သျှမ်းပြည် သီပေါမြို့နယ် စိန်ကျော့ကျေးရွာအုပ်စုနေ သျှမ်းစာပေ သင်ကြားပေးနေသည့် စေတနာ့ဝန်ထမ်း ကျောင်းဆရာတစ်ဦးအား သတင်းပေးဟုဆိုကာ SSPP/SSA မှ ဖမ်းဆီးချုပ်နှောင်ထားကြောင်း စုံစမ်းသိရှိ ရသည်။

မတ်လ ၈ ရက်နေ့မှ ယနေ့အထိ ဖမ်းဆီးခြင်းခံထားရသည့် စိန်ကျော့ကျေးရွာအုပ်စု၊ ကုန်းညောင်ကျေးရွာနေ သျှမ်းဘာသာစာပေ စေတနာ့ဝန်ထမ်း ကျောင်းဆရာ စိုင်းဟန်ခေးအား လာရောက်တွေ့ဆုံရန် ဒေသအတွင်း တပ်မှူးတစ်ဉီးက ဖုန်းဖြင့် ဆက်ခေါ်သွားပြီး ယနေ့အထိ နေအိမ် ပြန်မရောက်သေးဘဲ ဖမ်းဆီးချုပ်နှောင်ထား ကြောင်း နီးစပ်သည့် ပုဂ္ဂိုလ်တစ်ဦးက သျှမ်းသံတော်ဆင့်အား ပြောသည်။

“၁၀ နာရီလောက်မှာ အိမ်ကထွက်သွားတယ်၊ မွန်းလွဲပိုင်း ၂ နာရီလောက်မှာတော့ သူ့ကို SSPP/SSA ကဖမ်းသွားပြီ ဆိုပြီးတော့ သတင်းသိရတယ်၊ သျှမ်းသံတော်ဆင့်ကို သတင်းပေးတယ်ဆိုပြီး ဖုန်းကိုစစ်ဆေးတယ်။ ဖုန်းကိုလဲ သိမ်းထားတယ်။ အခုက SSPP/SSA တပ်စခန်းရှိတဲ့ ဖက်နမ်ရွာမှာ ချုပ်နှောင်ထားတာ” ဟု နီးစပ်သည့် ရွာခံတစ်ဦး က သျှမ်းသံတော်ဆင့်သို့ ပြောသည်။

ကိုယ်ရင်သုံးပါးအား လူဝတ်လှဲစေပြီး တပ်သားသစ်စုဆောင်းသွားသည်ဆိုသည့်သတင်းအား သျှမ်းသံတော်ဆင့် သတင်းဌာနထံသို့ သတင်းပေးခဲ့သည်ဟု စွပ်စွဲပြီး ဖမ်းဆီးခေါ်ဆောင်သွားသည်ဟုလည်း ရွာခံများကပြောသည်။ သို့သော် သျှမ်းသံတော်ဆင့်အနေဖြင့် အဆိုပါသတင်းအား မထုတ်လုပ်ရသည့်အပြင် ကျောင်းဆရာ စိုင်းဟန်ခေး အားလည်း သိရှိခြင်း၊ ဆက်သွယ်သတင်းမေးမြန်းခြင်းလည်း မရှိခဲ့ဖူးပေ။

အဆိုပါ ဖမ်းဆီးခံထားရသည့် ကျောင်းဆရာ စိုင်းဟန်ခေးသည် ရပ်ရွာအကျိုး ကူညီဆောင်ရွက် ပေးသည့် လူငယ်ခေါင်းဆောင်တစ်ဦး ဖြစ်နေပြီး လက်ရှိတွင် SSPP/SSA ၏ တပ်စခန်းရှိရာ ဖက်နမ်ကျေးရွာတွင် ချုပ်နှောင်ထားပြီး မတ်လ ၂၀ ရက်နေ့က မိသားစုဝင်များနှင့် တွေ့ဆုံခွင့်ပေးခဲ့ကြောင်း လည်းသိရသည်။

