သျှမ်းပြည် လွိုင်လင်ခရိုင် ခိုလမ်မြို့ ရပ်ကွက် ၆ အတွင်းရှိ နေအိမ်တစ်ခုကို တပ်ထိန်းတပ်မှူး ဇနီးက အိမ်ရှင် မရှိသည့်အချိန် နေအိမ်သော့ကို ရိုက်ချိုးကာ ပစ္စည်းသွားသိမ်းယူခြင်းသည် ငွေချေး စာချုပ်အတိုင်းသွားရောက် ယူဆောင်ခဲ့ကြောင်း ရပ်ကွက်အုပ်ချုပ်မှူး ထံသိရှိရသည်။

ပြီးခဲ့သည့် မတ်လ ၂၅ ရက်နေ့တွင် ခိုလမ်မြို့ ရပ်ကွက် ၆ အတွင်းနေထိုင်သည့် အမျိုးသမီးတစ်ဦးက တပ်မှူးဇနီးထံ စီးပွားရေးအတွက် ငွေသိန်း ၃၀ သွားရောက်ချေယူခဲ့ပြီး ပြန်မဆပ်နိုင်သည့်အတွက်ကြောင့် စာချုပ်ထဲတွင် ပါရှိသည့်ရက်အတိုင်း နေအိမ်တွင်း ပစ္စည်းများကို သွားရောက်သိမ်းယူခဲ့ကြောင့် အုပ်ချုပ်ရေးမှူးက သျှမ်းသံတော်ဆင့်ကို ပြောသည်။

“ သွားသိမ်းယူလာခဲ့တာတော့ဟုတ်တယ်။ စာချုပ်ထဲကအတိုင်းပဲ ရက်အတိကျ နဲ့ ပစ္စည်း ၃ မျိုးကိုပဲ သွားယူခဲ့တာ။ သွားယူတဲ့အချိန် အိမ်မှာတော့ လူမရှိဘူး။ ဒါမဲ့ တံခါးကတော့ဖွင့်ထားတယ်။ သူတို့က ငွေချေးယူပြီး ရက်အတိကျအတိုင်းမဆပ်နိုင်လို့ သွားယူလိုက်တာ” ဟု ခိုလမ်မြို့ ရပ်ကွက် ၆ အုပ်ချုပ်ရေးမှူးက ပြောသည်။

၎င်းတို့သည် ပြီးခဲ့သည့် ၂၀၂၂ ဧပြီလ ၁၄ ရက်နေ့တွင် အတိုးမဲ့အနေဖြင့် ခိုလမ်မြို့ ရပ်ကွက်အုပ်ချုပ်ရေးမှူးရုံးတွင် သွားရောက်စာချုပ်ချုပ်ဆိုခဲ့ပြီး ငွေချေးယူခဲ့ကြောင်း အုပ်ချုပ်ရေးမှူးက ဆိုသည်။

အလားတူ မတ်လ ၂၅ ရက်နေ့တွင် သိမ်းယူခဲ့သည့် ပစ္စည်းများသည်လည်း စာချုပ်ထဲအတိုင်းပါဝင်ထားသည့် စတီးခုံး နှင့် ကုတင် ၃ လုံးကို သွားရောက်သိမ်းယူခဲ့ကြောင်းသိရသည်။

“ သူတို့ ငွေချေးဖို့ကလည်း ရပ်ကွက်အုပ်ချုပ်ရေးမှူးရုံးမှာပဲ စာချုပ်လာချုပ်ကြတာ။ သူတို့ချုပ်တဲ့ချိန်တော့ ကျနော်သိတယ်။ ငွေပေးကြတဲ့အချိန်တော့ ကျနော်မသိဘူး။ သွားသိမ်းယူခဲ့တာလည်း စာချုပ်ထဲကပါထားတဲ့ ပစ္စည်းတွေပဲသွားယူတာ။ ကျွန်းသစ်တွေနဲ့လုပ်ထားတဲ့ စတီးခုံ နဲ့ ကုတင် ၃ လုံးကို သွားသိမ်းယူလာတာ။ ကျန်တာတော့မယူသွားဘူး” ဟု အုပ်ချုပ်ရေးမှူးက ထပ်လောင်းပြောသည်။

ခိုလမ်မြို့ ရပ်ကွက် ၆ အတွင်းနေထိုင်သည့်အမျိုးသမီးသည် စီးပွားရေးလုပ်ရန် အတွက် တပ်မှူးဇနီးထံ ငွေ သိန်း ၃၀ ချေးယူခဲ့ကြောင်းသိရသည်။

သို့သော်လည်း တဖက် ငွေချေးသည့် အမျိုးသမီးက တပ်မှူးဇနီးသည် နေအိမ်ကို သော့ဖျက်ပြီး နေအိမ်ထဲရှိပစ္စည်းများကို သယ်ယူသွားကြောင်း၊ လူမရှိသည့်အချိန်လာရောက်ယူခြင်းသည် အလွန်ပင်ရုပ်ဆိုးကြောင်း ချေးငွေယူသည့်အမျိုးသမီးနှင့် နီးစပ်သူ တစ်ဦးက သျှမ်းသံတော်ဆင့်ကိုပြောသည်။

“ လူမရှိတဲ့အချိန်သော့ဖျက်ယူတာလေ။ တကယ်ဆိုလူလာတဲ့အချိန်ထိစောင့်သင့်တယ်လေ။ အခုက သူတို့ယူသွားတဲ့ပစ္စည်းကမနည်းဘူး” ဟု ၎င်းကဆိုသည်။

ခိုလမ်မြို့နယ်သည် စစ်ကောင်စီ အရှေ့အလယ်ပိုင်းတိုင်းစစ်ဌာနချုပ် တည်ရှိရာနေရာဖြစ်သည်။