သျှမ်းပြည် ကျောက်မဲခရိုင် နောင်ချိုမြို့နယ်အတွင်း အာဏာသိမ်း စစ်ကောင်စီ တပ်ဖွဲ့နှင့် ပြည်သူ့ ကာကွယ်ရေး ပူးပေါင်းတပ်ဖွဲ့တို့၏ တိုက်ပွဲပြင်းထန်မှုကြောင့် စစ်ရှောင်ထွက်ပြေးရသည့် ပြည်သူများ အချို့သည် အိမ်ခန်းငှားခ တစ်လလျှင် ငါးသောင်းကျပ်ဖြင့် ငှားရမ်းနေရကြောင်း စုံစမ်းသိရသည်။

ပြီးခဲ့သည့် ဧပြီလ ၆ ရက်မှ စတင်ကာ ယနေ့အထိ ထိတွေ့တိုက်ပွဲပြင်းထန်နေသည့် စစ်ကောင်စီ တပ်ဖွဲ့ နှင့် PDF ပူးပေါင်းတပ်ဖွဲ့တို့၏ တိုက်ပွဲကြောင့် နောင်ချိုမြို့နယ်မှ ကုန်းကြီးကျေးရွာအုပ်စု၊ သံဘိုရွာ (ဝၢၼ်ႈသၢၼ်ႇၽူဝ်ႇ) အုပ်စုမှ သံဘိုရွာ (ဝၢၼ်ႈသၢၼ်ႇၽူဝ်ႇ)နှင့် ဘန့်ဘွေးကျေးရွာအုပ်စုတို့မှ ဒေသခံများ စစ်ရှောင်ထွက်ပြေးရကြောင်း သိရသည်။

စစ်ရှောင် ထွက်ပြေးရသည့် ပြည်သူများသည် နောင်ချိုမြို့ပေါ် နှင့် ပြင်ဦးလွင် ဘက်ရှိ အမျိုးများဆီသို့ သော်လည်း ကောင်း၊ အမျိုးမရှိသူများက အိမ်ငှားနေကြကြောင်းကို ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“နောင်ချိုမြို့ပေါ်ဘက်ကို ပြေးကြတာများတယ်၊ ပြင်ဦးလွင် အမျိုးရှိတဲ့သူကလည်း ပြင်ဦးလွင်ဘက်ကို ပြေးသွားကြ တယ်၊ အမျိုးအိမ်တွေ မရှိတဲ့သူတွေကြတော့ တစ်လကို ငါးသောင်းကျပ်နဲ့ စုပြီး အိမ်ငှားနေကြတာပေါ့၊ အနီး ရွာတွေမှာလည်း စစ်သားတွေ၊ PDF တွေ ရှိနေလို့ မြို့ပေါ်ကိုပဲ ပြေးကြတာ” ဟု အမည်မဖော်လိုသူ ဒေသခံ အမျိုးသား တစ်ဦး က သျှမ်းသံတော်ဆင့်ကို ပြောသည်။

တိုက်ပွဲအတွင်းတွင် စစ်ကောင်စီဘက်မှ စက်သေနတ်များအပြင် လက်နက်ကြီး ၁၂၀ မမ ဖြင့်လည်း အဆက် မပြတ် ပစ်ခတ်တိုက်ခိုက်နေပြီး အဆိုပါ လက်နက်ကြီးကြောင့် ပြည်သူပိုင် ကြံခင်းများ၊ နေအိမ်များ ထိမှန် ပျက်စီးရကြောင်းလည်း ဒေသခံများက ပြောသည်။

ယမန်နေ့ ဧပြီလ ၅ ရက်နေ့တွင်လည်း နောင်ချိုမြို့နယ် သံဘိုကျေးရွာအုပ်စု (ဝၢၼ်ႈသၢၼ်ႇၽူဝ်ႇ) အတွင်း စစ်ကောင်စီ၏ တပ်မ ၁၀၁ နှင့် ၂၅၃ ပူးပေါင်းပြီး PDF ပူးပေါင်းတပ်ဖွဲ့တို့ကို ပြင်းထန်စွာ ထိုးစစ်ဆင် တိုက်ခိုက် နေကြောင်း သိရသည်။

