သျှမ်းပြည် ကျောက်မဲခရိုင် နောင်ချိုမြို့နယ်အတွင်း ၇ ရက် ဆက်တိုက် ဖြစ်ပွားသည့် တိုက်ပွဲတွင် နှစ်ဖက် တပ်ဖွဲ့ ထိခိုက်ကျဆုံးမှုများ ရှိသည့် အပြင် စစ်ရှောင်ပြည်သူများလည်း နေရပ်မပြန်နိုင်သေးကြောင်း စုံစမ်း သိရသည်။
ယနေ့ ဧပြီလ ၁၁ ရက်နေ့ နေ့လည်ပိုင်း အချိန်ထိ အာဏာသိမ်း စစ်ကောင်စီ တပ်ဖွဲ့သည် မန္တလေး ပြည်သူ့ကာကွယ်ရေး ပူးပေါင်း တပ်ဖွဲ့ MDY- PDF တို့ကို လေကြောင်းတိုက်ခိုက်မှုဖြင့် ထိုးစစ်ဆင် တိုက်ခိုက်ခဲ့ကြောင်း တိုက်ပွဲ အတွင်း ပါဝင်သည့် MDY PDF မှ အဖွဲ့ဝင် တစ်ဦးက သျှမ်းသံတော်ဆင့်ကို ပြောသည်။
“ထိတွေ့တိုက်ပွဲ ဖြစ်တဲ့ နေရာကတော့ နောင်ချိုမြို့နယ် အတွင်းက နေရာတော်တော်များများမှာ ဖြစ်နေပါတယ်။ ဒီနေ့လည်း ကျနော်တို့ ဗုံးကြဲတိုက်ခိုက် ခံရပါတယ်။ ဒီနေ့ အပါအဝင် စစ်ကောင်စီ ဘက်ကနေ ဗုံးကြဲ တိုက်ခိုက် တာ ၃ ရက်ရှိပြီ။ မြေပြင် ထိုးစစ်ဆင်မှုလည်း ပြင်းထန်စွာ လုပ်နေတယ်” ဟု MDY PDF က သျှမ်းသံတော်ဆင့်ကို ပြောသည်။
ပြီးခဲ့သည့် ဧပြီလ ၅ ရက်နေ့မှ စတင်ကာ ယနေ့ ၁၁ ရက်နေ့အထိ အာဏာသိမ်း စစ်ကောင်စီ တပ်ဖွဲ့ နှင့် PDF ပူးပေါင်း တပ်ဖွဲ့တို့အကြား ထိတွေ့ ပစ်ခတ်မှုသည် ၇ နှစ်ရက်တိုင် ဖြစ်ခဲ့ရာ နှစ်ဖက်တပ်ဖွဲ့မှ ထိခိုက်ကျဆုံး မှုများလည်း အများအပြားရှိနေကြောင်း သတင်းသိရသည်။
ယမန်နေ့ ဧပြီလ ၁၀ ရက်နေ့ ထိတွေ့တိုက်ပွဲအတွင်းတွင် မြေပြင်ထိတွေ့ ပစ်ခတ်မှုအရ စစ်ကောင်စီဘက်မှ ၃၀ ထက်မနည်း သေဆုံးပြီး MDY PDF ပူးပေါင်း တပ်ဖွဲ့ဘက်မှ ထိခိုက်ကျဆုံးမှုများလည်း ရှိနေကြောင်း MDY PDF က သျှမ်းသံတော်ဆင့်ကို ဆက်ပြောသည်။
“မနေ့က စစ်ကောင်စီတပ်သားအလောင်း ၃၀ လောက် ကျနော်တို့ တွေ့ခဲ့ရတယ်။ ကျနော်တို့ဘက်ကလည်း ထိခိုက်ကျဆုံး တာရှိနေပါတယ်။ တိတိကျကျ သတင်းထုတ်ပြန်တာတော့ မရှိသေးဘူး။ အခု ပြောနိုင်တာက နှစ်ဖက်စလုံး ထိခိုက်ကျဆုံးမှု ရှိနေပါတယ်” ဟု MDY PDF မှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။
လက်ရှိတွင် နောင်ချိုမြို့နယ် ကုန်းကြီးကျေးရွာအုပ်စု ဟိုခဲကျေးရွာ၊ ရေဦးကျေးရွာ၊ လွယ်ငင်းကျေးရွာ၊ ကုန်းညောင် ကျေးရွာ၊ ကုန်းကြီးကျေးရွာ၊ သံဘိုရွာ (ဝၢၼ်ႈသၢၼ်ႇၽူဝ်ႇ) အုပ်စုမှ သံဘိုရွာ (ဝၢၼ်ႈသၢၼ်ႇၽူဝ်ႇ)၊ ဘန့်ဘွေးကျေးရွာအုပ်စုမှ အင်းမရွာ ရှိဒေသခံများက နေအိမ်စွန့်ခွာကာ စစ်ရှောင် ထွက်ပြေးနေရသည်။
ဒေသအတွင်း စစ်ရေး တင်းမာမှုသည် ယနေ့ အချိန်ထိ ရှိနေသေးသည့်အတွက် စစ်ရှောင်များလည်း နေရပ်ပြန် နိုင်ခြင်း မပြုနိုင်သေးကြောင်းလည်း သိရသည်။
နောင်ချိုမြို့နယ်အတွင်း ဖြစ်ပွားသည့် အာဏာသိမ်း စစ်ကောင်စီ တပ်ဖွဲ့ နှင့် MDY PDF ပူးပေါင်း တပ်ဖွဲ့တို့ အကြား တိုက်ပွဲကြောင့် ကလေးငယ် အပါအဝင် အရပ်သား ၅ ဦးထက် မနည်း ထိခိုက် ပျက်စီးရသည့်အပြင် နေအိမ် အဆောက်အအုံများလည်း ထိခိုက်ပျက်စီးရသည်။
လက်ရှိတွင် နောင်ချိုဘက်မှ စစ်ရှောင်များအတွက် ငွေကြေး နှင့် စားနပ်ရိက္ခာ၊ အသုံးအဆောင် ပစ္စည်းများ အတွက် အကူအညီ လိုအပ်နေကြောင်းလည်း သိရသည်။