ကျောင်းဆရာ စိုင်းဟန်ခေး ဖမ်းဆီးခံထားရခြင်း နှင့် ပတ်သက်ပြီး ရှမ်းပြည်တိုးတက်ရေးပါတီ၊ ရှမ်းပြည် တပ်မတော် SSPP/SSA ပြောရေးဆိုခွင့်ရှိသူ ဗိုလ်ကြီး သီဟရာဇာက –
“သူက သျှမ်းသံတော်ဆင်ႉကို သတင်းပေးတာတော့ မဟုတ်ဘူး — ကျနော်တို့ ဒေသအတွင်း — မဟုတ်မဟတ် သတင်းလုပ်ပြီး တခြားအဖွဲ့တွေကို သတင်းပို့တယ်၊ ပြီးတော့ တပ်ဖွဲ့ နာမည်၊ အထက်လူကြီးတွေရဲ့ နာမည်ကို ထိခိုက်မှုရှိအောင် ပျက်စီးအောင် သတင်းတွေ ဖန်တီးတယ်၊ ကျနော်တို့ တပ်ဖွဲ့ထဲမှာ ခေါ်ယူ ထိန်းသိမ်းထားတာပါ။ အခု သူ့ဖုန်းထဲက သူသတင်းပို့တဲ့ မှတ်တမ်းတွေ ၊ ပုံတွေ ကိုလည်း ကျနော်တို့ စစ်ဆေးတွေ့ရှိထားတယ်၊ နောက်တစ် ရက် နှစ်ရက်ဆိုရင် ဌာနချုပ်ကို သက်သေ အထောက်အထားတွေ နဲ့ အတူ ပို့မှာပါ” – ဟု ပြောသည်။

အဆိုပါ အရပ်သား စေတနာ့ဝန်ထမ်း ကျောင်းဆရာ စိုင်းဟန်ခေးအား အမှတ် (၉) ခရိုင်မှူး စဝ်ကောလိန်၏ အမိန့်ဖြင့် ဖမ်းဆီးခေါ်ဆောင်ခြင်းဖြစ်ကြောင်းလည်း မိသားစု နှင့် နီးစပ်သူ ကဆက်ပြောသည်။

“စဝ်ကော်လိန်က ခေါ်ခိုင်းလို့ ဆိုပြီးတော့ ထွက်သွားတာပဲ၊ ပြီးတော့သူ့ကို ဖမ်းထားလိုက်ပြီ ဆိုတာ နောက်မှ သိရတယ်၊ (၂၀) ရက်နေ့မှာတော့ မိသားစုဝင်နဲ့ နာရီဝက်လောက် တွေ့ခွင့်ပေးခဲ့တယ်၊ သူကအိမ်ထောင် ဦးစီးလည်း ဖြစ်တော့ လွှတ်ပေးစေချင်တယ်၊ သူ့မှာ ငယ်ဆုံးကလေးက ၁ နှစ်ကျော် လေးပဲရှိသေးတယ်” – ဟု ၎င်းက ဆိုသည်။

ဖမ်းဆီးခံရထားရသည့် စိုင်းဟန်ခေးသည် ၁ နှစ်ကျော် ကလေးငယ်တစ်ဦးအပါအဝင် သားသမီး ၃ ဦး၏ ဖခင်၊ အိမ်ထောင်ဦးစီးဖြစ်နေသည့်အတွက် ပြန်လွှတ်ပေးစေလိုသည့်အကြောင်း မိသားစုဝင်များက ပြောဆိုနေကြ သည်။

“လူသစ်စုဆောင်းတဲ့နေရာမှာကော၊ ရာဇဝတ်မှု ကျူးလွန်တဲ့သူတွေကော၊ တခြားပစ်မှု ကျူးလွန်တဲ့သူတွေပါ ကျနော်တို့ တရားမဲ့ မလုပ်ဘူး။ ကျနော်တို့မှာ တရားရေးဌာနရှိတယ်။ ဘာအမှုမဆို ကျနော်တို့ တရား နဲ့ အညီ စီရင်ဆုံးဖြတ်ပါတယ်” – ဟု အတွင်းရေးမှူး ၂ ဒုတိယ ဗိုလ်မှူးကြီး စိုင်းဆု က သျှမ်းသံတော်ဆင့်သို့ ပြောကြားဖူးသည်။

သျှမ်းပြည်သူ ပြည်သား အကျိုးစီးပွားများအား ကာကွယ်ရန်၊ ဆုံးရှုံးနေသည့် သျှမ်းလူထု အခွင့်အရေးအား ပြန်လည်ရယူရန်၊ ပင်လုံကတိကဝတ်အတိုင်း ဖက်ဒရယ်ပြည် ထောင်စုတည်ဆောက်ရန် စသည့်အချက်များ ပါဝင်သည့် ဉီးတည်ချက်ဖြင့် ညောင်ရွှေစော်ဘွား မဟာဒေဝီ စဝ်နန်းဟိန်းခမ်းက ရှမ်းပြည်တပ်မတော် SSA (SSPP) ကို ၁၉၆၄ ဧပြီလ ၂၄ ရက်နေ့တွင် ဖွဲ့စည်းထူထောင်သည်။