သျှမ်းပြည် တောင်ကြီးခရိုင် ရွာငံမြို့နယ်အတွင်းတွင် စစ်ကောင်စီ တပ်သားများက အရပ်သား ပြည်သူများကို လိုက်လံဖမ်းဆီးမှု များပြား လာပြီးနောက် ည မထွက်ရ အမိန့်ကို ထပ်မံ ထုတ်ပြန်လာကြောင်း ဒေသခံများ ထံမှ သိရသည်။

ယခုဧပြီလမှ စတင်ကာ ရွာငံမြို့နယ်အတွင်းတွင် ည ၈ နာရီမှ မနက် ၄ နာရီ အထိ အပြင်မထွက်ရ အမိန့်ကိုကျေးရွာ အုပ်ချုပ်ရေးမှူးများမှ တစ်ဆင့် အမိန့်ပေး ညွှန်ကြားလာကြောင်း ဒေသခံများက ပြောသည်။

“အုပ်ချုပ်ရေးမှူးတွေကတော့ ဖမ်းတာ ဆီးတာတွေ မခံရဖို့အတွက် အပြင်မထွက်တာပဲ ကောင်းတယ်ပေါ့၊ အခုလည်း အထက်က ညွှန်ကြားလာတာလို့ ပြောထားတယ်၊ အရေးကြီးလို့ အပြင်ထွက်ရင်တောင်မှ သက်ဆိုင်ရာ လူကြီးတွေကို အသိပေးပြီးမှ ထွက်ခိုင်းတယ်” ဟု အမည်မဖော်လိုသူ ရွာငံ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် ရွာငံမြို့နယ်အတွင်း စစ်ကောင်စီတပ်ဖွဲ့၏ လိုက်လံဖမ်းဆီးမှုများလည်း တစ်နေ့တစ်ခြား များပြား လာပြီး စစ်သားများလည်း ရွာဘုန်းကြီးကျောင်းထဲ ဝင်ရောက်နေရာယူမှု ရှိနေကြောင်း ဒေသခံများက ပြောသည်။

“ စစ်သားတွေက ဘုန်းကြီးကျောင်းမှာပဲနေပြီး ဘုန်းကြီးကျောင်းမှာပဲ ချက်စားကြတယ်၊ ရွာထဲမှာလည်း နေရာယူထား တာရှိ တယ်၊ ပြီးတော့ အုတ်တွင်းကျေးရွာ၊ သိမ်ကုန်းကျေးရွာ နဲ့ အဲ့ရွာအရှေ့ဘက်တွေမှာလည်း စစ်သားတွေက နေရာ ယူထားတယ်” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။

ပြီးခဲ့သည့် မတ်လ ၃၀ ရက်တွင် စစ်ကောင်စီမှ ဖမ်းဆီးသွားသည့် ရွာငံမြို့နယ် ကျောက်ဂူပြင်ကျေးရွာမှ အရပ်သား ၉ ဦးသည် ယနေ့ အထိ အဆက်အသွယ်မရကြသေးကြောင်းလည်း သိရသည်။

ပြီးခဲ့သည့် မတ်လ ၂၅ ရက်တွင်လည်း စစ်အင်အား ၁၀၀ ဝန်းကျင်ရှိ စစ်ကောင်စီ တပ်ဖွဲ့သည် ရွာငံမြို့နယ်ရှိ အလယ်ချောင်ကျေးရွာ နှင့် ငှက်သောက်ရွာရှိ နေအိမ်များကို ဝင်ရောက်ရှာဖွေခြင်းများ ပြုလုပ်ပြီး တချို့အိမ်ကိုလည်း မီးရှို့ဖျက်ဆီးမှု ရှိခဲ့သည်။

၂၀၂၃ ခုနှစ် ဖေဖော်ဝါရီလ (၂၈) ရက်နေ့ထိ စစ်အာဏာသိမ်း ကာလအတွင်း စစ်ကောင်စီ နှင့် လက်အောက်ခံ အဖွဲ့အစည်းများ က မီးရှို့ဖျက်ဆီးမှုကြောင့် သျှမ်းပြည်မှ အရပ်သားပြည်သူ နေအိမ်ပေါင်း ၁၃၅ အိမ် ရှိနေပြီး ရွာငံမှ ၁၈ အိမ် ရှိနေကြောင်း Data for Myanmar က မတ်လ ၂၀ ရက်နေ့တွင် ထုတ်ပြန်ထားသည်။