သျှမ်းပြည် လားရှိုးခရိုင် လားရှိုးမြို့ ရပ်ကွက် (၇)၊ ဇေယျားလမ်းရှိ နေအိမ်တစ်လုံးရှေ့တွင် အမျိုးသားအလောင်း တစ်လောင်းတွေ့ရှိကြောင်း စုံစမ်းသိရသည်။
ယမန်နေ့ (မတ်လ ၂၉ ရက်) ညနေပိုင်း ၃ နာရီတွင် လားရှိုးမြို့ ရပ်ကွက် (၇)၊ ဇေယျားလမ်းရှိ နေအိမ်တစ်လုံးရှေ့၌ နေရပ်လိပ်စာနှင့် အမည်မသိရသည့် အသက် (၃၀)နှစ်အရွယ် အမျိုးသားတစ်ဦး သေဆုံးနေသည့် အလောင်း ကိုတွေ့ရှိပြီး ၎င်းအလောင်းကို သွားရောက်သယ်ယူသည့် လားရှိုးလူငယ်များ လူမှုကူညီရေးအဖွဲ့က သျှမ်းသံတော်ဆင့်ကို ပြောသည်။
“ဒေသခံတွေ အကြောင်းကြားလာတော့မှ ကျနော်တို့တွေ အလောင်းသွားသယ်ပေးခဲ့တာပါ။ အလောင်းမှာ ထိခိုက်ဒဏ်ရာတွေ ရထားတာတော့ မတွေ့ရဘူး “ ဟု ၎င်းက ပြောသည်။
အဆိုပါ သေဆုံးသွားသည့် သူတွေဟာ များသောအားဖြင့် မူးယစ်ဆေးဝါး အလွန်အကျွံသုံးစွဲထားသူများ ဖြစ်ကြပြီး အိမ်ခြေမဲ့အဖြစ် နေထိုင်ရာ ညဘက်အအေးမိခြင်း၊ အစာအဟာရ ပြတ်လပ်ခြင်းမှ သေဆုံးသွားကြကြောင်း သိရသည်။
စစ်တပ်က အာဏာသိမ်းပြီးနောက်ပိုင်း လားရှိုးမြို့နယ်ထဲတွင် လောင်းကစားဝိုင်းများ ပေါ်ပေါ်ထင်ထင် ဖွင့်လှစ်လာခြင်း၊ လောင်းကစားဝိုင်းများ ပေါများလာခြင်းကြောင့် မကြာခဏ လူသေအလောင်းတွေ တွေ့ရှိနေရခြင်းဖြစ်ကြောင်း လားရှိုးဒေသခံအမျိုးသားတစ်ဦးက ထပ်လောင်းပြောသည်။
“ အခုလားရှိုးမှာ လောင်းကစားတွေ အဆော့များ၊ ရှုံးများတာတော့ ဖိုက်ကြူးပဲ။ တချို့တရုတ်ဝိုင်းတွေဆို တခါထိုးရင် ရာချီတယ်။ တချို့ဝိုင်းဆို ပြောင်းဖူးစေ့နဲ့တောင်ဆော့ကြတာ ၁ စေ့ကို ဆယ်သိန်းသတ်မှတ်ပြီး ဆော့တာ“ ဟု ၎င်းက ပြောသည်။
ထို့အပြင် လားရှိုးမြို့နယ်မှာ စစ်ကောင်စီတပ်ဖွဲ့အပါအဝင် ပြည်သူ့စစ်တပ်ဖွဲ့၊ (TNLA)တပ်ဖွဲ့၊ (SSPP/SSA)တပ်ဖွဲ့နှင့် (MNDAA)တပ်ဖွဲ့တို့ လှုပ်ရှားနယ်မြေဖြစ်ကြရာ လောင်းကစားဝိုင်းပိတ်ပင်ခြင်းနှင့် မူးယစ်ဆေးဝါး တားဆီးခြင်းတို့ကို လုပ်ဆောင်ခြင်းမရှိသေးကြောင်း ဒေသခံများ၏ ပြောက်ချက်အရသိရသည်။
အလားတူ မြန်မာ-တရုတ်နယ်စပ် မူဆယ်မြို့တွင်လည်း (၃) ပတ်အတွင်း ပိုင်ရှင်မဲ့အလောင်း ၃ လောင်းအထိ တွေ့ရှိကြောင်း PSLF/TNLA က (မတ်လ ၂၁ ရက်)တွင် ထုတ်ပြန်ထားသည်။
အလောင်းသည် မူဆယ်မြို့နယ်ထဲမှ ပန်ခမ်းချောင်း၊ သိန်းသန်းချီကားဝန်းနှင့် ဟိုနားရပ်ကွက်တွင် တွေ့ရှိထားပြီး ရုပ်အလောင်းနှစ်လောင်းမှာ မူးယစ်ဆေးဝါးအများပြားသုံးစွဲပြီး အအေးပတ်ကာ သေဆုံးသွားသည့် အခြေနေမျိုး တွေ့ရှိရကြောင်း၊ ကျန်သည့်ရုပ်အလောင်းတစ်ခုမှာ ပုတ်ပွပြီးသေဆုံးနေသဖြင့် သေဆုံးမှုအကြောင်းအရာကို မသိရှိရကြောင်း ရေးသားဖော်ပြထားသည်။
Leave a Comments