သျှမ်းပြည် လွိုင်လင်ခရိုင် လဲချားမြို့နယ်အတွင်း ပစ်ခတ်သံများ နေ့စဥ်ကြားနေရသဖြင့် စစ်ရှောင်များလည်း ပြန်လည် ထွက်ပြေးတိမ်းရှောင်နေရကြောင်း စုံစမ်းသိရသည်။
ပြီးခဲ့သည့် (ဧပြီလ ၁၆ ရက်) မှစပြီး လဲချားမြို့ ကျောင်းခမ်းဘုန်းကြီးကျောင်းသို့ ခိုလှုံနေသည့် စစ်ရှောင်များသည် နေရပ်ရှိ လယ်ယာစပါး နှင့် ခြံကို ပြန်လည်သိမ်းယူရန် ပြန်သွားစဉ် နေ့စဉ်နီးပါး သေနတ်ဖောက်သံများ ကြားနေရသဖြင့် နေရပ်စွန့်ပြီး တစ်ဖန် ပြန်လည်ထွက်ပြေး တိမ်းရှောင်ခဲ့ရကြောင်း စစ်ရှောင်ကူညီသူ ဒေသခံတစ်ဦးက ပြောသည်။
အဆိုပါ လဲချားမြို့နယ်အတွင်းတွင် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တို့ ဖြစ်ပွားသည့် တိုက်ပွဲဖြစ်ကြောင်း သိရသည်။
“ သူတို့က မြို့နဲ့ နီးတော့ သူတို့ ရွာကို ပြန်သွားကြည့်တာ။ ရွာပြန်ပြီး ရွာအနီးအနားမှာက သေနတ်ဖောက်သံတွေ နေ့တိုင်းနီးပါး ကြားနေရတာ။ ဆက်တိုက်ပစ်နေတဲ့ အသံမျိုးတော့ မဟုတ်ဘူး။ တစ်ချက်တစ်ချက် သေနတ်ဖောက်သံတွေ ကြားရတာ “ ဟု ၎င်းက ပြောသည်။
အဆိုပါ သေနတ်ဖောက်သံများကြောင့် လဲချားမြို့နယ်ရှိ ဝါဆိုဘုန်းကြီးကျောင်း နှင့် ကျောင်းခမ်းဘုန်းကြီးကျောင်းတွင် စစ်ဘေးရှောင်အသစ်များ ထပ်မံ ရောက်ရှိလာနေကြောင်း သိရသည်။
လက်ရှိ ဝါဆိုဘုန်းကြီးကျောင်းတွင် စစ်ရှောင်ဦးရေ ၉၀ ဝန်းကျင်ရှိပြီး ကျောင်းခမ်းဘုန်းကြီးကျောင်းမှာ စစ်ရှောင်ဦးရေ ၄၁ ဦးရှိကာ စုစုပေါင်း စစ်ရှောင်ဦးရေ ၁၃၁ ဦးရှိပြီး၊ တိုက်ပွဲမှာ နေ့စဥ်ဆက်တိုက် ဖြစ်နေသဖြင့် စစ်ရှောင်ဦးရေ ပိုတိုးလာနိုင်သည်။
“စစ်ရှောင် ဦးရေကတော့ ဒီထက် တိုးလာနိုင်ချေရှိတယ်။ စားဝတ်နေရေး အခက်ခဲလည်း ရှိနေတယ်။ ရေရှည်အတွက်ဆိုရင်တော့ အလှူရှင်ကမရှိရင် တော်တော်ခက်ခဲနိုင်တယ် “ ဟု ၎င်းက ထပ်လောင်းပြောသည်။
အလားတူ ကျောင်းခမ်းဘုန်းကြီးကျောင်း အတွင်းသို့ ခိုလှုံနေသည့် စစ်ရှောင် အမျိုးသမီးတစ်ဦးကလည်း လက်ရှိမှာ နေရပ်ပြန်သွားဖို့အတွက် စိုးရိမ်နေရသလို နေရပ်တွင် ကျန်ရှိနေသည့် မိသားစုကိုလည်း စိုးရိမ်နေရကြောင်း ဆိုသည်။
“ အတူထွက်ပြေးလာနိုင်တော့ စိုးရိမ်စရာ မရှိပါဘူး။ အခုက ပြန်သွားဖို့လည်း စိုးရိမ်ရတယ်။ အိမ်မှာစောင့်နေတဲ့ သူကိုလည်း စိုးရိမ်ရတယ်၊ နောင်တရတယ်လေ။ အိမ်မှာက ကျွဲ၊ နွား၊ ဝက်တွေ ရှိတော့ သူတို့ကို အစာကျွေးဖို့ တစ်ယောက်ယောက်စောင့်မှ အဆင်ပြေတာလေ။ ကျမတော့ အခု အိမ်ပြန်ချင်နေပြီ ပြန်တော့ မပြန်ရဲသေးဘူး “ ဟု ၎င်း စစ်ရှောင်အမျိုးသမီးတစ်ဦးက ပြောသည်။
လဲချားမြို့နယ်တွင် ပြီးခဲ့သည့် (ဧပြီလ ၁၁ ရက်) က သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) နှင့် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည် တပ်မတော် (RCSS/SSA) တို့ ထိတွေ့တိုက်ပွဲကြောင့် ဒေသခံပြည်သူများ နေရပ်စွန့်ပြီး ထွက်ပြေးတိမ်းရှောင်နေရခြင်း ဖြစ်သည်။
လက်ရှိ သျှမ်းတပ် (၂) တပ် ဖြစ်ပွားသည့် တိုက်ပွဲကြောင့် သျှမ်းလူမျိုးများ စစ်ရှောင်နေရသည်မှာ အလွန်ပင် စိတ်မကောင်းဖြစ်ကြောင်း၊ သျှမ်းတပ် (၂) တပ် အချင်းချင်း အာဏာသိမ်း စစ်ကောင်စီ နှင့် စကားပြောဆိုနိုင်သော်လည်း အချင်းချင်းကြား စကားမပြောဆိုနိုင်ခြင်းမှာ အံ့သြဖွယ်ရာ ဖြစ်သည် ဟု လဲချားမြို့ မှ ဒေသခံများက ပြောသည်။
” သျှမ်းတပ် (၂) တပ်က အချင်းချင်း တိုက်နေတာ ကြာပြီ။ သူတို့ အချင်းချင်းတွေ့ဆုံညှိလို့ မရပေမယ့် အာဏာသိမ်းစစ်တပ်နဲ့တော့ ခဏခဏသွားတွေ့ပြီး ငြိမ်းချမ်းရေးလုပ်နေကြတာ။ အချင်းချင်းကြတော့ ငြိမ်းချမ်းရေး မလုပ်နိုင်ကြဘူး။ သျှမ်းလူထုပဲ ဒုက္ခရောက်နေရတာ” ဟု လဲချားမြို့ မှ အမည်မဖော်လိုသည့် အသက် ၄၅ နှစ်အရွယ် အမျိုးသားတစ်ဦးက သျှမ်းသံတော်ဆင့်ကိုပြောသည်။
သျှမ်းတပ် (၂) တပ်သည် စစ်အာဏာသိမ်းပြီးနောက်ပိုင်းမှ စစ်ကောင်စီ နှင့် နေပြည်တော်ထိ သွားရောက်တွေ့ဆုံပြီး ငြိမ်းချမ်းရေး ဆွေးနွေးနေသည့် အဖွဲ့ဖြစ်သည်။
