အမျိုးသား ညီညွတ်ရေး အစိုးရ (NUG) နှင့် ချိတ်ပြီး အွန်လိုင်းတွင် စာသင်ကြားနေသည့် မန္တလေးမြို့ရှိ Federal School of Aung Myay Thar Zanမှ အမျိုးသမီး (၁၃) ဦး နှင့် အမျိုးသား ၂ ဦး ကို စစ်ကောင်စီမှ ဖမ်းဆီးသွားကြောင်း သတင်းသိရသည်။
အဆိုပါ Federal School of Aung Myay Thar Zan အမည်ဖြင့် အွန်လိုင်းတွင် တရားမဝင် ပညာသင်ကြားနေသည်ဟုဆိုပြီး ကျောင်းတာဝန်ခံ အိရွှေစင်မြင့် အပါအဝင် (၁၅) ဦး ကို မန္တလေးတိုင်းဒေသကြီး အောင်မြေသာစံမြို့နယ်ရှိ ၎င်း၏ နေအိမ်တွင် ဖမ်းဆီးသွားကြောင်း စစ်ကောင်စီမှ ယမန်နေ့ (ဧပြီ ၄) ရက်တွင် ထုတ်ပြန်လိုက်သည်။
စစ်ကောင်စီမှ ဖမ်းဆီးသွားသည့် သူများမှာ ကျောင်းတာဝန်ခံ အိရွှေစင်မြင့် ၊တင်တင်လတ်၊ စန်းစန်းဝင်း၊ ခိုင်မာသန်း၊ နေကြည်ဝင်း၊ ခင်ကြည်မာဝေ၊ အေးမြတ်မွန်၊ ကျော်စန်းထွေး၊ ဇော်မျိုးထွန်း၊ ခင်နွယ်ဦး၊ ယဉ်ယဉ်မင်း၊ ခင်မြတ်နိုး၊ ခိုင်မာဖြိုး၊ အိအိအောင်နှင့် ချောစုသန်း စုစုပေါင်း ၁၄ ဦးတို့အား ၎င်းတို့ နေအိမ်အသီးသီး၌ ထပ်မံ ဖမ်းဆီးရမိခဲ့ကြောင်း ထုတ်ပြန်ချက်တွင် ရေးသားထားသည်။
အွန်လိုင်းမှ စာသင်ပြီး စစ်ကောင်စီ ဖမ်းဆီးသွားသည့် (၁၅) ဦး ကို NUG နှင့်ချိတ်ဆက်ပြီး တရားမဝင် စာသင်မှု ဟုဆိုပြီး စွပ်စွဲချက် ပြုလုပ်သည့်အပြင် ကျောင်းသားများထံကောက်ယူသည့် ငွေကြေးများကိုလည်း NUG ကို ထောက်ပံ့သည် ဟုလည်း စွပ်စွဲပြောဆိုထားသည်။
ထို့အပြင် အဆိုပါ အွန်လိုင်းစာသင်ကျောင်းကို စာရင်းပေးသွင်းပြီး အတန်းများတက်စေခဲ့သည့် မိဘများနှင့် ကျောင်းသားများကိုလည်း ဆက်လက်ဖော်ထုတ်ပြီး အရေးယူသွားမည်ဟု စစ်ကောင်စီက ခြိမ်းခြောက်ပြောဆိုထားသည်။
“လူတိုင်း ပညာသင်ကြားခွင့်ရှိသည်။ အနိမ့်ဆုံး မူလတန်း ပညာကို အခမဲ့ သင်ခွင့်ရှိသည်” ဟု ကမ္ဘာ့ ကုလသမဂ္ဂ အဖွဲ့ကြီးမှ ၁၉၄၈ ဒီဇင်ဘာလ ၁၀ ရက်နေ့တွင် လူသားတိုင်း ရသင့်ရထိုက်သော ခံစားထိုက်သော အခွင့်အရေး များကို လူ့အခွင့်အရေး ကြေညာ စာတမ်းအဖြစ် အတည်ပြု ကြေညာခဲ့သည်။
လူသားတိုင်း ခံစားနိုင်သည့် အခြေခံ လူ့အခွင့်အရေး များကို အတည်ပြုခဲ့သည့် ဒီဇင်ဘာ ၁၀ ရက်နေ့ကို အပြည်ပြည်ဆိုင်ရာ လူ့အခွင့်အရေးနေ့ အဖြစ် သတ်မှတ်ခဲ့သည်။ အဆိုပါ လူ့အခွင့်အရေး ကြေညာစာတမ်းတွင် အချက်ပေါင်း (၃၀) ပါရှိသည်။
သို့သော် မြန်မာနိုင်ငံတွင်မူ ယင်းလူ့အခွင့်အရေး ကြေညာ စာတမ်းပါ အချက် အများစုကို စစ်ကောင်စီမှ လိုက်နာရန် ပျက်ကွက် နေသည်။
