ကိုင်ဆောင်ထားသူများ သက်တမ်းတိုးလျှင် အချိန်ကြာမြင့်နိုင်သဖြင့် မိမိ နိုင်ငံကူးလက်မှတ် သက်တမ်းကျန်ရှိမှု နှင့် ဗီဇာသက်တမ်း ကျန်ရှိမှုတို့အပေါ် ကိုယ်တိုင်ချိန်ဆ သုံးသပ်ကာ နိုင်ငံကူးလက်မှတ်ကို သက်တမ်းကျန်ရှိမှု ၆ လ အတွင်း သက်တမ်းတိုးရမည်ဖြစ်ကြောင်း သိရသည်။
“ အခု ကျွန်မတို့ ကိုယ်တိုင်သက်တမ်းသွားတိုးတာတောင် မရတော့ဘူး။ ပွဲစားကို ပိုက်ဆံပေးပြီး သက်တမ်းတိုးသွားရတာ။ ထိုင်းဘတ် (၆) ထောင်လောက်တော့ ကုန်တယ်။ ကိုယ်တိုင်သွားတိုးရင်တော့ အဲ့လောက်မကုန်ဘူး။ ကိုယ်တိုင်သွားရင်လည်း သူတို့က ဟိုရက်ချိန်းလိုက်၊ ဒီရက် ချိန်းလိုက်နဲ့ မလုပ်ပေးတော့ဘူး “ ဟု (PV) အမျိုးအစား ကိုင်ဆောင်သူ အမျိုးသမီးတစ်ဦးက ပြောသည်။
စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတွင် နိုင်ငံရေး၊ စီးပွားရေး၊ ပညာရေး နှင့် အလုပ်အကိုင် အခွင့်အလမ်းများဟာ အဆမတန် ကျဆင်းသွားခဲ့သောကြောင့် ပြည်သူများ နည်းလမ်းစုံ ပြည်ပ ထွက်ခွာလာခဲ့သည်။
