သျှမ်းပြည် လင်းခေးခရိုင် မောက်မယ်မြို့နယ် ကဒူးကြီး ဒေသအတွင်း တိုက်ပွဲဖြစ်ပွားမှုကြောင့် စစ်ရှောင် ထွက်ပြေးရသည့် ဒေသခံ ကလေးငယ်များ ရွာလုံးကျွတ်နီးပါး နှာစေးချောင်းဆိုးနေကြကြောင်း စုံစမ်းသိရသည်။
ပြီးခဲ့သည့် ဧပြီလ အစပိုင်းကာလ၌ မောက်မယ်မြို့နယ် ကဒူးကြီးဒေသ နားဟီးကျေးရွာအုပ်စုမှ နမ့်ပါတက်ရွာ အနီး RCSS/SSA နှင့် PNLO/PNLA က ထိတွေ့တိုက်ပွဲ ဖြစ်ပွားခဲ့မှုကြောင့် တောထဲသို့ စစ်ရှောင် ထွက်ပြေးရသည့် ဒေသခံ ကလေးငယ်များသည် ရွာလုံးကျွတ် နှာစေးချောင်းဆိုး၊ ဖျားနာမှု ကြုံနေကြောင်း သိရသည်။
“တောထဲကို အမိုးအကာမဲ့ စောင်တွေလည်း မရှိဘဲနဲ့ ၃ / ၄ ရက်လောက် စစ်ရှောင် ထွက်ပြေးရတာကြောင့် ထင်တယ်။ ကလေးငယ်တွေရော၊ ကိုယ်ခံအားနည်းတဲ့ လူကြီးတွေရော ဖျားနာနေကြတာ၊ အခု ရွာထဲကို ပြန်ရောက်ပေမဲ့ ဆေးပေးခန်းက မလုံလောက်ဘူးဖြစ်နေတာ” ဟု ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
လက်ရှိတွင် နမ့်ပါတက်ကျေးရွာရှိ ကလေးငယ်များနှင့် ကိုယ်ခံအားနည်းသူများသည် နှာစေးချာင်းဆိုး၊ ဖျားနာကြသည့်အတွက် ရွာထဲရှိ ပအိုဝ်းဒေသ ကျန်းမာရေး လုပ်ငန်းဖော်ဆောင်ရေး ကော်မတီ (PHWC) ဆေးပေးခန်းမှ ဆေးများ နှင့် တိုင်းရင်းဆေးကုသနည်းများဖြင့် ကုသနေကြကြောင်း သိရသည်။
နှာစေး ချောင်းဆိုး ဖျားနှာဖြစ်ကြသည့် နမ့်ပါတက်ကျေးရွာသည် အိမ်ခြေ ၃၀ နီးပါး နှင့် လူဦးရေ ၁၅၀ နီးပါး ရှိနေပြီး ကလေးငယ် ရွာလုံးကျွတ်နီးပါးက ဖြစ်နေကြကြောင်း အထက်ပါ ဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
“ဖြစ်နေတာက ရွာလုံးကျွတ် နီးပါးဖြစ်နေတယ်၊ မြို့တက်ပြီး ကုဖို့လည်း တချို့က ငွေကြေးမတတ်နိုင်ဘူး၊ စစ်ရေး တင်းမာမှုလည်း ရှိနေသေးလို့ ဒေသအတွင်းမှာပဲ လက်လှမ်းမှီသလောက် ကုကြရတယ်” ဟု အထက်ပါ ဒေသခံ က သျှမ်းသံတော်ဆင့်ကို ပြောသည်။
လက်ရှိ အချိန်သည် RCSS/SSA နှင့် PNLO/PNLA တို့အကြား မြေပြင် ထိတွေ့တိုက်ပွဲ ငြိမ်သက်သွားသော်လည်း နှစ်ဖက်တပ်ဖွဲ့က စစ်ရေးတင်းမာမှုများ ရှိနေကြောင်း ဒေသခံများက ပြောသည်။
ပြီးခဲ့သည့် ဧပြီလ ၁၈ ရက်နေ့က RCSS/SSA နှင့် PNLO/PNLA တို့ စစ်ရေးတင်းမာမှု ရှိနေသည့် နမ့်ပါတက်ကျေးရွာအနီးတွင် မိုင်းနင်းမိပြီး ပေါက်ကွဲမှုကြောင့် ကလေးငယ်တစ်ဦး အပါအဝင် အရပ်သား (၃) ဦး ထိခိုက်ဒဏ်ရာရမှု ရှိခဲ့သည်။
ထိတွေ့ပစ်ခတ်မှု၊ စစ်ရေးတင်းမာမှုများရှိနေသည့် RCSS/SSA နှင့် PNLA/PNLO တပ်ဖွဲ့ (၂) ဖွဲ့သည် စစ်ကောင်စီ နှင့် ငြိမ်းချမ်းရေးဆွေးနွေးမှု ဆက်လက် ပြုလုပ်နေသေးသည့် အဖွဲ့များဖြစ်ကြသည့် တပ်ဖွဲ့များ ဖြစ်ကြသည်။
