သျှမ်းပြည် တောင်ကြီးခရိုင် ဖယ်ခုံမြို့နယ် တောင်စလုံးကျေးရွာအနီး စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲပြင်းထန်နေလျက်ရှိကြောင်း စုံစမ်း သိရှိရသည်။

ယမန်နေ့ နှင့် ယနေ့ ဧပြီ ၅ ရက်နေ့တွင် စစ်ကောင်စီသည် တောင်စလုံးကျေးရွာဘက်တွင် တိုက်လေယာဉ်ဖြင့် ဝင်ရောက်တိုက်ခိုက်ခဲ့သောကြောင့် လက်ရှိသတင်းရေးသားချိန်ထိ တိုက်ပွဲပြင်းထန်နေလျက်ရှိကြောင်း သိရသည်။

“ မနေ့ညကတည်းက စစ်ကောင်စီ တိုက်လေယာဉ် နဲ့ ဝင်ပစ်တာ။ လက်နက်ကြီးတွေနဲ့လည်း ပစ်တယ်။ မနေ့ ညက တိုက်လေယာဉ်နဲ့တော့ ၂ လုံးလောက် ပစ်သွားတယ်။ ဒီနေ့ မနက် ၁၀ နာရီကတည်းက ဆက်ပစ်နေတာပဲ။ သူတို့က စစ်အင်အားဖြည့်လာတာကြောင့် တိုက်ပွဲပိုပြင်းထန်လာတာ” ဟု PNDF KK သတင်းနှင့် ပြန်ကြားရေး တာဝန်ခံ ခွန်ဗွေးဟုန်းက ပြောသည်။

ဖယ်ခုံမြို့နယ်အတွင်း တိုက်ပွဲ ပြန်လည်ပြင်းထန်လာရခြင်းသည် စစ်ကောင်စီတပ်ဖွဲ့က စစ်အင်အား ဖြည့်တင်းလာသည့် အတွက်ကြောင့် တိုက်ပွဲဆက်လက် ပြင်းထန်သွားနိုင်ကြောင်း သိရသည်။

“ အရင်ကတော့ ထိတွေ့မှုကြောင့် တိုက်ခိုက်ဖြစ်တာ။ အခုက စစ်ကောင်စီဘက်ကတော့ စစ်အင်အားတွေ ဖြည့်လာတာတော့ ရှိတယ်။ သူတို့ စစ်အင်အားတွေ ဖြည့်နေတော့ တိုက်ပွဲကတော့ ပိုပြီး ပြင်းထန်လာနိုင်တယ်။ အခု ကျနော်တို့ မြေပြင်သတင်းအရတော့ ခလရ ၂၄၀ ၊ ၂၄၇ တွေ ထပ်ပြီး အင်အားတိုးလာတယ်ပြောတယ်။ ဒါမဲ့ အတည်တော့ မပြုနိုင်သေးဘူး” ဟု ခွန်ဗွေးဟုန်းပြောသည်။

စစ်ကောင်စီ တပ်ဖွဲ့သည် လေယာဉ်ဖြင့် ဝင်ရောက်တိုက်ခိုက်ခဲ့သည့်အတွက်ကြောင့် ပြည်သူနေအိမ်များ ပျက်ဆီးမှုရှိကြောင်း သိရသည်။

ဖယ်ခုံမြို့နယ် နှင့် ပင်လောင်းမြို့နယ်တို့သည် မတ်လ ပထမပတ်ကစပြီး ယနေ့ထိ တိုက်ပွဲဖြစ်ပွားနေသည်။

အဆိုပါ တိုက်ပွဲကြောင့် ပြီးခဲ့သည့် မတ်လ ၁၁ ရက်နေ့က စစ်ကောင်စီ တပ်ဖွဲ့သည် နမ်းနိန်းကျေးရွာအတွင်း ဝင်ရောက်ပစ်ခတ်ခဲ့သည့်အတွက်ကြောင့် အရပ်သား ၁၉ ဦး နှင့် သံဃာ ၃ ပါး သေဆုံးသွားခဲ့သည်။