သျှမ်းပြည် လဲချားမြို့နယ် ဟိုဖိုင်ကျေးရွာ ဝါဆိုဘုန်းကြီးကျောင်းရှိ စစ်ရှောင်များသည် စားနပ်ရိက္ခာအတွက် အရေးပေါ် အကူညီလိုအပ်နေကြောင်း စုံစမ်းသိရှိရသည်။

ယမန်နေ့ ( ဧပြီ ၁၁ ရက်) နံနက်ပိုင်းက သျှမ်းတပ် (၂) တပ် တိုက်ပွဲကြောင့် လဲချားမြို့နယ် မတ်လန်းကျေးရွာအုပ်စု နမ့်မော်မွန်ရွာနှင့် ဝမ်နောင်ဟွမ်ရွာမှ ဒေသခံ ပြည်သူ ဦးရေ ၇၀ ကျော်သည် ထွက်ပြေးတိမ်းရှောင်ခဲ့ပြီး လက်ရှိမှာ ဟိုဖိုင်ကျေးရွာ ဝါဆိုဘုန်းကြီးကျောင်းတွင် ခိုလှုံနေထိုင်ကြရာ စားနပ်ရိက္ခာ လိုအပ်နေကြောင်း စစ်ရှောင်များကို ကူညီပေးနေသည့် ဒေသခံ တစ်ဦးက ပြောသည်။

“စားနပ်ရိက္ခာတွေတော့ နည်းနည်း လိုအပ်နေသေးတယ်ဗျ။ ထွက်ပြေးလာတုန်းက ဘာမှမယူလာရတော့ အဓိကတော့ စားနပ်ရိက္ခာတွေ လိုအပ်နေတယ် “ ဟု ၎င်းက ပြောသည်။

အဆိုပါ ထွက်ပြေးတိမ်းရှောင်လာသည့် စစ်ရှောင်ဦးရေ ၇၀ ကျော်ထဲမှ လူဦးရေ ၃၀ ကျော်ဟာ စိုးရိမ်စိတ်ဖြင့် နေရပ်သို့ ပြန်သွားကြပြီဖြစ်ကြောင်းလည်း သိရသည်။

“မနေ့ကတော့ စစ်ဘေးရှောင်ဦးရေ ၇၀ ကျော်လောက်ရှိတယ်။ ဒီနေ့မနက်မှ ပြန်သွားကြတာ။ စခန်းမှာ စစ်ရှောင်ဦးရေ ၄၀ လောက်ပဲ ကျန်တာ။ သူတို့ အိမ်မှာ အလုပ်ကိစ္စတွေ နဲ့ မပြီးမစီး ကာလမို့ ပြန်သွားကြတာ။ တချို့လည်း ခြံ၊ လယ်ယာ၊ ကြက်သွန်တွေ နုတ်ရမယ်ဆိုတော့ ပြန်သွားကြပြီ။ ဒီချိန်မှာ တိုက်ပွဲဖြစ်နေတော့ ပြန်သွားတော့လည်း စိုးတော့ စိုးရိမ်ရတယ် “ ဟု ၎င်းက ထပ်လောင်းပြောသည်။

ထို့အပြင် သျှမ်းတပ်ဖွဲ့ (၂) ဖွဲ့သည် လက်ရှိမှာ စစ်ရေးတင်းမာနေဆဲကြောင့် အချိန်မရွေး တိုက်ပွဲ ဖြစ်ပွားနိုင်ကြောင်းလည်း သိရသည်။

ပြီးခဲ့သည့် ဧပြီလ ၉ ရက်နေ့တွင်လည်း လဲချားမြို့နယ် စလိုင်းလွယ်ရွာအနီး၌ ထိတွေ့တိုက်ပွဲ ဖြစ်ပွားခဲ့ပြီး RCSS/SSA တပ်သား ၁ ဦးသေ၊ ၁ ဦးဒဏ်ရာရပြီး၊ SSPP/SSA မှ တပ်သား ၃ ဦး ထိခိုက်ဒဏ်ရာရရှိခဲ့သည်။

လက်ရှိ တိုက်ပွဲဖြစ်ပွားရာ မက်လန်းရွာတွင် စစ်ကောင်စီ နှင့် မန်ပန်ပြည်သူ့စစ် တပ်ဖွဲ့တို့လည်း ရှိနေကြောင်း သိရသည်။

သျှမ်းတပ် နှစ်တပ်သည် ပြီးခဲ့သည့် ဖေဖော်ဝါရီလ အတွင်းမှာလည်း ကွန်ဟိန်းမြို့နယ်အတွင်း၌ ထိတွေ့ပစ်ခတ်မှု ရှိခဲ့ကြသည်။