သျှမ်းပြည် လွိုင်လင်ခရိုင် လဲချားမြို့နယ်အတွင်း ယနေ့ (ဧပြီ ၁၁) ရက် နံနက်ပိုင်းတွင် သျှမ်းတပ် (၂) တပ် တိုက်ပွဲကြောင့် ဒေသခံများ လဲချားမြို့ပေါ်သို့ စစ်ရှောင်လာရကြောင်း သတင်းရရှိသည်။

ယနေ့ ဧပြီလ ၁၁ ရက်နေ့ မနက်ပိုင်း ၁၀ နာရီဝန်းကျင်မှ စတင်ကာ လဲချားမြို့နယ် မက်လန်းကျေးရွာအနီး၌ သျှမ်းတပ် နှစ်တပ်ဖြစ်သည့် ရှမ်းပြည် တိုးတက်ရေးပါတီ၊ ရှမ်းပြည် တပ်မတော် (SSPP/SSA) နှင့် သျှမ်းပြည်ပြန်လည်ထူထောင်ရေး ကောင်စီ ၊ သျှမ်းပြည် တပ်မတော် RCSS/SSA ထိတွေ့တိုက်ပွဲ ဖြစ်ပွားပြီး ဒေသခံများက လဲချားမြို့ပေါ်သို့ စစ်ရှောင်ထွက်ပြေးရ ကြောင်း ဒေသခံများက ပြောသည်။

“ဒီနေ့မနက်မှာ ပစ်ခတ်သံတွေ စကြားရတယ်၊ RCSS/SSA နဲ့ SSPP/SSA က မက်လန်းရွာ အနီးမှာ ထိတွေ့မှု ဖြစ် တာလို့ သိရတယ်။ ဒေသခံတွေကတော့ စပါးတွေ၊ ဆန်တွေကို သိမ်းပြီး မြို့ပေါ်ကို စစ်ရှောင် ထွက်ပြေး ကြတယ်။ တချို့ကလည်း မြို့ပေါ်ရောက်နေပြီ။ တချို့လည်း ပစ္စည်းသိမ်းနေတုန်း” ဟု မက်လန်းရွာမှ အမည် မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

လက်ရှိအချိန်သည် ဒေသခံများ ကြက်သွန်စိုက်ခင်း သိမ်းနေကြချိန်လည်း ဖြစ်နေပြီး ပစ်ခတ်သံများကြားရသည့် အတွက် စိုက်ခင်းထဲ ရောက်နေကြသည့် ဒေသခံများက နေအိမ်သို့ အပြေးပြန်ကာ ပစ္စည်းသိမ်း နေကြရကြောင်း သိရသည်။

စစ်ရှောင်ထွက်ပြေးလာသူများသည် လဲချားမြို့ပေါ်ရှိ အမျိုးများ နေအိမ်ထံတွင် ဝင်ရောက်ခိုလှုံနေကြရခြင်း ဖြစ်ပြီး လက်ရှိ အချိန်ထိ ပစ်ခတ်သံများ ကြားနေရကြောင်းလည်း ဒေသခံများက ဆက်ပြောသည်။

“အခုချိန်ထိ ပစ်ခတ်သံတွေ ကြားနေရတုန်းပဲ။ စစ်ရှောင်ဦးရေ အတိအကျတော့ မသိရသေးဘူး။ တချို့ကလည်း ထွက်လာနေတုန်း တချို့လည်း မြို့ပေါ်က အမျိုးတွေ အသိတွေဆီ ရောက်လာတယ်” ဟု အထက်ပါ ပုဂ္ဂိုလ်က ဆက်ပြောသည်။

လက်ရှိတိုက်ပွဲဖြစ်ပွားရာ အနီးမှ ကျေးရွာများဖြစ်ကြသည့် မက်လန်းကျေးရွာ၊ မန်မွမ်းကျေးရွာ နှင့် ဝမ်ဆန်းကောင်းဝိုးလုံ (ဝၢၼ်ႈသၢၼ်းဝူဝ်းလူင်) ကျေးရွာတို့မှ ဒေသခံများ စစ်ရှောင်ထွက်ပြေး ရကြောင်းသိရသည်။

ယင်းကဲ့သို့ သျှမ်းတပ်နှစ်တပ်မှ ထိတွေ့တိုက်ပွဲ ဖြစ်ပွားနေခြင်းသည် သျှမ်းပြည်သူ လူထုများသာ ဒုက္ခရောက် ရသည့် အတွက် တိုက်ပွဲ မဖြစ်ပွားစေလိုကြောင်းလည်း ဒေသခံများက ပြောဆိုနေကြသည်။

“အခုလိုမျိုး သျှမ်းတပ်ဖွဲ့ အချင်းချင်းက တိုက်ပွဲဖြစ်ပေမဲ့လည်း ခံရတဲ့ သူတွေကျတော့ ကျနော်တို့ ပြည်သူတွေ ဖြစ်တယ်၊ စစ်ရှောင်သွားရတယ်၊ လုပ်ငန်းခွင်တွေ ဆုံးရှုံးရတယ်၊ တပ်ဖွဲ့အချင်းချင်း စကားတွေလည်း နားလည် သဘောပေါက်ကြတာပဲ ၊ တွေ့ဆုံဆွေးနွေးခြင်းပဲ ဖြစ်စေချင်တယ်၊ တိုက်ပွဲကို မရှိစေချင်တော့ဘူး” ဟု လည်း လဲချားမှ အသက် (၅၀) ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။

ထို ထိတွေ့တိုက်ပွဲ ဖြစ်ပွားခြင်း နှင့် ပတ်သက်ပြီး သျှမ်းတပ် နှစ်တပ်၏ ပြောရေးဆိုခွင့်များကို သျှမ်းသံတော်ဆင့်မှ ဖုန်းဖြင့် အကြိမ်ကြိမ်ဆက်သွယ်သော်လည်း ဖုန်းလက်ခံ ဖြေကြားခြင်း မရှိပေ။

ပြီးခဲ့သည့် ဧပြီလ ၉ ရက်နေ့တွင်လည်း လဲချားမြို့နယ် စလိုင်းလွယ်ရွာအနီး၌ ထိတွေ့တိုက်ပွဲ ဖြစ်ပွားခဲ့ပြီး RCSS/SSA တပ်သား ၁ ဦးသေ၊ ၁ ဦးဒဏ်ရာရပြီး၊ SSPP/SSA မှ တပ်သား ၃ ဦး ထိခိုက်ဒဏ်ရာရ ခဲ့သည့် တိုက်ပွဲ ဖြစ်ပွားခဲ့သည်။

လက်ရှိ တိုက်ပွဲဖြစ်ပွားရာ မက်လန်းရွာ တွင် စစ်ကောင်စီ နှင့် မန်ပန်ပြည်သူ့စစ် တပ်ဖွဲ့တို့လည်း ရှိနေကြောင်း သိရသည်။
သျှမ်းတပ် နှစ်တပ်သည် ပြီးခဲ့သည့် ဖေဖော်ဝါရီလ အတွင်းမှာလည်း ကွန်ဟိန်းမြို့နယ်အတွင်း၌ ထိတွေ့ပစ်ခတ်မှု ရှိခဲ့ကြသည်။