သျှမ်းပြည် မူဆယ်ခရိုင် ကွတ်ခိုင်မြို့နယ် ဟိုမောကျေးရွာ အုပ်စုမှ လူငယ် အမျိုးသားတစ်ဦး ဖမ်းခံရပြီး ယနေ့ထိ ပြန်မလွှတ်သေးကြောင်း စုံစမ်းသိရသည်။
ပြီးခဲ့သည့် ဧပြီလ ၁ ရက်နေ့တွင် ဟိုမောကျေးရွာအုပ်စု လွယ်ခွမ်ကျေးရွာတွင် နေထိုင်သည့် ပြည်သူ့စစ်ဟောင်း ဖြစ်ခဲ့ဖူးသော အသက် ၂၀ အရွယ်ရှိ မိုင်းစိုးထွန်းကို ကွတ်ခိုင်မြို့ပေါ် မှတ်ပုံတင် လုပ်ဆောင်ပြီး အပြန် ရှုခင်းသာ အနီး၌ ဖမ်းဆီး ခံလိုက်ရခြင်း ဖြစ်ကြောင်း ဒေသခံများက ပြောသည်။
“သူက ဆိုင်ကယ် နဲ့ သွားတာ၊ သူ့အဖော်ကလည်း နောက်ထပ် ဆိုင်ကယ် တစ်စီးနဲ့ အတူတူသွားတာ၊ ကွတ်ခိုင် ကနေ ပြန်လာပြီး ရှုခင်းသာနားအရောက်မှာ ဖမ်းခံလိုက်ရတာ၊ ကားတစ်စီးနဲ့ လူ ၅/၆ ယောက်လောက်က ဖမ်းပြီး ကားပေါ်တင်သွားတာ၊ ဆိုင်ကယ်ကိုတော့ ထားခဲ့တယ်” ဟု အမည်မဖော်လိုသူ နီးစပ်သူ တစ်ဦးက သျှမ်းသံတော်ဆင့်ကို ပြောသည်။
အဆိုပါ ဖမ်းဆီးခံရသူသည် မိုင်းစိုးထွန်း ဆိုသူ ဖြစ်ပြီး ယခင်တွင် မူဆယ်မြို့ရှိ ပြည်သူ့စစ် တပ်ဖွဲ့ တစ်ခု၌ ဝင်ရောက်ခဲ့ဖူးသူလည်း ဖြစ်ကြောင်း၊ ပြည်သူ့စစ်တပ်ဖွဲ့မှ ထွက်လာသည်မှာ တစ်နှစ်ခန့် ရှိပြီဖြစ်ကြောင်းလည်း အထက်ပါ ပုဂ္ဂိုလ်က ပြောဆိုထားသည်။
“သူက ပြည်သူ့စစ်တော့ လုပ်ဖူးပေမယ့် ထွက်လာတာတော့ ကြာပြီ၊ တစ်နှစ်လောက်ရှိပြီ၊ မလုပ်ချင်လို့ ထွက်လာတယ်လို့ သိရတယ်၊ အခုသူ့ကို လာဖမ်းတဲ့ အဖွဲ့က အဲ့ပြည်သူ့စစ်တွေနဲ့ ပတ်သက်နေမလားတော့ မပြောတတ်ဘူး၊ ဒီနေ့ထိ မလွှတ်လာသေးဘူး ” ဟု အထက်ပါ နီးစပ်သူ ပုဂ္ဂိုလ်က ဆက်ပြောသည်။
မိုင်းစိုးထွန်းကို ဖမ်းဆီးခေါ်ဆောင်သွားသည့် အဖွဲ့သည် မည်သူ့ အဖွဲ့အစည်းက ဖြစ်ကြောင်းကိုလည်း မသိရသည့်အတွက် လိုက်လံရှာဖွေရန်လည်း ခက်ခဲကြောင်း ဆွေမျိုး နှင့် နီးစပ်သူက ပြောသည်။
လက်ရှိ မိုင်းစိုးထွန်း ဖမ်းဆီးခေါ်ဆောင်သွားခြင်း ခံရသည်မှာ ၄ ရက်မြောက်ရှိပြီ ဖြစ်သော်လည်း ပြန်မလွှတ် လာသေးသဖြင့် မိသားစုဝင်များက စိုးရိမ်နေကြကြောင်းလည်း သိရသည်။
ကွတ်ခိုင်မြို့အတွင်း လှုပ်ရှားနေသည့် လက်နက်ကိုင် တပ်ဖွဲ့များ အနေဖြင့် စစ်ကောင်စီ တပ်ဖွဲ့ နှင့် ၎င်းတို့၏ လက်အောက်ခံ ပြည်သူ့စစ်တပ်ဖွဲ့များအပြင် ရှမ်းပြည် တိုးတက်ရေးပါတီ (SSPP) ၊ ကချင်တပ်ဖွဲ့ (KIA) ၊ ကိုးကန့်တပ်ဖွဲ့ MNDAA နှင့် တအာင်း (ပလောင်) တပ်ဖွဲ့ TNLA တို့က သွားလာလှုပ်ရှားနေကြသည်။
Leave a Comments