FPNCC အဖွဲ့များ ပန်ဆန်းဆွေးနွေးမှုအပြီး တရုတ်ပြည် ကူမင်းသို့ သွားရန် စီစဥ်ထား

တိုင်းရင်းသား လက်နက်ကိုင် (၇) ဖွဲ့ဖြင့် ဖွဲ့စည်းထားသည့် ပြည်ထောင်စုနိုင်ငံရေး ဆွေးနွေး ညှိနှိုင်းရေး ကော်မတီ (FPNCC) အဖွဲ့ မြောက်ပိုင်းမဟာမိတ်တပ်ဖွဲ့တို့သည် သျှမ်းပြည် ပန်ဆန်းဆွေးနွေးမှုအပြီး တရုတ်ပြည် ကူမင်းသို့ ဆက်သွားရန် အစီအစဥ်ရှိကြောင်း သတင်း သိရသည်။

မတ်လ ၁၅ – ၁၆ နှစ်ရက်သာ ပြုလုပ်သည့် ပန်ဆန်းမြို့မှ FPNCC အဖွဲ့ တွေ့ဆုံဆွေးနွေးမှု နှင့် ပတ်သက်ပြီး FPNCC အဖွဲ့ဝင် ဖြစ်သည့် ကချင်လွတ်မြောက်ရေး တပ်မတော် KIO/KIA ၏ ပြောရေးဆိုခွင့်ရှိသူထံသို့ ဆက်သွယ်မေးမြန်း ရာတွင် သိရှိရခြင်း ဖြစ်သည်။

“FPNCC ရဲ့ ဆွေးနွေးမှု ထုတ်ပြန်ချက်တော့ တွေ့ရပါတယ်၊ ဒါပေမဲ့ ဆွေးနွေးပွဲ တက်ရောက်တဲ့ ကိုယ်စားလှယ် အဖွဲ့တွေက ပြန်မရောက်သေးတော့ အသေးစိတ် အချက်အလက်တွေကို မသိရသေးဘူး၊ ဒီကနေ တစ်ဆင့် နောက်တကြိမ် ကူမင်းကို သွားမယ်ဆိုတာကတော့ ကျနော်လည်း အတည်မပြုနိုင်သေးဘူး” ဟု KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက သျှမ်းသံတော်ဆင့်ကို ပြောသည်။

ပြီးခဲ့သည့် မတ်လ ၁၅ နှင့် ၁၆ ရက်တွင် သျှမ်းပြည် UWSA ထိန်းချုပ်ရာ နယ်မြေဖြစ်သည့် ပန်ဆန်းမြို့၌ FPNCC တို့က တွေ့ဆုံခဲ့ပြီး၊ အဆိုပါ တွေ့ဆုံမှု အပြီး၌ အချက် ၇ ချက်ပါသည့် ထုတ်ပြန်ချက်ကိုလည်း ထုတ်ပြန်ခဲ့သည်။

အဆိုပါ ထုတ်ပြန်ချက်တွင် ပြည်မ နှင့် တိုင်းရင်းသားဒေသ ငြိမ်းချမ်းရေးတည်ဆောက်ဖို့ လူနည်းစု တိုင်းရင်းသားများ၏ အင်အား နှင့် အစွမ်းအစများကိုသာ အားကိုးကြရမှာဖြစ်ကြောင်း ပြောဆိုထုတ်ပြန်ထားသည်။

ထို့အပြင် ပြည်တွင်းရေး ပဋိပက္ခ ချုပ်ငြိမ်းရန် နှင့် နယ်စပ်ဒေသ တည်ငြိမ်ရန်အတွက် တရုတ်အစိုးရနှင့်လည်း ဆက်လက် လက်တွဲလုပ်ကိုင်သွားမည်ဖြစ်ကြောင်း ထုတ်ပြန်ထားသည်။

တွေ့ဆုံဆွေးနွေးမှုကို FPNCC အဖွဲ့ဝင် (၇) ဖွဲ့ ဖြစ်ကြသည့် ကချင်လွတ်မြောက်ရေး တပ်မတော် (KIA) မှ ဗိုလ်မှူးကြီး နော်ဘူ ၊ ရက္ခိုင့်တပ်တော် (AA) စစ်ဦးစီးချုပ် ဗိုလ်ချုပ် ထွန်းမြတ်နိုင်၊ တအာင်းအမျိုးသားလွတ်မြောက်ရေး တပ်မတော် (TNLA) ဥက္ကဋ္ဌ တာအိုက်ဖုန်း၊ ရှမ်းပြည်တိုးတက်ရေးပါတီ (SSPP)၊ အမျိုးသား ဒီမိုကရက်တစ်မဟာမိတ် တပ်မတော် (NDAA) မိုင်းလား၊ မြန်မာအမျိုးသား ဒီမိုကရက်တစ် မဟာမိတ် တပ်မတော် (MNDAA) နှင့် “ဝ” ပြည်သွေးစည်း ညီညွတ်ရေးပါတီ (UWSP) တို့ တက်ရောက်ခဲ့သည်။

ပြီးခဲ့သည့် ဒီဇင်ဘာလ နှင့် ဖေဖော်ဝါရီလအတွင်း FPNCC အဖွဲ့ဝင်များ နှင့် တရုတ်နိုင်ငံခြားရေးဌာန အာရှရေးရာ အထူးကိုယ်စားလှယ် မစ္စတာ တိန့်ရှီးဂျွန် (Deng Xijun) တို့ တွေ့ဆုံခဲ့ပြီးနောက် FPNCC တပ်ဖွဲ့ဝင်များ အချင်းချင်း တွေ့ဆုံခဲ့ကြခြင်း ဖြစ်သည်။