သျှမ်းပြည် လွိုင်လင်ခရိုင် ပင်လုံမြို့ ရပ်ကွက် ၂ရှိ ဝမ့်အဲန်ဘုန်းကြီးကျောင်း အပါး (၆၀) နီးပါး အစားအဆိပ်သင့်ပြီး ဝမ်းလျောဝမ်းပျက် ၊ မူးဝေအော့အန်မှုတွေ ဖြစ်ပွားခဲ့ကြောင်း စုံစမ်းသိရှိရသည်။
ယနေ့ (မတ် ၃၁) သံဃာတော်များ မနက်ဆွမ်းအတွက် ငါးထမင်းနှယ်ကို သုံးဆောင်ပြီးနောက်ပိုင်း သံဃာ (၆၀) ဝန်းကျင် အထက်လန်အောက်လျောဖြစ်ခဲ့ကြောင်းသိရသည်။
“ ဘာကြောင့်ဖြစ်လဲတော့ အတိကျတော့မပြောနိုင်သေးဘူး။ မနက်တုန်းကတော့ ငါးထမင်းနှယ် ဆွမ်းဘုန်းလိုက်တယ်။ အဲဒါဘုန်းပြီးတော့ သံဃာတစ်ချို့ကတော့ အန်ကုန်တယ်။ မူးတာဖြစ်ကြတယ်။ ၆၀ ကျော်လောက်တော့ အကုန်ဖြစ်တယ်” ဟု ပင်လုံမြို့ သံဃာတော်များကို ကူညီပေးသူက ပြောသည်။
အဆိုပါ သံဃာတွေများကို လက်ရှိ ဆေးရုံတွင် ပို့ဆောင်ထားပြီးဖြစ်ပြီး အချို့သံဃာတော်များကလည်း သက်သာပြီး ကျောင်းသို့ ပြန်ရောက်ရှိသည်။
လက်ရှိမှာ ငါးထမင်းနှယ် ကို နမူနာအဖြစ်ယူဆောင်ပြီး တောင်ကြီးဓာတ်ခွဲခန်းသို့ ပို့ဆောင်ပြီး စစ်ဆေးနေကြောင်း သိရသည်။
အထက်လန်အောက်လျောဖြစ်ပွားသည့် သံဃာတော်များသည် များသောအားဖြင့် ကိုရင်ဖြစ်ကြသည်။
“ တစ်ချို့ကလည်းတော့သက်သာလာပြီ။ အခုတော့ ဆေးရုံမှာရောက်ဆေးကုကြတယ်။ သက်သာတဲ့ ကိုရင်တစ်ချို့ကိုတော့ ကျောင်းကို ပြန်ပို့လိုက်ပါပြီ။ အခုတော့ မိခင် နဲ့ ကလေးဆေးရုံကတော့ နမူနာလာ ယူသွားပြီး။ တောင်ကြီးဓာတ်ခွဲခန်းကို စစ်ဆေးကြည့်ဖို့ ပို့လိုက်ပြီ” ဟု အထက်ပါပုဂ္ဂိုလ်က ပြောသည်။
ပင်လုံမြို့ ဝမ့်အဲန်ဘုန်းကြီးကျောင်းတွင် သံဃာပေါင်း ၁၀၀ ဝန်းကျင်ရှိကြောင်း သိရသည်။
Leave a Comments