Sunday, May 26, 2024

ပင်လုံမြို့အတွင်း သူခိုးများ ပြန်လည် သောင်းကျန်းလာ

Must read

သျှမ်းပြည် လွိုင်လင်ခရိုင် ပင်လုံမြို့အတွင်း ယခုရက်ပိုင်း သူခိုးများ ပြန်လည် သောင်းကျန်းနေကြောင်း စုံစမ်းသိရှိရသည်။

ပင်လုံမြို့

ပြီးခဲ့သည့် မတ်လ ၁၇ ရက် နံနက် ၂ နာရီ ဝန်းကျင်တွင် ပင်လုံမြို့ ရပ်ကွက် ၄ အတွင်းရှိ နေအိမ်တစ်လုံးထဲသို့ ဓားကိုင်ဆောင်ထားသည့် သူခိုးက ဖောက်ဝင်လာပြီး ပစ္စည်းဝင်လာခိုးခဲ့ကြောင်း သိရသည်။

“ သူခိုးက မနက် ၂ နာရီ အိမ်ထဲဖောက်ဝင်လာတာ။ ကျနော်တို့ တံခါးကို ဖောက်ဝင်လာပြီးတော့ အမေရဲ့ အခန်းထဲဝင်သွားတာ။ သူလက်ထဲမှာ ဓားကိုင်ထားတယ်။ ကျနော့် အမေကလည်း နိုးလာတော့ မအော်နဲ့တဲ့ ။ အဲ့လိုပြောပြီးတော့ တွေ့တာကို ယူသွားတာ။ ဖုန်းဗူးခွံပဲ ရသွားတယ် ” ဟု ကိုယ်တိုင်ကြုံတွေ့ခဲ့ရသည့်သူက ပြောသည်။

လက်ရှိ ပင်လုံမြို့တွင်လည်း မတ်လ ဒုတိယပတ်မှစ လောင်းကစားဝိုင်းများကို ပြန်လည် ဖွင့်လှစ်နေလျက်ရှိ ကြောင်း သိရသည်။

ထိုသို့ လောင်းကစားဝိုင်းများပြားလာသည့် အတွက်ကြောင့် သူခိုး၊ ဓားပြများလည်း ပေါများလာကြောင်း ဒေသခံများ ပြောပြချက်အရ သိရသည်။

ပင်လုံမြို့

“ အခုက အရမ်းကို ကြောက်စရာကောင်းတယ်။ သူခိုးတွေကလည်း အများကြီးပဲ။ သူတို့က အဖွဲ့လိုက် ရှိနေတယ်။ ပြီးတော့ အမြဲတမ်း စောင့်ကြည့်နေကြတာ။ ရပ်ကွက် ၄ မှာဆိုရင် ခဏခဏ အိမ်ခိုးဖောက်ခံရတာတွေ အမြဲရှိနေတယ်။ လောင်းကစားဝိုင်းကလည်း ပြန်ဖွင့်ပြီလေ။ လောင်းကစားများလာတော့ သူခိုးတွေလည်း များလာတယ်”ဟု ပင်လုံမြို့ ဒေသခံ တစ်ဦးက ပြောသည်။

လောင်းကစားဝိုင်းများ ပြန်ဖွင့်လှစ်လာသည့်အတွက်ကြောင့် ပင်လုံမြို့ ဒေသခံများကလည်း သူခိုးများ ပြန်ပေါများလာမည်ကို စိုးရိမ်နေလျက်ရှိကြောင်း သိရသည်။

ထိုအပြင် သူခိုးများကို တာဝန်ရှိ လုံခြုံရေး ရဲတပ်ဖွဲ့များကလည်း ဖမ်းဆီးအရေးယူ ပေးခြင်း မရှိသည့် အတွက်ကြောင့် ပြည်သူများက ယခင်ကထက် ပိုစိုးရိမ်ရကြောင်း အထက်ပါ အိမ်ဖောက်ခံရသည့် သူက ပြောသည်။

“လောင်းကစားဝိုင်းက ပြန်ဖွင့်လာပြီဆိုတော့ သူခိုးကတော့ ပြန်များလာတော့မယ်။ နဂိုကတည်းက သူခိုးတွေ တော့ ရှိပါတယ်။ လောင်းကစားဝိုင်းမှာ ရှုံးလာရင် လာခိုးကြတယ်။ အခုဆိုရင် ပိုကြောက်ရတာက ဓားတွေလည်း ပါလာတယ်။ လူကို တစ်ခုခု လုပ်မှာလည်း ကြောက်ရတယ်။ ပြီးတော့ ရဲတွေကလည်း လုံခြုံရေး မယူပေးဘူးလေ။ ကျနော်တို့ ပြည်သူကိုယ်တိုင်ကပဲ လုံခြုံရေးအသင်း ဖွဲ့ရမဲ့ ပုံရတယ်” ဟု ၎င်းက ပြောသည်။

စစ်တပ်က အာဏာသိမ်းပြီး ၂ နှစ်သာ ကာလအတွင်း သျှမ်းပြည်အတွင်း လောင်းကစားဝိုင်း ၊ သူခိုး၊ မူးယစ်ဆေးဝါး နှင့် ဓားပြတိုက်မှုကလည်း ပိုများပြားလာပြီး လက်ရှိ နိုင်ငံ အာဏာယူထားသည့် အစိုးရကလည်း တာဝန်ယူ ဖြေရှင်းမှုမရှိပေ။

Leave a Comments

- Advertisement -spot_img

Latest article