ရှမ်းပြည် တိုးတက်ရေးပါတီ၊ ရှမ်းပြည် တပ်မတော် SSPP/SSA အပါအဝင် မြောက်ပိုင်း မဟာမိတ် တိုင်းရင်းသား လက်နက်ကိုင် တပ်ဖွဲ့ ကိုယ်စားလှယ် အဖွဲ့နှင့် စစ်ကောင်စီ တို့ နေပြည်တော်တွင် တွေ့ဆုံခဲ့ကြောင်း စုံစမ်း သိရသည်။

စစ်ကောင်စီ၏ လက်အောက်ခံ အမျိုးသား စည်းလုံးညီညွတ်ရေး နှင့် ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီ (NSPNC) ၏ ဖိတ်ခေါ် ချက်အရ SSPP/SSA တပ်ဖွဲ့အပါအဝင် မြောက်ပိုင်းမဟာမိတ် တိုင်းရင်းသား လက်နက်ကိုင် တပ်ဖွဲ့ ကိုယ်စားလှယ် အဖွဲ့များက နေပြည်တော် အစည်းအဝေးသို့ တက်ရောက်ခဲ့ခြင်း ဖြစ်ကြောင်း SSPP/SSA ပြောရေးဆိုခွင့် ရှိသူ ဗိုလ်ကြီး သီဟရာဇာက သျှမ်းသံတော်ဆင့်ကို ပြောသည်။

“NSPNC ရဲ့ ဖိတ်ခေါ်ချက် အရ နေပြည်တော်ကို သွားရတာ ဖြစ်ပါတယ်၊ ဖိတ်ခေါ်ချက်ကတော့ အချက် သုံးချက်ကို ဆွေးနွေးဖို့ ဆိုပြီးတော့ ပါတယ်၊ (၁) အချက်က သူတို့ လုပ်မယ့် ရွေးကောက်ပွဲအကြောင်း ၊ (၂) အချက်က ကျနော်တို့ ဘက် တင်ပြထားတဲ့ ၂၀၀၈ ပြင်ဆင်ရေး၊ (၃) အချက်က ငြိမ်းချမ်းရေးအကြောင်း ဖြစ်တယ်၊ ဒါတွေကို ဆွေးနွေးဖို့ အတွက် ကိုယ်စားလှယ် အဖွဲ့တွေက နေပြည်တော်ကို သွားတာ ဖြစ်ပါတယ်” ဟု ဗိုလ်ကြီး သိဟရာဇာက သျှမ်းသံတော်ဆင့်ကို ပြောသည်။

ပြီးခဲ့သည့် မတ်လ ၂၀ ရက်တွင် SSPP/SSA ကိုယ်စားလှယ် အဖွဲ့အပါအဝင် မြောက်ပိုင်း တိုင်းရင်းသား လက်နက်ကိုင် မဟာမိတ်တပ်ဖွဲ့တို့၏ ကိုယ်စားလှယ်အဖွဲ့များ ခရီးစတင် ထွက်ခွာခဲ့ပြီး ယနေ့ (မတ်လ ၂၂) ရက်၌ စစ်ကောင်စီ တပ်ဖွဲ့နှင့် စတင်ဆွေးနွေးရခြင်း ဖြစ်ကြောင်း သိရသည်။

ယခုတစ်ကြိမ် တွေ့ဆုံမှုသည် အာဏာသိမ်း စစ်ကောင်စီ ဦးဆောင်သည့် NSPNC အဖွဲ့နှင့် SSPP/SSA တို့အကြား တတိယ အကြိမ်မြောက် တွေ့ဆုံဆွေးနွေးမှုဖြစ်ကြောင်းလည်း ဗိုလ်ကြီး သီဟရာဇာက သျှမ်းသံတော်ဆင့်ကို ဆက်ပြောသည်။

“အခုတကြိမ် တွေ့ဆုံမှုကတော့ တတိယ အကြိမ်မြောက်ပေါ့နော်၊ SSPP/SSA နဲ့အတူ ပန်ဆန်းက UWSA ၊ မိုင်းလား က NDAA တို့လည်းပါမယ်လို့ သတင်းသိရတယ်၊ အသေးစိတ်ကိုတော့ ကျနော် မသိရဘူး” ဟု ဗိုလ်ကြီး သီဟရာဇာက သျှမ်းသံတော်ဆင့်ကို ပြောသည်။

ပြီးခဲ့သည့် မတ်လ ၁၆ – ၁၇ ရက်တွင်လည်း SSPP/SSA ၊ UWSA၊ MNDAA၊ AA၊ TNLA ၊ NDAA နှင့် KIA တို့ပါဝင်သည့် ပြည်ထောင်စုနိုင်ငံရေး ဆွေးနွေး ညှိနှိုင်းရေး ကော်မတီ (FPNCC) မြောက်ပိုင်းမဟာမိတ် တိုင်းရင်းသား လက်နက်ကိုင် တပ်ဖွဲ့တို့သည် ပန်ဆန်းမြို့၌ တွေ့ဆုံဆွေးနွေးမှု ပြုလုပ်ခဲ့သည်။

ထို့အပြင် ယခု မတ်လ ကုန်ပိုင်းတွင် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ် ရေးထိုးထားသည့် အပစ်ရပ် တိုင်းရင်းသား လက်နက်ကိုင် တပ်ဖွဲ့ (၇) ဖွဲ့ တို့သည် စစ်ကောင်စီ နှင့် အလွတ်သဘော ဆွေးနွေးရန်ရှိကြောင်းလည်း သိရသည်။

ပြီးခဲ့သည့် ၂၀၂၂ ခုနှစ်၊ ဒီဇင်ဘာလတွင် ကျင်းပပြုလုပ်ခဲ့သည့် နိုင်ငံတကာ မြန်မာသတင်းအဖွဲ့ (BNI) မြန်မာ့ ငြိမ်းချမ်းရေး စောင့်ကြည့်လေ့လာရေး အဖွဲ့၏ သုတေသီ စာတမ်းအရ စစ်အစိုးရ ခေတ်အဆက်ဆက်သည် ငြိမ်းချမ်းရေး ဆွေးနွေးမှု ခေါ်ယူသည့် အချိန်တိုင်း မြေပြင်ရှိ တိုင်းရင်းသား လက်နက်ကိုင် တပ်ဖွဲ့များနှင့် ထိတွေ့ တိုက်ပွဲ အစဥ်ဖြစ်ပွားနေကြောင်းလည်း သိရသည်။

ငြိမ်းချမ်းရေးခေါင်းစဥ်ဖြင့် စစ်ကောင်စီမှ တိုင်းရင်းသား လက်နက်ကိုင် တပ်ဖွဲ့များ(EAO/ERO) ထံ ချည်းကပ်ပုံ သည် (EAO/ERO) အား တစ်ဖွဲ့ချင်းဖြစ်စေ၊ စုဖွဲ့ထားသည့် တပ်ပေါင်းစု ဖြစ်စေ ညီညွှတ်မှု ပျက်ပြားစေရန် ခွဲခြား ဆက်ဆံခြင်း၊ သပ်လျှိုသွေးခွဲနည်းလမ်းများကို အသုံးပြုပြီး ချည်းကပ်လေ့ရှိသည်ဟု စာတမ်းတွင် ထုတ်ပြန် ပြောဆိုထားသည်။