သျှမ်းပြည် လွိုင်လင်ခရိုင် လဲချားမြို့နယ်တွင်း ပြုလုပ်ခဲ့သည့် ရှင်လောင်းပွဲထဲတွင် လောင်းကစားဝိုင်းများ ထည့်သွင်း ကျင်းပ ပြုလုပ်ခဲ့ကြောင်း စုံစမ်းသိရှိရသည်။
ယခုမတ်လကစ လဲချားမြို့နယ်ထဲတွင် ရှင်လောင်းပွဲ ကျင်းပပြုလုပ်ခဲ့သည့် ကျောင်းတိုင်းတွင် လောင်းကစားဝိုင်းများပါရှိကြောင်း ဒေသခံများထံသိရသည်။
“ ရှင်လောင်းပွဲတွေလုပ်တဲ့ ကျောင်းတိုင်းမှာတော့ လောင်းကစားဝိုင်းတွေပါတယ်။ အကြီးတော့မဟုတ်ဘူး။ ကုန်းကင်းအသေးလေးတွေပဲဖွင့်ထားကြတာ။ ကျောင်းဝန်းထဲမှာ ဖွင့်ထားတာတော့မဟုတ်ဘူး။ ပွဲဈေးတန်းထဲမှာပဲ ဖွင့်ထားတာ” ဟု လဲချားမြို့ ဒေသခံ အမျိုးသမီးတစ်ဦးက ပြောသည်။
အဆိုပါ ရှင်လောင်းပွဲထဲတွင် လောင်းကစားဝိုင်းတွေပါရှိလာသော်လည်း အုပ်ချုပ်ရေးမှူးမှ တစ်စုံတစ်ရာ လုပ်ဆောင်ခြင်းမရှိပေ။
ရှင်ပြုပွဲထဲတွင် လောင်းကစားဝိုင်းများပါရှိလာသည့်အတွက် ရိုးရာဓလေ့ကို ဖျက်ဆီးကြောင်း ၊ ဘုရားပွဲတွင် လောင်ကစားဝိုင်းတွေမပါရှိသင့်ကြောင်း လဲချားမြို့ ဒေသခံ အမျိုးသားတစ်ဦးက ပြောသည်။
“ ရှင်ပြုပွဲတွေမှာက လောင်းကစားဝိုင်းတော့မရှိသင့်ဘူး။ အခုကလည်း နိုင်ငံရေးမကောင်းတော့ ဖြစ်ချင်တိုင်းဖြစ်နေတာပဲ။ အခုလို လောင်းကစားဝိုင်းတွေရှိလာတော့လည်း ရိုးရာဓလေ့ကို ဖျက်ဆီးသလိုဖြစ်တာပေါ့။ ဟိုအရင်တွေကတုန်းကတော့ ဘုရားပွဲတွေ၊ ရှင်လောင်းပွဲတွေမှာ လောင်းကစားဝိုင်တွေမပါဖူးဘူး” ဟု ၎င်းက ပြောသည်။
လက်ရှိ လဲချားမြို့နယ်ထဲတွင် ရှင်လောင်းပွဲ ၆ ပွဲ ပြီးစီးသွားပြီဖြစ်ပြီး ပွဲတိုင်း လောင်းကစားဝိုင်းပါရှိကြောင်း သိရသည်။
စစ်တပ်က အာဏာသိမ်းပြီးနောက် ၂ နှစ်ကာလအတွင်း သျှမ်းပြည်တဝှမ်း လောင်းကစားတွေ ပေါများလာပြီး လွတ်လပ်စွာ ဖွင့်လှစ်လာပြီး မည်သည့်အဖွဲ့မှ တာဝန်ယူဖြေရှင်းခြင်းမရှိကြပေ။