သျှမ်းပြည် မူဆယ်ခရိုင် နမ့်ခမ်းမြို့နယ်ရှိ နေဝန်းနီ စစ်ဘေးရှောင်စခန်းမှ လူငယ်များကို တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တပ်ဖွဲ့က တပ်သားသစ် အဖြစ် ဖမ်းဆီး ခေါ်ဆောင်သွားကြောင်း စုံစမ်းသိရသည်။
ယင်းကဲ့သို့ လူငယ်များ စစ်သားအဖြစ် ခေါ်ဆောင်သွားခြင်း မခံရခင် အချိန် ပြီးခဲ့သည့် မတ်လ (၂၀) ရက်နေ့ ည ၇ နာရီကျော် ဝန်းကျင်အချိန်၌ နေဝန်းနီ စခန်းအတွင်းရှိ ကျား/မ မရွေး သက်ကြီး ရွယ်အိုများကို TNLA ဖမ်းဆီး ခေါ်ဆောင်သွားသေးကြောင်း ဒေသခံများက သျှမ်းသံတော်ဆင့်ကို ပြောသည်။
“စစ်သားလုပ်ဖို့ စာရင်းပါတဲ့သူကို လာခေါ်တာ ဆိုပြီး အိမ်တွေကို လိုက်ရှာတယ်၊ ကလေးတွေက အလုပ်သွား လုပ်နေတယ်၊ကျောင်းသွားတက်နေတယ် ပြောလည်း မရဘူး၊ သက်ကြီး ရွယ်အိုတွေကို ဆွဲထုတ်ပြီး ဖမ်းခေါ်သွားတာ၊ လူငယ်တွေနဲ့ အစားထိုး လာလဲမှ ဒီလူတွေ လွှတ်မယ်ဆိုပြီး တော့လည်းပြောသွားတယ်” ဟု ဖြစ်စဥ်ကို သိရှိသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
TNLA တပ်ဖွဲ့မှ ဖမ်းဆီးခေါ်ဆောင်သွားသည့် နေဝန်းနီ စစ်ရှောင်စခန်းမှ သက်ကြီးရွယ်အိုများတွင် မ (၃) ဦး ၊ ကျား (၁၀) ဦး စုစုပေါင်း (၁၃) ဦးဖြစ်ပြီး အားလုံးသည် အသက် ၅၀ ကျော် နှင့် (၈၀) ကျော် ရှိသည့် သက်ကြီး ရွယ်အိုများဖြစ်ကြောင်းလည်း သိရသည်။
ယင်းကဲ့သို့ သက်ကြီးရွယ်အိုများကို ဖမ်းဆီးခေါ်ဆောင်သွားသည့်အတွက် ဆွေမျိုးများက လူငယ်များကို ပြန်ခေါ်ပြီး TNLA တပ်ဖွဲ့ထံ အစားထိုး သွားလဲခဲ့ရကြောင်း အထက်ပါ အမျိုးသမီးတစ်ဦးက သျှမ်းသံတော်ဆင့်ကို ဆက်ပြောသည်။
“လူစားထိုး လဲလှယ်ဖို့ လူငယ်ရှိတဲ့သူတွေကလည်း လူငယ်တွေကို ပြန်ခေါ်ပြီးတော့ သက်ကြီးရွယ်အိုတွေနဲ့ သွားလဲလှယ် ခဲ့ရတယ်၊ လူစားထိုး လဲလှယ်ဖို့ မရှိတဲ့သူကလည်း အဲ့အတိုင်း နေနေကြရတာပဲ၊ အခုက တချို့သက်ကြီးရွယ်အိုတွေ ပြန်လွှတ်လာပြီ၊ နောက်တစ်သုတ် ထပ်လာခေါ်မယ်လို့လည်း TNLA က ပြောထားတယ်” ဟု အထက်ပါ အမျိုးသမီးက ဆက်ဆိုသည်။
လက်ရှိတွင် ဖမ်းဆီးခေါ်ဆောင်သွားခံရသည့် သက်ကြီးရွယ်အို တချို့ ပြန်လွှတ်လာသော်လည်း အစားထိုးရန် လူမရှိသည့် တချို့သော သက်ကြီးပိုင်းများက TNLA တပ်ဖွဲ့တွင်သာ ဆက်လက် ကျန်ရှိနေကြောင်း သိရသည်။
သက်ကြီးရွယ်အိုများအစား လူစားထိုး သွားလဲလှယ်သည့် လူငယ်အများစုသည် စုစုပေါင်း (၁၀) ဦးရှိနေပြီး အသက် (၁၈) နှစ် နှင့် ၂၀ ကျော် လူငယ်များ ဖြစ်ကြကြောင်းလည်း သိရသည်။
ယခု တစ်ကြိမ်သည် နေဝန်းနီ စစ်ရှောင်စခန်းမှ စစ်ရှောင်များ အနေဖြင့် ပထမဆုံး အကြိမ် စစ်မှုထမ်းရခြင်းဖြစ်ကြောင်း စခန်းမှ အမည်မဖော်လိုသူ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“သူတို့ (TNLA) စခန်းထဲ ရောက်လာပြီး သက်ကြီးရွယ်အိုတွေကို လာခေါ်တဲ့ အချိန် ကျမတို့က နှလုံးရပ် မလို တောင် ဖြစ်ခဲ့တယ်၊ အရမ်းကြောက်တယ်လေ၊ ဒါက ကျမတို့ စစ်ရှောင်လာခဲ့တဲ့ (၁၀) နှစ်ကျော်အတွင်း ပထမဆုံး စစ်မှုထမ်းရတာပဲ” ဟု ၎င်းက ဆိုသည်။
ယင်းကဲ့သို့ စစ်ရှောင်စခန်းအတွင်းမှ ပြည်သူများကို စစ်သားသစ် ကောက်ယူခြင်း နှင့် ပတ်သက်ပြီး တအာင်း (ပလောင်) အမျိုးသား လွတ်မြောက်ရေး တပ်မတော် TNLA တပ်ဖွဲ့၏ ပြောရေးဆိုခွင့် ရှိသူ ဗိုလ်မှူးကြီး တားအိုက်ကျော်ကို ဖုန်းဖြင့် အကြိမ်ကြိမ် ဆက်သွယ်မေးမြန်းသော်လည်း လက်ခံ ဖြေကြားခြင်း မရှိပေ။
Leave a Comments