သျှမ်းပြည် လားရှိုးခရိုင် လားရှိုးမြို့နယ်အတွင်းရှိ စစ်ကောင်စီ စစ်ဆေးရေးဂိတ်တွင် ယာဉ်ထိန်းရဲများ ငွေအဆမတန် တောင်းခံမှုကြောင့် ခရီးသွားပြည်သူများ အခက်ကြုံတွေ့နေရကြောင်း စုံစမ်းသိရှိရသည်။

စစ်တပ်က အာဏာသိမ်းပြီးနောက်ပိုင်း လားရှိုးမြို့ အဝင်၊ အထွက် နှင့် နမ္မတူသွားလမ်း၊ သိန္နီကြားရှိ ရေပူဂိတ် စသည်ဖြင့် စစ်ကောင်စီ စစ်ဆေးရေးဂိတ်တိုင်းမှာ စစ်ကောင်စီ နှင့် ယာဉ်ထိန်းရဲများက မှတ်ပုံတင် နှင့် ယာဉ်လိုင်စင်များကို အကြောင်းပြပြီး အဆမတန် ငွေတောင်းခံနေကြောင်း လားရှိုးမြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ လားရှိုး အထွက်တိုးဂိတ်မှာ မှတ်ပုံတင်မပါရင် မော်တော်ပီကယ်တွေ တအားရစ်တယ်။ သူတို့က လုပ်စားနေကြတာ။ ရရင်ရသလိုပဲ တောင်းတယ်။ ကျွန်မကတော့ လေးသောင်းပေးလိုက်ရတယ်။ မပေးရင်လည်း ကားသိမ်းမယ်ဆိုပြီး ခြိမ်းခြောက်တယ်။ သူတို့ကို ကြောက်နေရတာနဲ့ တောင်းသလောက် ပေးခဲ့ရတာ “ ဟု ၎င်း အမျိုးသမီးတစ်ဦးက ပြောသည်။

အဆိုပါ ယာဉ်ထိန်းရဲများ ငွေအဆမတန် တောင်းခံမှုကြောင့် ခရီးသွား ပြည်သူများအနေဖြင့် ငွေရေးကြေးရေး အခက်အခဲရှိသည့်အပြင် ခရီးသွားရာမှာလည်း စိတ်ပျက်ကြောင်း သိရသည်။

အလားတူ လားရှိုးမြို့ ဒေသခံ အသက် ၃၀ နှစ် အမျိုးသမီးတစ်ဦးက “ လူလိုင်စင်၊ ယာဉ်လိုင်စင်၊ ဦးထုပ် အဲ့ဒါတွေ စစ်တယ်။ လားရှိုးတက္ကသိုလ် အကျော်မှာ နေကြလေ့ရှိတယ်။ လူ နဲ့ ယာဉ်ကိုကြည့်ပြီး ဈေးကတော့ သူတို့ ပါးစပ်ထဲမှာဘဲ တောင်းသလောက်ပေးရတယ်။ မပေးရင် ယာဉ်သိမ်းမယ်ဆိုတော့ ရအောင်တော့ ကြိုးစားပြီး ပေးကြရတာများတယ်။ ပြန်ဝယ်ဖို့က ဈေးအရမ်းကြီးလို့လေ “ ဟု ၎င်းက ထပ်လောင်းပြောသည်။

ထို့အပြင် စစ်တပ်အာဏာသိမ်းပြီး ၂ နှစ်ကျော် ကာလအတွင်း သျှမ်းပြည်တစ်ဝှမ်းလုံးရှိ ပြည်ထောင်စု ကားလမ်းမပေါ်တွင် စစ်ကောင်စီတပ်ဖွဲ့မှ စစ်ဆေးရေး ဂိတ်တိုးချဲ့ ဆောက်လုပ်ပြီး ခရီးသွား ပြည်သူများကို ငွေအဆမတန် တောင်းခံနေလျက်ရှိကြောင်း သိရသည်။