ယင်းကဲ့သို့ ထိုးစစ်ဆင် တိုက်ခိုက်မှုကြောင့် အနီးနားရှိ ကြံခင်းများ မီးလောင်ပျက်စီးခြင်း၊ နေအိမ် အဆောက် အအုံများ လက်နက်ကြီးထိမှန်ပျက်စီးခြင်းတို့ ရှိနေကြောင်းလည်း အထက်ပါ အမျိုးသားက သျှမ်းသံတော်ဆင့် ကို ပြောသည်။

“မနေ့က တိုက်ပွဲက မနက် ၁၁ နာရီကနေ ညနေ ၅ နာရီဝန်းကျင်အထိ ပစ်ခတ်သံတွေ ကြားရတယ်၊ ညမှာတော့ စစ်ကောင်စီက ၁၂၀ မမ နဲ့ ဟိုခဲရွာဘက်ကို လှမ်းပစ်သွားတာ၊
နေအိမ်ထိတယ်၊ ကြံခင်းတွေလည်း မီးလောင် ပျက်စီးတယ်၊ အခုတိုက်ပွဲက ပါခီးရွာဘက်ကို နီးလာပြီ၊ ဒေသခံတွေလည်း ထွက်ပြေးကုန်ကြပြီ” ဟု အထက်ပါ ပုဂ္ဂိုလ်က ဆိုသည်။

ဧပြီလ ၆ ရက်နေ့မှ စတင်ပြီး ပြင်ဦးလွင် – နောင်ချို – မိုးမိတ် ကားလမ်းမကြီး တစ်လျှောက်တွင် စစ်ကောင်စီ တပ်ဖွဲ့က စစ်ဆေးမှု တင်းကြပ်စွာ ပြုလုပ်နေကြောင်းလည်း ဒေသခံများကပြောသည်။

လက်ရှိအချိန် စစ်ရှောင်ထွက်ပြေးရသည့် လူဦးရေကို သျှမ်းသံတော်ဆင့်မှ ဆက်လက် စုံစမ်းနေဆဲ ဖြစ်သည်။

ယခုဖြစ်ပွားနေသည့် နောင်ချိုမြို့နယ်အတွင်း အာဏာသိမ်း စစ်ကောင်စီ တပ်ဖွဲ့ နှင့် ပြည်သူ့ကာကွယ်ရေး ပူးပေါင်း တပ်ဖွဲ့တို့ အကြား ထိတွေ့တိုက်ပွဲကြောင့် ကလေးငယ် နှစ်ဦး သေဆုံးရသည့် အပြင် အရပ်သားများလည်း ထိခိုက် ဒဏ်ရာရမှု ရှိနေသည်။

ပြီးခဲ့သည့် ဧပြီလ ၃ ရက်နေ့ မနက်ပိုင်းမှာလည်း နောင်ချိုမြို့နယ် ကုန်းညောင်ကျေးရွာမှ ကြံစိုက်ခင်း သွားသည့် ဒေသခံ အမျိုးသား တစ်ဦးသည် မြေမြှုပ်မိုင်း နင်းမိခဲ့မှု ရှိခဲ့သည်။

ပြီးခဲ့သည့် ဖေဖော်ဝါရီလ အတွင်းမှာလည်း နောင်ချိုမြို့နယ် အတွင်း အာဏာသိမ်း စစ်ကောင်စီ နှင့် ပြည်သူ့ကာကွယ်ရေး ပူးပေါင်းတပ်ဖွဲ့ တို့ အကြား ထိတွေ့တိုက်ပွဲ ပြင်းထန်စွာ ဖြစ်ပွားခဲ့ပြီး ဒေသခံ တစ်ဦးသည် စစ်ကောင်စီတို့၏ ပစ်သတ်မှု ခံရသည့် အပြင် ဒေသခံ ၅၀၀ ကျော်တို့ကလည်း စစ်ရှောင်ထွက်ပြေးခဲ့ရသည်။