မြန်မာနိုင်ငံတွင် စစ်တပ်က အာဏာသိမ်းပြီးနောက်ပိုင်း အနယ်နယ်အရပ်ရပ်မှ ပြည်သူ တစ်သောင်းကျော်သည် မိုင်းလား အထူးဒေသ(၄)သို့ ရွှေ့ပြောင်းအလုပ်လုပ်ကြကြောင်း စုံစမ်းသိရသည်။
ပြီးခဲ့သည့် ၂၀၂၁ ခုနှစ် ဖေဖော်ဝါရီ ၁ ရက် စစ်တပ်က အာဏာစသိမ်းပြီးနောက်ပိုင်း ပြည်တွင်းတွင် နိုင်ငံရေးအခြေအနေ မတည်ငြိမ်မှုများကြောင့် ပညာရေး၊ စီးပွားရေး အဆမတန် ကျဆင်းလာနေသည့်အပြင် အလုပ်အခွင့်အလမ်းများလည်း ရှားပါးလာသည့်အတွက် ပြည်သူများသည် မိုင်းလား အထူးဒေသ (၄) သို့ သွားရောက်အလုပ်လုပ်ကြသည်။
ထိုသို့သွားသည့်သူများသည် လောင်းကစားဝိုင်း၊ အွန်လိုင်းဂိမ်းနှင့် ဆိုင်စောင့်သည့် အလုပ်အပြင် ကျားဖြန့်အလုပ်ကို လုပ်ကိုင်ကြသည်။
လက်ရှိမှာ မိုင်းလားမြို့သို့ ရွှေ့ပြောင်းအလုပ်လုပ်ကိုင်နေသည့် မြန်မာလုပ်သားများကို နေထိုင်ခွင့်ကဒ် လုပ်ဆောင်ပေးနေကြောင်း မိုင်းလားဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ မြို့ခံလူမဟုတ်ဘူးဆိုရင် အကုန်ပြန်လုပ်ရတယ်။ မိုင်းလားမှာရောက်နေတာ ဘယ်လောက်ပဲ ကြာကြာ အိမ်ထောင်စုစာရင်းမရှိတဲ့သူတွေ အကုန်ပြန်လုပ်ရတယ်။ လူဦးရေကတော့ သောင်းဂဏာန်းလောက်တော့ ရှိတယ်။ အခုလည်း အဲ့ဒီလူဦးရေကို နေထိုင်ခွင့်ကဒ် လုပ်ပေးနေတယ်။ တစ်ယောက်ကို ယွမ် (၂၀) နဲ့လုပ်ပေးနေတယ် “ဟု ၎င်းက ပြောသည်။
အဆိုပါ နေထိုင်ခွင့်ကဒ် လုပ်ဆောင်ရန်အတွက် တစ်ဦးလျှင် ယွမ် (၂၀) မြန်မာကျပ်ငွေ (၈၀၀၀)ကျော် ကုန်ကျမည် ဖြစ်ကြောင်းလည်း သိရသည်။
ထို့အပြင် အထူးဒေသ (၄) အတွင်း ရောက်ရှိနေသူများ၊ နေထိုင်သည့် ဧည့်သည်များသည် ယာယီနေထိုင်ခွင့် လက်မှတ် လုပ်ဆောင်ကြရပြီး အဆိုပါ ယာယီနေထိုင်ခွင့်လက်မှတ် သက်တမ်းကုန်ဆုံးသွားပါက အချိန်မီသက်တမ်းတိုးရကြောင်းလည်း သိရသည်။
#SHANBurmese
#Shannews
#သျှမ်းသံတော်ဆင့်
