Monday, July 22, 2024

တောင်ကြီးမြို့ ရေရှားပါးလာ၊ ဒေသခံများ အခက်ခဲကြုံ

Must read

သျှမ်းပြည် တောင်ကြီးခရိုင် တောင်ကြီးမြို့တွင် နွေရာသီ ရေရှားပါးသည့် ပြဿနာဖြစ်လာပြီး ဒေသခံများ အခက်အခဲ ကြုံနေရကြောင်း စုံစမ်း သိရှိရသည်။

တောင်ကြီး မြကန်သာ

တောင်ကြီးမြို့ ယခုနွေရာသီကဲ့သို့ ရေရှားပါး ပြဿနာ နှင့် ကြုံတွေ့နေရပြီး ရေ ထော်လာဂျီတစ်စီး (၆ ပီပါ) ကို ၁၅,၀၀၀ ကျပ်အထိ ဝယ်သုံးနေရကြောင်း တောင်ကြီးမြို့ခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ ကျွန်မတို့ မြို့က နည်းနည်းအေးချမ်းတဲ့ တောင်ကြီးမြို့ကြီး ဖြစ်တာတောင် တအားပူတယ်။ ရေကလည်း ရှားတယ်၊ ဝယ်သုံးရတယ်။ အရင်နှစ်က ထော်လာဂျီကား တစ်စီး ( ၆ ပီပါ ) ကို ၅,၀၀၀ ကျပ်နဲ့ ဝယ်သုံးရတာ။ အခုနှစ် ထော်လာဂျီကားတစ်စီးကို ၉,၀၀၀ ကျပ်တဲ့ တစ်ဝက်လောက် ဈေးတက်သွားပြီ။ တချို့ ကုန်းပေါ်မှာရှိတဲ့ ရပ်ကွက်ဆိုရင် ကျပ် (၁၂,၀၀၀) ကနေ (၁၅,၀၀၀) ထိပေးပြီး ဝယ်သုံးရတယ် “ ဟု ၎င်းက ပြောသည်။

အဆိုပါ ရေရှားပါးမှုကြောင့် ရေကိုဝယ်သုံးရသော်လည်း ရေဝယ်သုံးသူ ပိုများလာသည့်အတွက်ကြောင့် တိုကင်နံပါတ် စောင့်ဆိုင်းရကြောင်းလည်း ၎င်းက ဆက်ပြောသည်။

ထို့အပြင် တောင်ကြီးမြို့ပေါ်သို့ ရေဖြန့်ဖြူးနေသည့် ကားသမားများသည် တစ်နေ့လျှင် အများဆုံး ၃၀ ကြိမ်ထိ ရေဖြန့်ဖြူးနိုင်ကြောင်း သိရသည်။

“တစ်နေ့ကို အများဆုံး ၃၀ ကြိမ်လောက် ပို့နိုင်တယ်။ နံနက် ၄ နာရီကတည်းကစပြီး ကားနဲ့ရေသွားသယ်ပြီး ပို့ရတယ် ည ၁၀ နာရီအထိပဲ။ တစ်ခါတလေ တစ်နေ့ကို ၃၅ ကြိမ်လောက် ပို့ရတယ်။ တချို့ နေ့လယ်အချိန် လာပို့ဖို့ပြောတာ တောင်မရဘူး။ နောက်နေ့ထပ်စောင့်ရတာ၊ တိုကင်ယူရတယ်။ ကြိုပြီးတော့ မှာထားမှရတာ “ ဟု တောင်ကြီးမြို့ပေါ်တွင် ရေဖြန့်ဖြူးနေသည့် ကားသမားတစ်ဦးက ပြောသည်။

တဖက်မှာလည်း မီးပုံမှန်ရရှိမှု မရှိသဖြင့် အချို့ ပြည်သူများသည် ရေမတင်နိုင်ကာ ရေဝယ်သုံးနေရသည့် အခြေအနေထိ ရင်ဆိုင်နေရသည်။

ထို့အပြင် တောင်ကြီးမြို့ကဲ့သို့ အလားတူ ဆီဆိုင်မြို့နယ်၊ ပင်လောင်းမြို့နယ်တွင်လည်း နွေရာသီ ကာလသို့ ရောက်တိုင်း ရေရှားပြဿနာ နှင့် နှစ်စဉ်နှစ်တိုင်း ကြုံတွေ့နေရကြောင်း သိရသည်။

Leave a Comments

- Advertisement -spot_img

Latest article