သျှမ်းပြည် လွိုင်လင်ခရိုင် လဲချားမြို့ ပန်းခြံရှေ့တွင် ဈေးရောင်းချနေသည့် ပျံကျဈေးသည်များကို နေရာပြောင်းရွှေ့ ရောင်းချရသည့်အပေါ်ကို စည်ပင်သာယာရေးမှ တာဝန်ယူ ဖြေရှင်းစေလိုကြောင်း သတင်းရရှိသည်။

လာမည့် ဧပြီ ၇ ရက်တွင် ကျောင်းပန်တွင် ရှင်းလောင်းပွဲ ပြုလုပ်ရန်အတွက် ပန်းခြံရှေ့တွင် ဈေးရောင်းချနေသည့် ပျံကျဈေးသည်များကို ပွဲကန်ထရိုက်ဆွဲ သူက နေရာပြောင်းရွှေ့ရောင်းချ ခိုင်းကြောင်း သိရသည်။

“မနက်ဖန်ကျရင် ကျောင်းပန်နားက ပန်းခြံဘက်မှာ ရှင်လောင်းပွဲလုပ်မှာ။ အခု ကျမတို့က အဲ့ပန်းခြံနားမှာ ပျံကျဈေးရောင်းနေတာ။ အခုက ပွဲဖြစ်တော့ နေရာ‌ရွှေ့ခိုင်းနေတာ။ အဲ့လိုပြောင်းရွှေ့ခိုင်းတော့ ဈေးသည်တွေက အခက်ခဲဖြစ်ပါတယ်” ဟု ပျံကျဈေးသည်တစ်ဦးက ပြောသည်။

အဆိုပါ ပျံကျဈေးသည်များသည် ပွဲချိန်အတွင်း ပန်းခြံနားဈေးရောင်းချလိုပါက ၃ ရက်စာအတွက် ပွဲကန်ထရိုက် ဆွဲသူထံ ကျပ်ငွေ ၅ သောင်း ပေးရမည်ဖြစ်ကြောင်း ပျံကျဈေးသည်များက ပြောသည်။

“ပွဲကန်ထရိုက်ကတော့ နေရာမရွှေ့ချင်ဘူးဆိုရင်တော့ ဆိုင်ခန်းခ ၅ သောင်းပေးရမယ်တဲ့။ ပွဲ ၃ ရက်စာပေါ့။ ကျမတို့မှာ ဈေးရောင်းဖို့ နေရာက ရွှေ့ရဖို့က အရမ်းခက်ခဲပါတယ်။ ပြီးတော့ အခုလို ၅ သောင်းဆောင်ပြီး ဈေးရောင်းဖို့ဆိုလည်း ငွေရေးကြေးရေးက အခက်ခဲ ဖြစ်ပြန်တယ်” ဟု အထက်ပါ ပျံကျဈေးသည် ရောင်းချနေသူက ပြောသည်။

အဆိုပါ ကိစ္စ နှင့် ပတ်သက်ပြီး စည်ပင်သာယာရေးအနေဖြင့် တာဝန်ယူ ဖြေရှင်းပေးရန်အတွက် ပျံကျ ဈေးသည်များက ပြောသည်။

“ သက်ဆိုင်ရာ စည်ပင်ဝန်ထမ်း လူကြီးတွေက တာဝန်ယူမှု တာဝန်ခံမှုလည်း မရှိဘူး။ အဲ့ဒီ ပွဲရက်အတွင်းမှာ ပျံကျဈေးသည်တွေ အတွက် ဈေးရောင်းချဖို့အတွက် စည်ပင်ဝန်ထမ်းတွေ ပြည်သူတွေအပေါ် ဘယ်လို တာဝန်ယူပြီး လုပ်ဆောင်သွားမလဲဆိုတာ မသိဘူး။ ဒါကို ဖြေရှင်းစေချင်တယ်” ဟု ၎င်းကပြောသည်။

လဲချားမြို့ ပျံကျဈေးသည်များသည် ယခင်က ဆေးရုံရှေ့တွင် စျေးရောင်းချနေကြပြီး ကိုဗစ် -၁၉ ကြောင့် လက်ရှိ ကျောင်းပန် အနီး ပန်းခြံမှာ ပြောင်းရွှေ့ဖွင့်လှစ်ခဲ့ကြောင်း သိရသည်။