ရှမ်းတိုင်းရင်းသားများ ဒီမိုကရေစီ အဖွဲ့ချုပ် SNLD (ကျားခေါင်းပါတီ) သည် အာဏာသိမ်း စစ်ကောင်စီ၏ ရွေးကောက်ပွဲ ကော်မရှင် UEC ထံ နိုင်ငံရေးပါတီ တင်သွင်းမည် မဟုတ်ကြောင်း သတင်းရရှိသည်။

ယမန်နေ့ မတ်လ (၁၆) နှင့် (၁၇) ရက် နှစ်ရက်လုံး ကျင်းပပြုလုပ်ခဲ့သည့် SNLD ပါတီ၏ ဗဟိုကော်မတီ အစည်းအဝေးအရ SNLD ပါတီသည် နိုင်ငံရေးပါတီ မှတ်ပုံတင်မည်မဟုတ်ဟု ဆုံးဖြတ်ခဲ့ကြောင်း ပါတီ၏ အထွေထွေ အတွင်းရေးမှူး စိုင်းလိတ်က သျှမ်းသံတော်ဆင့်ကို ပြောသည်။

“ကျနော်တို့ ဗဟိုကော်မတီ အစည်းအဝေး ထိုင်ဖြစ်တယ်၊၊ အစည်းဝေးမှာတော့ ပါတီ ဆက်လက် မှတ်ပုံတင်ရေး မတင်ရေးနဲ့ ပတ်သက်ပြီးတော့မှ ဆွေးနွေး ဖြစ်ခဲ့ကြတယ်။ အစည်းဝေး တက်ရောက်တဲ့ CEC အားလုံးရဲ့ သဘောထားအရ SNLD ပါတီကို ဒီနှစ်လအတွင်းမှာ ဆက်လက် မှတ်ပုံတင်ဖို့ မဖြစ်နိုင်သေးဘူး။ ဒါကြောင့်မို့ မတင်ဖြစ်ဘူးလို့ ဆုံးဖြတ်ခဲ့ပါတယ်” ဟု SNLD ပါတီ၏ အထွေထွေ အတွင်းရေးမှူး စိုင်းလိတ်က သျှမ်းသံတော်ဆင့်ကို ပြောသည်။

ရှမ်းတိုင်းရင်းသားများ ဒီမိုကရေစီ အဖွဲ့ချုပ် SNLD ပါတီ၏ ဗဟိုကော်မတီ အစည်းအဝေးနှင့် ပတ်သက်ပြီး သျှမ်းသံတော်ဆင့်မှ ဆက်သွယ်မေးမြန်းရာတွင် ပါတီ၏ အထွေထွေ အတွင်းရေးမှူး စိုင်းလိတ်က သျှမ်းသံတော်ဆင့်ကို ပြောဆိုခဲ့ခြင်း ဖြစ်သည်။

သက်ဆိုင်ရာ တာဝန်ရှိသူများမှ ရွေးကောက်ပွဲ ကျင်းပပြုလုပ်မည့် အချိန်ကာလကို တိတိကျကျ ထုတ်ပြန်ပြောဆိုခြင်း မရှိသည့် အတွက်ကြောင့် နိုင်ငံရေး ပါတီ အဖြစ် မှတ်ပုံတင် မပြုလုပ်ခြင်း ဖြစ်သည် ဟု စိုင်းလိတ်က ဆက်လက်ပြောဆိုထားသည်။

“အခု ကျနော်တို့ ပါတီ မှတ်ပုံတင် ဆက်မတင်ဖြစ်တဲ့ အကြောင်းရင်းထဲမှာ သက်ဆိုင်ရာ အနေနဲ့ ရွေးကော်ပွဲကို ဘယ်တော့ လုပ်မလဲဆိုတာကို တိကျကြေညာထားခြင်း မရှိတာဟာလည်းပဲ ပြဿနာတစ်ခုဖြစ်တယ်။ အဲ့လို မကြေညာသေးဘဲနဲ့၊ မပြဌာန်းသေးပဲနဲ့ ကျနော်တို့ နိုင်ငံရေးပါတီတွေကို ကြိုတင်ပြီးတော့ နိုင်ငံရေးပါတီ မှတ်ပုံတင်ခိုင်းတာကလည်း နည်းလမ်းကျတယ်လို့ ကျနော်တို့မမြင်ဘူး၊ အဲ့အခြေအနေဖြေရှင်းဖို့ လိုနေတဲ့ ကာလမှာ ကျနော်တို့ နိုင်ငံရေး ဘာဆက်လုပ်မလဲ ဆိုတာကတော့ နောက်တစ်ပိုင်း စဥ်းစားရမယ်လို့ သုံးသပ်ပါတယ်” ဟု စိုင်းလိတ်က ဆက်ဆိုသည်။

ရှမ်းတိုင်းရင်းသားများ ဒီမိုကရေစီ အဖွဲ့ချုပ် SNLD ပါတီသည် စစ်ကောင်စီ လက်အောက်ခံ UEC ထံသို့ ပါတီ မှတ်ပုံတင်ခြင်း မပြုလုပ်သော်လည်း တခြားနည်းလမ်းများဖြင့် နိုင်ငံရေးကို ဆက်လက် လုပ်ဆောင်နိုင်ဖို့ မျှော်လင့်ထားကြောင်း သိရသည်။

လက်ရှိတွင် စစ်ကောင်စီ ရွေးကောက်ပွဲ ကော်မရှင်ထံ လျှောက်ထားသည့် နိုင်ငံရေးပါတီ စုစုပေါင်း ၂၁ ပါတီ ရှိနေပြီး ပြည်ထောင်စု တစ်ဝန်းလုံး စည်းရုံးမည့် နိုင်ငံရေးပါတီ ၅ ပါတီ၊ ပြည်နယ်တစ်ခု အတွင်း စည်းရုံးမည့် နိုင်ငံရေး ပါတီ ၁၆ ပါတီအထိ ရှိထားကြောင်း စစ်ကောင်စီက ထုတ်ပြန်ထားသည်။