သျှမ်းပြည် ကျောက်မဲခရိုင် နောင်ချိုမြို့နယ်တွင် စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF ပူးပေါင်းတပ်ဖွဲ့တို့ တိုက်ပွဲဆက်လက် ပြင်းထန်နေကြောင်း စုံစမ်းသိရသည်။
ပြီခဲ့သည့် (ဧပြီလ ၅ ရက်)မှ စ၍ နောင်ချိုမြို့နယ်အတွင်း စစ်ကောင်စီတပ်ဖွဲ့ နှင့် မန္တလေး ပြည်သူ့ကာကွယ်ရေး ပူးပေါင်းတပ်ဖွဲ့ MDY – PDF တို့ တိုက်ပွဲစတင်ဖြစ်ပွားခဲ့ရာ စစ်ကောင်စီမှ အင်အား အများအပြားသုံးပြီး တိုက်လေယာဉ်ဖြင့်လည်း ဗုံးကြဲ တိုက်ခိုက်ခဲ့ကြောင်း မန္တလေး ပြည်သူ့ကာကွယ်ရေးတပ်ဖွဲ့ (MDY-PDF) မှ တာဝန်ခံ တစ်ဦးက သျှမ်းသံတော်ဆင့် ကိုပြောသည်။
ယနေ့ (ဧပြီလ ၂၂ ရက်)အထိ နှစ်ဖက်တပ်ဖွဲ့၏ စစ်ရေးတင်းမာနေဆဲရှိသလို နောင်ချိုမြို့နယ်ရှိ ကျေးလက်ဒေသ၌ နေရာအတိတကျမရှိ တိုက်ပွဲဆက်လက် ဖြစ်ပွားနေသေးကြောင်း မန္တလေး ပြည်သူ့ကာကွယ်တပ်ဖွဲ့မှ တာဝန်ခံ တစ်ဦးက ပြောသည်။
“ တိုက်ပွဲကတော့ နောင်ချိုမြို့နယ် နေရာအတော်များများမှာ ဖြစ်နေတာဗျ။ တစ်နေရာထဲကို ပြောဖို့က ခက်ပါတယ်။ နောင်ချိုမြို့နယ်ထဲမှာဘဲ နေရာအနှံ့အပြားမှာ ဖြစ်နေတယ် “ ဟု ၎င်းက ပြောသည်။
အလားတူ ယနေ့ (ဧပြီ ၂၂) ရက် နံနက်ပိုင်းတွင် နောင်ချိုမြို့နယ် ငုက္ခလေးကျေးရွာအုပ်စုရှိ အနီးတဝိုက်တွင် တိုက်ပွဲဖြစ်ပွားခဲ့ကြောင်း စစ်ရှောင်ဒေသခံတစ်ဦးက ပြောသည်။
“ ငုက္ခလေးရွာဖက်နဲ့ နောင်ချိုမြို့အဝင် စစ်တပ်ဂိတ် တစ်ဂိတ်မှာ လာပစ်သွားတယ်လို့တော့ ကြားတယ်။ အခုဟာက ဟိုးအစကလို အကြာကြီးပစ်တဲ့ တိုက်ပွဲကြီး မဟုတ်ဘူး။ ဟိုခို၊ ဟိုခဲက ဖြစ်တဲ့ အကြာကြီးတိုက်ပွဲ မဟုတ်တော့ဘူး။ ဟိုဖက်က တပ်ဖွဲ့ငယ်ခွဲပြီး လာပစ်သွားတယ်ထင်သာပဲ။ ဘာဆိုလို့ အခုကဆက်တိုက်ကြီး မပစ်တော့ဘူး “ ဟု ၎င်းက ပြောသည်။
ထို့အပြင် နောင်ချိုမြို့နယ်အတွင်းမှာ တိုက်ပွဲဖြစ်ပွားမှုကြောင့် ကုန်းကြီး၊ ဟိုခဲ၊ ကုန်းညောင်၊ ရေဦးကြူကော်၊ နားနွဲ့၊ တော်မွန်း၊ အင်းမဟိုခို၊ ကုလားရွာ လွယ်ငင်းမှ ဒေသခံပြည်သူ စုစုပေါင်း (၁,၀၀၀) ကျော်သည် နေရပ်စွန့်ပြီး ထွက်ပြေးတိမ်းရှောင်နေရကြောင်း သိရသည်။
“ ဒါကတော့ တစ်နိုင်ငံလုံး အတိုင်းအတာနဲ့ ဒီလိုပဲပေါ့။ ဟိုနားပစ်လိုက်၊ ဒီနားပစ်လိုက်နဲ့ဆိုတော့ ကျနော်တို့လည်း စစ်ဘေးရှောင်နေရတယ်။ ကျနော်တို့ကြတော့လည်း ပြောင်းဖူးပို့နေတယ်။ အချိန်လေးရတုန်း စစ်ရှောင်ရင်း ရွာကိုပြန်တယ်။ ပြန်ရောက်ရင်ရှိတဲ့ ပြောင်းဖူးလေးကို ရောင်းတယ်။ စိုးရိမ်လားဆိုတော့လည်း ရိုးသွားပြီလေ စိုးရိမ်စိတ်လည်း မရှိတော့ဘူး “ ဟု ၎င်းစစ်ရှောင်တစ်ဦးက ထပ်လောင်းပြောသည်။
နောင်ချိုမြို့နယ်အတွင်း ဖြစ်ပွားသည့် အာဏာသိမ်း စစ်ကောင်စီ တပ်ဖွဲ့ နှင့် MDY PDF ပူးပေါင်း တပ်ဖွဲ့တို့ အကြား တိုက်ပွဲကြောင့် ကလေးငယ် အပါအဝင် အရပ်သား ၅ ဦးထက် မနည်း ထိခိုက် ဒဏ်ရာရရှိပြီး နေအိမ် (၂၀)ကျော် ပျက်စီးဆုံးရှုံးမှုရှိကြောင်း သိရသည်။
Leave a Comments