တရုတ်နိုင်ငံတွင်းရှိ မြန်မာနိုင်ငံသား ပြည်တွင်းပြန်ဝင်လာရန်စောင့်ဆိုင်းနေသည်ကို မူဆယ်ခရိုင် အုပ်ချုပ်ရေးမှူးမှ လက်မှတ်ထိုးလက်ခံပေးခြင်းမရှိသည့်အတွက်ကြောင့် ပြန်ဝင်လာခွင့်မရကြောင်း စုံစမ်းသိရှိရသည်။
တရုတ်နိုင်ငံရောက် မြန်မာရွှေ့ပြောင်းအလုပ်သမားများ ပြည်တွင်းသို့ ပြန်ဝင်လာရန် ရွှေလီမြို့တွင် စောင့်ဆိုင်းနေကြပြီး မြန်မာနိုင်ငံဘက်က ပြန်လက်ခံရန် ကြန့်ကြာနေသည့်အတွက်ကြောင့် ပြည်ဝင်ခွင့်မရသေးကြောင်း သိရသည်။
“ မြန်မာပြည်ကို ပြန်ဝင်လာဖို့စောင့်နေကြတာ။ ဒီမြန်မာဘက်က လက်မခံပေးလို့ ပြန်လာလို့မရသေးတာ။ မူဆယ်ခရိုင်အုပ်ချုပ်ရေးမှူးက လက်မှတ်မထိုးသေးလို့ ကြန့်ကြာနေတာ။ တကယ်လို့ သူလက်မှတ်ထိုး ပေးလိုက်ရင် အကုန်ပြန်ဝင်လာလို့ရပြီ” ဟု မူဆယ်မြို့ရောက် ရွေ့ပြောင်းအလုပ်သမား ကို လာကြိုသည့်သူ အမျိုးသားက ပြောသည်။
လက်ရှိ မြန်မာနိုင်ငံတွင်းသို့ ပြန်ဝင်လာရန် စောင့်ဆိုင်းနေသူ (၂၂၅) ဦး နာမည်စာရင်းပေးထားပြီး တတိယအသုတ် အနေဖြင့် ပြန်လာမည်သူများဖြစ်သည်။
ပုံမှန်အားဖြင့် တရုတ်နိုင်ငံတွင်းရောက် ရွေ့ပြောင်းအလုပ်သမားများသည် မြန်မာနိုင်ငံတွင်းသို့ ပြန်ဝင်လာရန်အတွက် နာမည်စာရင်းပေးပြီး ၁ ပတ်အထိသာ စောင့်ဆိုင်းရသည်။
သို့သော်လက်ရှိ တတိယအသုတ်အနေဖြင့် ပြန်လာမည့်သူများသည် ၁ လ ကျော်ကြာစောင့်ဆိုင်းနေရကြောင်း၊ ပြန်လာမည့်သူကို တရုတ်နိုင်ငံဘက်က စစ်ဆေးပြီပြီး ဖြစ်သော်လည်း မြန်မာဘက်ကသာ လက်မခံသောကြောင့် ပြန်ဝင်မလာနိုင်သေးကြောင်း အထက်ပါ အမျိုးသားက ပြောသည်။
“ အခုပြန်လာမဲ့သူတွေက ၁ လကျော်လောက်စောင့်နေရတယ်။ ပုံမှန်ဆိုရင်တော့ ၁ ပတ် ၁၀ ရက်လောက်ဆို ပြီပြီး။ အခုကမပြီးသေးဘူး။ ကျနော်တို့ကြားရတာတော့ တရုတ်ဘက်ကတော့ စစ်ဆေးတာပြီးပြီ။ မြန်မာဘက်ကပဲ လက်မခံလို့ သူတို့တွေ ပြန်မလာနိုင်သေးကြတာ။ ခရိုင်အုပ်ချုပ်ရေးမှူးက ဘာလုပ်နေလဲတော့မသိဘူး။ ဂေါက်ကွင်းတော့ သူကသွားနိုင်တယ်။ လက်မှတ်တော့ သူမထိုးပေးဘူး” ၎င်းက ပြောသည်။
တရုတ်နိုင်ငံတွင်း ရွှေ့ပြောင်းအလုပ်သမားများသည် မြန်မာနိုင်ငံတွင်းသို့ ပြန်ဝင်လာရန်အတွက် ရွှေလီမြို့တွင် လချီစောင့်ဆိုင်းနေလျက်ရှိသည်။