Friday, September 22, 2023

ညောင်ရွှေမြို့နယ် ဒေသခံ ၃ ဦးကို စစ်ကောင်စီမှ ထပ်မံဖမ်းဆီး

Must read

သျှမ်းပြည် တောင်ကြီးခရိုင် ညောင်ရွှေမြို့ရှိ ပြည်သူ ၃ ဦးကို စစ်ကောင်စီတပ်ဖွဲ့မှ ထပ်မံဖမ်းဆီးသွားခဲ့ကြောင်း သတင်းသိရှိရသည်။

ဖမ်းဆီးခံရသည့် ဇနီးမောင်နှံ

ယမန်နေ့ (ဧပြီလ ၅ ရက်) မနက်ပိုင်း ၁၀ နာရီခွဲ အချိန်၌ ညောင်ရွှေမြို့အတွင်း နေထိုင်သည့် အသက် ၄၀ နှစ်ဝန်းကျင် ကိုမျိုး ဆိုသူကို စစ်ကောင်စီတပ်ဖွဲ့မှ အိမ်စီးကား ၃ စီးဖြင့် နေအိမ်အတွင်းသို့ သေနတ်ပစ်ဖောက်ပြီး ဝင်ရောက်ဖမ်းဆီးခဲ့သည့်အပြင် ကို မျိုး၏ ဇနီးဖြစ်သူ နှင့် အစ်မဖြစ်သူကိုလည်း ထပ်မံ ဖမ်းဆီးသွားခဲ့ကြောင်း ညောင်ရွှေမြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“အိမ်စီးကား ၃ စီးနဲ့ အရပ်ဝတ်ပြီး ဝင်ဖမ်းတာ။ သူတို့ ဖမ်းတဲ့အချိန်မှာ ပြန်ခုခံလို့ဆိုပြီး ခြေထောက်ကိုပစ်ပြီး ဖမ်းသွားတာ။ သူ့မိသားစုတွေကိုလည်း စစ်ဆေးပြီး သူ့မိန်းမ နဲ့ သူ့အစ်မကိုလည်း ခေါ်သွားတယ် “ ဟု ၎င်း အမျိုးသမီးတစ်ဦးက ပြောသည်။

အဆိုပါ ပြည်သူ ၃ ဦးကို စစ်ကောင်စီမှ ဖမ်းဆီးသွားခဲ့ပြီးနောက် လက်ရှိမှာ ညောင်ရွှေမြို့ ရဲစခန်းတွင် ဖမ်းဆီးချုပ်နှောင်ထားကြောင်းလည်း သိရသည်။

ဖမ်းဆီးခံရသည့် အသက် ၄၀ နှစ်ဝန်းကျင် ကိုမျိုး ဆိုသူသည် ယခင်က ပြည်သူ့ကာကွယ်ရေးတပ်ဖွဲ့ PDF ၏ တပ်ဖွဲ့ဝင် တစ်ဦးဖြစ်ခဲ့ပြီး နောက်ပိုင်းတွင် ၎င်းတပ်ဖွဲ့မှ ခွဲထွက်လာပြီး ဂိမ်းဆိုင်ဖွင့်လှစ်ခဲ့ကာ ယခုလို ဖမ်းဆီးခြင်းခံရကြောင်း ညောင်ရွှေမြို့ဒေသခံတစ်ဦးက ပြောသည်။

“ သူကတော့ ကျမတို့ သိရသလောက် အရင်က PDF ထဲမှာလုပ်ဖူးတယ်။ လုပ်ပြီးနောက်ပိုင်းထွက်လာမှ ဂိမ်းဆိုင်ဖွင့်တာလို့ ကြားတယ် “ ဟု ၎င်း ဒေသခံတစ်ဦးက ထပ်လောင်းပြောသည်။

လက်ရှိမှာ ညောင်ရွှေမြို့နယ်အတွင်းရှိ လူငယ်များ၊ PDF နှင့် ဆက်စပ်မိသူများကို စစ်ကောင်စီတပ်ဖွဲ့မှ ရှာဖွေပြီး ဆက်တိုက်ဖမ်းဆီးနေရာ ပြည်သူများမှာလည်း လုံခြုံရေးအတွက် စိုးရိမ်နေရကြောင်း သိရသည်။

ထို့အပြင် ပြီးခဲ့သည့် (ဇန်နဝါရီ ၈ ရက်) တွင်လည်း ပြည်သူ့ကာကွယ်ရေးတပ်ဖွဲ့ PDF နှင့် ကူညီထောက်ပံ့သူများ၊ သတင်းပေးပို့သူနှင့် PDF ခေါင်းဆောင် အပါအဝင် (၁၂) ဦးကို ဖမ်းဆီးရမိကြောင်း စစ်ကောင်စီမှ ထုတ်ပြန်ခဲ့သည်။

Leave a Comments

- Advertisement -spot_img

Latest article