သျှမ်းပြည် တောင်ကြီးခရိုင် ဖယ်ခုံမြို့နယ်အတွင်း တိုက်ပွဲဖြစ်ပွားမှုကြောင့် မြို့တွင်း အလုပ်အကိုင် ရှားပါးလာခဲ့ကြောင်း စုံစမ်းသိရှိရသည်။
ဖယ်ခုံမြို့နယ်အတွင်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲဖြစ်ပွားပြီး နောက်ပိုင်း စစ်ကောင်စီ က လက်နက်ကြီး ရမ်းသမ်းပစ်ခတ်မှုကြောင့် ပြည်သူများ ထွက်ပြေးတိမ်းရှောင်ရပြီး နေထိုင်သူများ နည်းပါးလာသောကြောင့် အလုပ်အကိုင် ရှားပါးလာခဲ့ကြောင်း သိရသည်။
ထိုအပြင် မြို့တွင်း နေထိုင်သည့် ပြည်သူများ စားဝတ်နေရေးအတွက် ဖြေရှင်းရန် ခက်ခဲနေလျက်ရှိကြောင်း ဖယ်ခုံမြို့ ဒေသခံ အမျိုးသမီး တစ်ဦး ကပြောသည်။
“အလုပ်တော့ မလုပ်ရဘူး။ ကျမ အမျိုးသားလည်း အရင်လို အလုပ်မလုပ်ရဘူး။ ဝင်ငွေမရှိတော့ဘူး။ တောင်ယာလည်း မလုပ်နိုင်ဘူး။ လယ်ယာလည်း မလုပ်နိုင်တော့ဘူး။ အငှားလည်း မရှိတော့ဘူး။ သူတို့တွေလည်း ထွက်ပြေးသွားတော့ လုပ်တဲ့လူလည်း မရှိတော့ဘူး။ တစ်ချို့တော့ လုပ်ပါတယ်။ ၁၀ ယောက်မှာဆိုရင် ၁ ယောက်လောက်ပဲ လုပ်တော့တယ်။ ကျမတို့က နိုင်ငံခြားထွက်ပြီးတော့ ပိုက်ဆံရှာရတယ် ” ဟု ၎င်းက ပြောသည်။
ထိုကြောင့် စားဝတ်နေရေး အတွက် ပြည်သူများက နိုင်ငံခြားသို့ သွားရောက်ပြီး အလုပ်လုပ်ကိုင်ရကြောင်း သိရသည်။
ထို့အပြင် ဖယ်ခုံမြို့အတွင်း တိုက်ပွဲဖြစ်ပွားမှုကြောင့် နှင့် စစ်ကောင်စီက လက်နက်ကြီး ရမ်းသမ်းပစ်ခတ်မှုကြောင့် ဒေသခံများ တစ်ချို့က ဒေသပြောင်းရွှေ့ နေထိုင်ခဲ့ကြသည်။
“ မြို့ထဲမှာက အရင်လို မဟုတ်တော့ဘူး။ တစ်ချို့ကလည်း ငြိမ်းချမ်းတဲ့ နေရာမှာ သွားနေကြတယ်။ တစ်ချို့ကတော့ ရွာဘက်မှာနေတယ်။ အရင်ကထက်စာရင်တော့ လူတွေက သွားလာတာ ပိုနည်းတယ်။ အာဏာသိမ်းပြီးနောက်ပိုင်း ရပ်ကွက်ထဲကို စစ်တပ်က လက်နက်ကြီးတွေ ပစ်တယ်လေ။ အဲ့ကြောင့် ပြည်သူတွေက ထွက်ပြေးသွားတာ” ဟု ဖယ်ခုံမြို့ ဒေသခံ အမျိုးသမီးက ပြောသည်။
ထိုအပြင် မြို့အတွင်း ပြည်သူများက လိုအပ်မှသာ အပြင်သွားလာမှု ပြုလုပ်ကြောင်း ၊ ဈေးအတွင်း ကုန်သည်များကလည်း နည်းပါးလာကြောင်းလည်း သိရသည်။
“လူတွေကလည်း လိုအပ်မှပဲ အပြင်သွားလာကြတာ။ မလိုရင် မသွားကြတော့ဘူး။ အရင်လို မပျော်ဘူး။ ဈေးထဲဆိုရင် လူတွေမရှိဘူး။ ဈေးသည်တွေကလည်း နည်းလာတယ်။ ၃ ပုံမှာဆိုရင် ၁ ပုံလောက်ပဲရှိတော့တယ်။ မြို့တွင်းမှာဆိုရင် လူတွေက ၅ ပုံဆိုရင် ၃ ပုံလောက်ပဲ ရှိတော့တယ်” ဟု အထက်ပါ အမျိုးသမီးက ပြောသည်။
လက်ရှိတွင်လည်း ဖယ်ခုံမြို့နယ်အတွင်း နေထိုင်သည့်သူများ စိုးရိမ်မှုဖြင့် အမြဲနေထိုင်ရသည်။
“ ညအချိန်ခွေးတွေ ဟောင်ပြီဆိုရင် စစ်သားတွေ ဝင်လာဆွဲမှာ ကြောက်ရတယ်။ လက်နက်ကြီးတွေ ပစ်ခတ်လာမှာကြောက်ရတယ်။ ညတိုင်း လက်နက်ကြီးသံတော့ အမြဲ ကြားနေရတယ်။ မြို့ထဲမှာတော့ မရမ်းကားသေးဘူး။ စစ်သားတွေ လာရမ်းကားရင်တော့ တကယ် ထိတ်လန့်တယ်” ဟု ဖယ်ခုံမြို့ ၂၈ နှစ်အရွယ်ရှိ အမျိုးသမီးက ပြောသည်။
ထိုကြောင့် ဖယ်ခုံမြို့တွင်း နေထိုင်သည့် သူများသည် ရုတ်တရက် တိုက်ပွဲဖြစ်ပွားလာပါက ထွက်ပြေးနိုင်ရန်အတွက် မှတ်ပုံတင်၊အစားသောက် နှင့် အဝတ်စားများကို ကြိုတင် ပြင်ဆင်ထားကြသည်။
ဖယ်ခုံမြို့နယ်အတွင်းတွင် လက်ရှိ စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲဖြစ်ပွားနေလျက်ရှိပြီး စစ်ကောင်စီကလည်း ကျေးရွာတွေဘက် လက်နက်ကြီးများ ပစ်ခတ်နေသည်။
အလားတူ ယနေ့ မတ်လ ၂၄ ရက် နံနက်ပိုင်း အချိန်တွင်လည်း စစ်ကောင်စီက ဖယ်ခုံအင်းအနောက်ဘက်ကမ်းကို လက်နက်ကြီး ပစ်ခတ်ခဲ့ကြောင်း PDF များထံမှ သိရှိရသည်။
Leave a Comments