သျှမ်းပြည် တောင်ကြီးခရိုင် ရွာငံမြို့နယ် နမ့်ပန်ရွာရှိ ပြည်ထောင်စု ကားလမ်းမပေါ်တွင် သံဃာတော်တစ်ပါး မောင်းနှင်လာသော ကားတစ်စီး တိမ်းမှောက်မှု ဖြစ်ပွားကြောင်း စုံစမ်း သိရှိရသည်။
ဖြစ်စဉ်မှာ ယနေ့ (မတ်လ ၁၅ ရက်) မနက်ပိုင်း ၉ နာရီအချိန်၌ ရွာငံမြို့ မှ မိုးမိတ်မြို့သို့ သွားရောက် အလှူဒါန်း ပြုလုပ်မည့် ဦးဇင်း (၂) ပါး နှင့် ကိုရင် ၁ ပါးသည် ရွာငံမြို့နယ် နမ့်ပန်ရွာ ပြည်ထောင်စုလမ်းမပေါ်ရှိ ဆိုင်ကယ်တစ်စီးကို ရှောင်တိမ်းရာကနေ တိမ်းမှောက်သွားကြောင်း ဆရာတော် တစ်ပါးက သျှမ်းသံတော်ဆင့်ကို ပြောသည်။
“ဆိုင်ကယ် တစ်စီးကို ရှောင်ရာကနေ မှောက်သွားတာ။ အရှေ့က ဆိုင်ကယ်တစ်စီး ဖြတ်ကွေ့ သွားလို့ သူ့ကို ရှောင်ရင်း မှောက်သွားတာ။ ဘုန်းဘုန်းကော ကိုရင်ကော ဘာမှမဖြစ်သွားဘူး။ ကားတွေတော့ အကုန်ပျက်သွားတယ်။ ကားထဲမှာ သူတို့ ၃ ပါးပဲရှိတယ် “ ဟု ၎င်းက ပြောသည်။
တိမ်းမှောက်သွားသည့် ကားအမျိုးအစားသည် Toyota Wish (အဖြူရောင်) အမျိုးအစားဖြစ်ကြောင်းလည်း သိရသည်။
အဆိုပါ ယာဉ်တိမ်းမှောက်မှု ဖြစ်ပွားပြီးနောက် ကျေးရွာအနီးရှိ ရွာသားများ လာရောက် ကူညီပေးခဲ့ပြီး ဦးဇင်း (၂) ပါး နှင့် ကိုရင် ၁ ပါး သည် ထိခိုက်ဒဏ်ရာ အနည်းငယ်ဖြင့် အသက်အန္တရာယ်မှ ဘေးလွတ်မြောက်ခဲ့ကြောင်း သိရသည်။
Leave a Comments