သျှမ်းပြည် ကွတ်ခိုင်မြို့နယ် မိုင်းယုလေး နှင့် နမ့်ဖက်ကာကြား ရွှေတူးဖော်မှုကြောင့် ဒေသခံများ၏ လယ်ယာ စိုက်ပျိုးမှု အတွက် ရေများ ခမ်းခြောက်မှု ရင်ဆိုင်ကြုံတွေ့နေရကြောင်း စုံစမ်းသိရသည်။
မိုင်းယုလေး နှင့် နမ့်ဖက်ကာကြားရှိ နမ့်မောချောင်း တစ်လျှောက် ပြီးခဲ့သည့် ၂၀၂၂ ခုနှစ် နှောင်းပိုင်း ကာလမှ စတင်ကာ ရွှေတူးဖော်မှုများ စတင် လုပ်ဆောင်လာခဲ့ခြင်း ဖြစ်ပြီး စိုက်ပျိုးရေးအတွက် အသုံးပြုရသည့် ရေများ ခမ်းခြောက်နေကြောင်း ဒေသခံများက သျှမ်းသံတော်ဆင့်ကို ပြောသည်။
“အဲ့နားတစ်ဝိုက်က လယ်တွေတော့ ဒီနှစ်ထဲ စိုက်ပျိုးဖြစ်တော့မယ် မထင်ဘူး၊ ရေမရှိတော့ဘူးလေ၊ ကုမ္ပဏီ တွေက ရွှေတွေတူးနေတာ၊ စက်တွေနဲ့ လာတူးနေတယ်လို့ သိရတယ်၊ အခုချိန်မှာ နမ့်မောချောင်းရဲ့ ရေက ခြေသလုံး လောက်ပဲ ရှိတော့တယ်” ဟု အမည်မဖော်လိုသူ ဒေသခံ အမျိုးသမီးက သျှမ်းသံတော်ဆင့်ကို ပြောသည်။
အဆိုပါ နမ့်မောချောင်းသည် နမ့်ဖက်ကာ နှင့် (၈) မိုင်ခန့် ကွာဝေးပြီး ရွှေတူးဖော်လုပ်ငန်းသည် တစ်ပတ်မှ တစ်ရက်နားကာ ချောင်းရေထဲ ရွှေကျင်လုပ်ငန်းများ အဆက်မပြတ် လုပ်နေကြောင်း ဒေသခံများက ပြောသည်။
အဆိုပါ နမ့်မောချောင်းကို မှီခိုအားထားရသည့် ကျေးရွာများ အနေဖြင့် လင်လိုင်ရွာ၊ ဟိုခိုရွာ၊ မိုင်းယု၊ ပန်လော၊ မန်တုံ၊ ကုန်စုံ၊ ဟိုနားရွာ စသည့် ကျေးရွာများ ဖြစ်နေကြောင်း သတင်းသိရသည်။
“ဘယ်ကုမ္ပဏီက လာပြီး တူးနေတာလဲတော့ မသိဘူး၊ ရေတွေ ခမ်းခြောက် ရင်တော့ ဒေသခံတွေရဲ့ စားဝတ်နေရေး အပိုင်း ထိခိုက်လာတယ်၊ လယ်စိုက်ဖို့အတွက် မိုးရေတစ်ခုတည်းကိုပဲ အားကိုးလို့ မရနိုင်ဘူးလေ၊ ဒါကြောင့် ဒီချောင်းရေသာ မရှိရင် မလွယ်ဘူး” ဟု အထက်ပါ အမျိုးသမီးက ဆက်ပြောသည်။
အဆိုပါ နမ့်မောချောင်း တစ်လျှောက် ရွှေတူးဖော်မှု လုပ်ငန်းများကို တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) နှင့် ကချင်လွတ်မြောက်ရေး တပ်မတော် ( KIA) တို့က ခွင့်ပြုပေးထားကြောင်း သတင်းများ ထွက်ပေါ်သော်လည်း သျှမ်းသံတော်ဆင့်မှ သီးခြား အတည်ပြုနိုင်ခြင်း မရှိသေးပေ။
ကွတ်ခိုင်မြို့နယ်အတွင်းသည် အာဏာသိမ်း စစ်ကောင်စီ အပြင် ၎င်းတို့၏ လက်အောက်ခံ ပြည်သူ့ စစ်တပ်ဖွဲ့များ သွားလာလှုပ်ရှားနေသော်လည်း ယခုလို သဘာဝပတ်ဝန်းကျင် ထိခိုက်မှု ရှိသည်အထိ ပြုလုပ်သည့် ရွှေတူးဖော်မှုများကို တားမြစ် လုပ်ဆောင်ခြင်း မရှိသည့်အပြင် ရှယ်ယာပါဝင်ခြင်းလည်း ရှိနေကြောင်း ဒေသခံများက ပြောသည်။
ကွတ်ခိုင်မြို့နယ် အတွင်းသည် အာဏာသိမ်း စစ်ကောင်စီ တပ်ဖွဲ့ အပြင် တိုင်းရင်းသား လက်နက်ကိုင်များ ဖြစ်ကြသည့် ကချင်တပ်ဖွဲ့ KIA ၊ ကိုးကန့်တပ်ဖွဲ့ MNDAA ၊ တအာင်း (ပလောင်) တပ်ဖွဲ့ TNLA နှင့် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် SSPP/SSA တို့ကလည်း သွားလာလှုပ်ရှားနေကြောင်း သိရသည်။
Leave a Comments