သျှမ်းပြည်အရှေ့ပိုင်း တာချီလိတ် – ကျိုင်းတုံကားလမ်းပေါ်ရှိ တာလေမြို့နယ် နားယောင်းအုပ်စု ပါခမ်းနွဲ့ကျေးရွာတွင် ယာဉ်တစ်စီး တိမ်းမှောက်ပြီး နမ့်လင်းချောင်းထဲသို့ ထိုးကျကာ ကလေးအပါအဝင် ၄ ဦး သေဆုံးသွားကြောင်း စုံစမ်းသိရှိရသည်။
ယနေ့ အောက်တိုဘာ ၁ ရက် နံနက် ၆ နာရီတွင် တာချီလိတ်မြို့မှ မိုင်းယောင်းမြို့သို့ အရှိန်ပြင်းထန်စွာဖြင့် မောင်းနှင်လာသော ကားတစ်စီး နမ့်လင်းချောင်းထဲသို့ ထိုးကျသွားရာ ယာဉ်ပေါ်မှ လိုက်ပါလာသော လူ ၆ ဦး အနက် ကလေးအပါအဝင် ၄ ဦး သေဆုံးသွားကြောင်း တာလေမြို့ လောကပါလ ပရဟိတအသင်းမှ တာဝန်ရှိသူတစ်ဦးက ပြောသည်။
“ဗီဂိုကား (Vigo) တစ်စီးက တာချီလိတ်မြို့ကနေ မိုင်းယောင်းမြို့ကို မောင်းလာတာ။ ကလေး (၁) ယောက် နဲ့ အမျိုးသား (၁) ယောက်ရယ်၊ အမျိုးသမီး (၂) ယောက် ဆုံးသွားတာ။ ကျန်တဲ့ ကားဆရာ နဲ့ အမျိုးသမီး (၁) ယောက်တော့ ထိခိုက် ဒဏ်ရာရသွားတယ် “ ဟု တာလေမြို့ လောကပါလ ပရဟိတ အသင်းမှ တာဝန်ရှိသူ တစ်ဦးကပြောသည်။
အဆိုပါ ယာဉ်တိမ်းမှောက်ပြီး ၎င်းယာဉ်ပေါ်မှ လိုက်ပါလာသော လူ (၆) ဦးမှာ တာချီလိတ် မယ်ခေါင်ရပ်ကွက်မှ မိသားစုဝင်များ ဖြစ်ကြောင်း သိရသည်။
ပြီးခဲ့သည့် စက်တင်ဘာလထဲတွင် တာလေမြို့မှာ မော်တော်ယာဉ်များ မကြာခဏ တိမ်းမှောက်ကာ သက်ဆိုင်ရာဌာနများက ယာဉ်စည်းကမ်း၊ လမ်းစည်းကမ်း ဟောပြောပွဲများကို ပြုလုပ်ပေးစေလိုကြောင်း ၎င်းအထက်ပုဂ္ဂိုလ်တစ်ဦးက ထပ်လောင်းပြောသည်။
