သျှမ်းပြည် လွိုင်လင်ခရိုင် လဲချားမြို့နယ်အတွင်းတွင် ရှမ်းပြည် တိုးတက်ရေးပါတီ၊ ရှမ်းပြည် တပ်မတော် SSPP/SSA နှင့် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည် တပ်မတော် RCSS/ SSA တို့ယနေ့ (ဧပြီ ၉) ရက် နံနက်ပိုင်းတွင် ထိတွေ့ တိုက်ပွဲ ဖြစ်ပွားကြောင်း စုံစမ်းသိရသည်။
ယနေ့ (ဧပြီ ၉) ရက် နံနက်ပိုင်း တွင် လဲချားမြို့နယ်၊ စလိုင်းလွယ်ရွာ အနီး၌ သျှမ်းတပ်နှစ်တပ် ဖြစ်ကြသည့် SSPP/SSA နှင့် RCSS/SSA တို့က ထိတွေ့ပစ်ခတ်မှု ဖြစ်ခဲ့ကြောင်း ဖြစ်စဥ်ကို သိရှိသူ နယ်မြေ တာဝန်ခံတစ်ဦးက သျှမ်းသံတော်ဆင့်ကို ပြောသည်။
“ပစ်ခတ်မှုကတော့ မကြာဘူး၊ ၁၀ မိနစ်လောက်ပဲ အသံတွေ ထွက်လာတယ်၊ ပြီးတော့ ပြန်တိတ်သွားတယ်၊ နှစ်ဖက်က ထိခိုက်ကျဆုံးမှုတွေ ရှိတယ်လို့ သိရတယ်၊ လူအင်အားအများကြီးနဲ့ ပစ်ကြတာမျိုးတော့ မဟုတ်ဘူး၊ သွားရင်းလာရင်းနဲ့ ပစ်ကြတာလား ၊ ချောင်းပစ်ကြတာလားတော့ ကျနော် မပြောတတ်ဘူး” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။
အဆိုပါ ထိတွေ့ပစ်ခတ်မှုကြောင့် SSPP/SSA တပ်သား (၃) ဦး ထိခိုက်ဒဏ်ရာရပြီး၊ RCSS/SSA တပ်သား တစ်ဦးသေ၊ တစ်ဦး အရှင်ဖမ်းမိထားကြောင်း သတင်းများထွက်ပေါ်လာသော်လည်း သျှမ်းသံတော်ဆင့်မှ သီးခြား အတည်ပြုနိုင်ခြင်း မရှိသေးပေ။
ယင်းကဲ့သို့ ထိတွေ့ ပစ်ခတ်မှု ဖြစ်ပွားခြင်း နှင့် ပတ်သက်ပြီး ဖြစ်စဥ်အသေးစိတ် မေးမြန်းသိရှိနိုင်ရန်အတွက် သျှမ်းတပ် နှစ်တပ်၏ ပြောရေးဆိုခွင့်ထံ သျှမ်းသံတော်ဆင့်မှ ဖုန်းဖြင့် အကြိမ်ကြိမ် ဆက်သွယ်ခဲ့သော်လည်း ဖုန်းလက်ခံ ဖြေကြားခြင်း မရှိပေ။
RCSS/SSA တပ်ဖွဲ့သည် ပြီးခဲ့သည့် မတ်လကုန်ပိုင်းနှင့် ဧပြီလ ပထမပတ် အတွင်းမှာလည်း မောက်မယ်မြို့နယ် ၊ ကဒူးကြီး ဒေသအတွင်း၌ PNLO/PNLA တပ်ဖွဲ့နှင့်လည်း ထိတွေ့ ပစ်ခတ်မှု ရှိခဲ့သည်။
သျှမ်းတပ် နှစ်တပ်သည် ပြီးခဲ့သည့် ဖေဖော်ဝါရီလ အတွင်းမှာလည်း ကွန်ဟိန်းမြို့နယ်အတွင်း၌ ထိတွေ့ပစ်ခတ်မှု ရှိခဲ့ကြသည်။
၂၀၂၃ ခုနှစ်အတွင်း သျှမ်းတပ်နှစ်တပ်၏ ထိတွေ့တိုက်ပွဲသည် ကွန်ဟိန်းမြို့နယ်အတွင်းမှ ပထမဆုံးအကြိမ် ဖြစ်နေပြီး ၊ ယခု လဲချားမြို့အနီး ထိတွေ့ ပစ်ခတ်မှုသည် ဒုတိယ အကြိမ် ဖြစ်သည်။
