Saturday, September 30, 2023

ဆီဆိုင်မြို့နယ် အမျိုးသားတစ်ဦးကို ဖုန်းခိုးမှုဖြင့် စွပ်စွဲပြီး ဌာနေပြည်သူ့စစ် ရိုက်နှက် သေဆုံး

Must read

သျှမ်းပြည် တောင်ကြီးခရိုင် ဆီဆိုင်မြို့နယ် နောင်မွန်ကျေးရွာအုပ်စု နယ်မြေ (၅) ရပ်ကွက်တွင် နေထိုင်သည့် အမျိုးသားတစ်ဦးကို ဖုန်းခိုးသည်ဟု စွပ်စွဲကာ နောင်မွန်ဌာနေပြည်သူ့စစ်မှ ရိုက်နှက်ပြီး သေဆုံးသွားကြောင်း စုံစမ်းသိရှိရသည်။

သေဆုံးသွားသည့် အမျိုးသား

ဖြစ်စဉ်မှာ (မတ်လ ၇ ရက်) ညနေပိုင်းမှစပြီး နယ်မြေ (၅) ရပ်ကွက်အတွင်း နေထိုင်သည့် အသက် (၃၈) နှစ် မောင်ကျော်မျိုးနိုင် (ခ) အန့်ကူ ကို ဖုန်းခိုးမှုနှင့် ပတ်သက်ပြီး နောင်မွန်ဌာနေပြည်သူ့စစ်မှ ဖမ်းဆီးခေါ်ဆောင်သွားကာ ဌာနေပြည်သူ့စစ် ခေါင်းဆောင် စိုင်းဇေယျာဦး၏ အိမ်၌ တုတ်ဖြင့် ရိုက်နှက်ခဲ့ကြောင်း နောင်မွန်ဒေသခံ အသက် ၂၀ နှစ် အမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ ရိုက်နှက်ခြင်းခံရပြီးနောက် (မတ်လ ၉ ရက်) တွင် မောင်ကျော်မျိုးနိုင် (ခ) အန့်ကူ ပြန်လည် လွတ်မြောက်လာခဲ့ပြီး (မတ်လ ၁၃ ရက်) ညနေ ၅ နာရီတွင် ရိုက်နှက်ခံထားရသည့် အတွင်းဒဏ်ရာများဖြင့် သေဆုံးသွားခဲ့ကြောင်း ၎င်းကဆက်ပြောသည်။

“နောင်မွန် လှေဆိပ်နားက ပြည်သူ့စစ် ခေါင်းဆောင် အိမ်မှာ ခြောက်ပေါက်ထဲ ထည့်ထားတယ်။ သူ့တို့ လူကို ရိုက်တာ နောင်မွန်ပလီ အထိတောင် အော်သံတွေ ကြားရတယ်။ ပြည်သူ့စစ်ခေါင်းဆောင် ရိုက်တာတော့ နည်းနည်း၊ သူ့လက်အောက်ခံက ရိုက်တာများများပေါ့။ မျက်နှာ၊ ကျောကုန်း၊ တင်ပါးတွေမှာ ရိုက်ခံရတဲ့ ဒဏ်ရာနဲ့ ၄ ရက်လောက် အကြာမှာ အတွင်းဒဏ်ရာနဲ့ ဆုံးသွားတယ် “ ဟု ၎င်းက ပြောသည်။

မောင်ကျော်မျိုးနိုင် (ခ) အန့်ကူသည် ဖုန်းကို မခိုးခဲ့ရကြောင်း ၎င်း မိသားစုဝင်မှ ပြောဆိုခဲ့သော်လည်း ဌာနေပြည်သူ့စစ်မှ စွပ်စွဲပြီး ရိုက်နှက်ခဲ့ကြောင်း သိရသည်။

သေဆုံးသွားသည့် အမျိုးသား

“ဖုန်းခိုးတဲ့သူက သပ်သပ်တစ်ယောက်၊ သူတို့ ဖမ်းတဲ့သူက သပ်သပ်တစ်ယောက်။ အဲ့ဖုန်းခိုးတဲ့ လူကတော့ ပြေးသွားပြီ။ ဖုန်းခိုးတဲ့ သူရဲ့ အမေကလည်း ပိုက်ဆံလျော်ထားပြီ။ ဖုန်းတစ်လုံးကို ၃ သိန်းလျော်ထားတယ်။ ဆိုင်ကယ်ကိုလည်း သူတို့သိမ်းထားတယ်။ အခုက လူမှားဖမ်းတာလို့ ပြောကြတယ်။ အန့်ကူ ဆိုတဲ့လူက ဆေးသုံးတယ် ဆိုတော့ သူတို့ထင်ရင် ထင်ကောင်းမှာဘဲ။ အဲ့ကြောင့် အခုလို ဖမ်းပြီး ရိုက်နှက်ခဲ့တာ “ ဟု ၎င်း အမျိုးသားတစ်ဦးက ထပ်လောင်းပြောသည်။

ထို့အပြင် ရိုက်နှက်မှုမှတစ်ဆင့် သေဆုံးသွားရသည့် မှုခင်းနှင့် ပတ်သက်ပြီး သတင်းပေါက်ကြားသွားပါက သတင်းပေးသူကို ဖမ်းဆီးထောင်ချမည်ဟုလည်း နောင်မွန်ဌာနေ ပြည်သူ့စစ်မှ ခြိမ်းခြောက်ထားသည်။

“အဲ့ဖုန်းခိုးတဲ့ တစ်ယောက်က တကယ်ခိုးတယ် ထားအုံး။ တကယ်ခိုးရင် သက်ဆိုင်ရာ ရဲတပ်ဖွဲ့နဲ့ လုပ်ရမှာလေ။ လူတစ်ယောက်ကို သေတဲ့အဆင့်ထိလောက်တော့ ရိုက်နှက် ဖို့မလိုပါဘူး။ ဒါက သူတို့သက်ဆိုင်ရာ မရှိတဲ့အတိုင်း ဖြစ်သွားပြီ။ နောင်မွန်မှာ ဉက္ကဌ လည်းရှိတယ်၊ ရဲလည်းရှိတယ်။ အဲ့ဒါကို လုပ်ထုံးလုပ်နည်း မလုပ်ဘဲ သတ်လိုက်တယ်ဆိုတော့ နောင်မွန်မှာက ဉပဒေတွေ မရှိတော့ဘူး “ ဟု နောင်မွန်ဒေသခံ အသက် ၃၀ နှစ် အမျိုးသားတစ်ဦးက ပြောသည်။

အလားတူ ပြီးခဲ့သည့် ၂၀၂၂ ခုနှစ် (အောက်တိုဘာ ၁၇ ရက်) နောင်မွန်ကျေးရွာအုပ်စု ဟိုနောင်ကျောင်းတိုက်တွင် အရက်မူးသူ ဂျွန်အောင် နှင့် နောင်မွန်ဌာနေပြည်သူ့စစ် ကိုဒုံးညို တို့သည် အချင်းချင်း ရန်ခိုက်မှု ဖြစ်ပွားရာကနေ ပြည်သူ့စစ်ဖက်မှ သေနတ်ဖောက်ပြီး နှစ်ဦးစလုံး ထိခိုက်ဒဏ်ရာရရှိခဲ့ကြောင်း သိရသည်။

Leave a Comments

- Advertisement -spot_img

Latest article