သျှမ်းပြည် တောင်ကြီးခရိုင် ညောင်ရွှေမြို့နယ် စစ်ကောင်စီမှ လင်မယားနှစ်ဦးဖမ်းခံရပြီးနောက်ပိုင်း ဒေသခံလူငယ် ၄ ဦးကို ထပ်မံဖမ်းဆီးခဲ့ကြောင်း စုံစမ်းသိရှိရသည်။
ပြီးခဲ့သည့် (ဧပြီလ ၉ ရက်) ညနေ ၇ နာရီဝန်းကျင်တွင် ညောင်ရွှေမြို့နယ် အင်းလေးဒေသ အင်းပေါခုန်ရွာအတွင်း နေထိုင်သူ အသက် ၂၇ နှစ် လင်းစိုးဇင်ဆိုသူ လူငယ်တစ်ဦးကို လူမှုကွန်ရက်စာပေါ်၌ NLD အင်္ကျီဝတ်ပြီး ဘလိုဖိုင်ချိန်းထားသည်ဟု ဆိုကာ စစ်ကောင်စီတပ်ဖွဲ့မှ ဖမ်းဆီးသွားခဲ့ကြောင်း အင်းလေးဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“ သူကဖမ်းခံရမယ်လို့ မထင်ဘူး။ ခြံကနေပြန်ပြီး လယ်ထွန်တွေဆေးတဲ့အချိန်မှာ ရဲကော၊ ရဲမေတွေကော သူ့ကို လာဖမ်းတာ။ တကယ်လို့ သူကအဖမ်းမခံချင်ရင် သူ့မိန်းမကိုဖမ်းမယ်ဆိုပြီး ပြောတယ်။ သူ့မိန်းမက ဗိုက်ကြီးနေတာဆိုတော့ ဖမ်းမသွားဘူး။ သူ့ယောင်္ကျားကိုတော့ ဆန္ဒပြပုံတွေ၊ ပလိုဖိုင်မှာ NLD အင်္ကျီဝတ်ပြီးချိန်း တာတွေ့ဆိုပြီး ဖမ်းသွားတာ။ အဲ့ပုံကိုပြပြီး လာဖမ်းတာ “ ဟု ၎င်းအမျိုးသမီးတစ်ဦးက ပြောသည်။
အလားတူ ညောင်ရွှေမြို့နယ် အင်းခြံရွာမှ ဒေသခံ လူငယ် ၃ ဦးကိုလည်း စစ်ကောင်စီမှ ထပ်မံဖမ်းဆီး သွားခဲ့ ကြောင်း သိရသည်။
“ အင်းခြံက အရင်ကတစ်ယောက် အဖမ်းခံရချိန်မှာ သိန်း (၁၀၀) နဲ့ ပြန်ရွှေးခဲ့ရတာ။ အခုက ထပ်ပြီး ဖမ်းခံ နေရတာ။ အခု သူတို့ကို ဘာကြောင့်ဖမ်းသွားတာလဲတော့ သေချာမသိရဘူး။ သူတို့က ပိုက်ဆံပေး နိုင်မယ့်သူကို ရွှေးပြီး ဖမ်းနေတာ “ ဟု ၎င်းက ထပ်လောင်းပြောသည်။
အဆိုပါ ဖမ်းခံရသည့် ဒေသခံ လူငယ် ၄ ဦးကို လက်ရှိမှာ နန်းပန်ရဲစခန်းတွင် ချုပ်နှောင်ထားခဲ့ပြီး ၎င်းရဲစခန်းမှာလည်း အလားတူ ဖမ်းဆီးခံထားရသူ လူငယ် ၈ ဦးခန့် ရှိနေကြောင်းလည်း သိရသည်။
ထို့အပြင် နိုင်ငံရေးကြောင်းနှင့် ပတ်သက်ပြီး ဆန္ဒပြသူများ၊ NUG ထောက်ခံသူများနှင့် NLD အင်္ကျီဝတ်ပြီး ပလိုဖိုင်တင်ထားသူများကို စစ်ကောင်စီတပ်ဖွဲ့မှ လိုက်လံဖမ်းဆီးနေခြင်းသည် လုံခြုံရေးအတွက် အထူးစိုးရိမ်နေရကြောင်း နောက်ထပ်အင်းလေးဒေသခံ အမျိုးသမီးတစ်ဦးက ပြောသည်။
“အဲ့လိုမျိုး ဆန္ဒပြအချိန်တုန်းက သူသူ၊ ကိုယ်ကိုယ် NLD ဝတ်စုံ၊ NUG ဝတ်စုံတွေ ဝတ်ကြတယ်။ ပြီးတော့ ဆန္ဒပြတုန်းကလည်း အင်းထဲကလူ တော်တော်များများကလည်း ဆန္ဒပြကြတယ်။ အဲ့မှာ ကိုယ်တွေရောပါတယ်။ အများကောပါတယ်ဆိုတဲ့အခါကြတော့ အခုသူတို့ ပုံစံကြည့်ရတာက ပိုက်ဆံနည်းနည်းပေးပြီး ထုတ်နိုင်သူဆို ဖမ်းမယ်ဆိုတဲ့အခြေအနေဖြစ်နေတယ်။ အပြင်သွားရင် ဖုန်းတခုခုစစ်မှာ အရမ်းစိုးရိမ်ရတယ် “ ဟု ၎င်းက ပြောသည်။
ထို့အပြင် (ဧပြီ ၅ ရက်) နံနက်ပိုင်းတွင်လည်း ညောင်ရွှေမြို့ မိုင်းလီ (၅) ရပ်ကွက်နေ လင်မယားနှစ်ဦးကို ဖောက်ခွဲရေးပစ္စည်းများ၊ လက်နက်ခဲယမ်းများနှင့်အတူ ဖမ်းဆီးရမိကြောင်းလည်း စစ်ကောင်စီမှ ထုတ်ပြန်ထားသည်။
Leave a Comments