သျှမ်းပြည်အရှေ့ပိုင်း၊ မိုင်းယောင်းမြို့နယ်တွင် မိုင်းယောင်းခရိုင် အုပ်ချုပ်ရေးမှူးမှ ရွှေတူးဖော်ရေးကုမ္ပဏီတစ်ခုအား တူးဖော်ခွင့် သက်တမ်းကုန်ဆုံးသွားသော်လည်း ဆက်လက်တူးဖော်ခွင့်ပြုနေကြောင်း စုံစမ်းသိရှိရသည်။
မိုင်းယောင်းမြို့နယ်၊ မိုင်းယုမြို့အနီး ဝမ်တတ်စန့်ရွာနားတွင် ရွှေနဂါးရွှေတူးဖော်ရေးကုမ္ပဏီ အား ရွှေတူးဖော်ခွင့် သက်တမ်း ၅ နှစ်ပြည့်သွားသော်လည်း ဆက်လက်တူးဖော်ခွင့်ပြုနေကြောင်း ဒေသခံတစ်ဦးက သျှမ်းသံတော်ဆင့်သို့ ပြောသည်။
“အုပ်ချုပ်ရေးမှူးနဲ့ စစ်တပ်ပေါင်းပြီး ခွင့်ပြုပေးထားတယ်၊ ဆီဘောက်ဆာကားနဲ့ တစ်ရက်ကို ၂ စီး အဝင်အထွက်ရှိနေတယ် အပြင်လူလည်းပေးမဝင်ဘူး၊ နေ့နေ့ ညည တူးနေကြတာ၊ လူကြီးလာတုန်းက ခွင့်ပြုပေးထားပြီး လူတွေမမြင်အောင်တူးနေကြတယ်” ဟု ၎င်းမှပြောသည်။
ရွှေတူးဖော်ရေးလုပ်ကွက်များကြောင့်လည်း သစ်တောများပြုန်းတီးလာပြီး မိုင်းယောင်းမြို့နယ် တွင် ရေကြီးရေလျှံမှုများပါဖြစ်ပေါ်နေလျက်ရှိသည်။ သျှမ်းပြည်အရှေ့ပိုင်းသည် ရွှေတူးဖော်မှု၊ သတ္တုတူးဖော်မှု နှင့် ကျောက်မီးသွေး တူးဖော်မှုကို အကြီးအကဲလုပ်ဆာင်နေသည့် ဒေသဖြစ်သည်။
ထို့ အပြင် မိုင်းယောင်းမြို့နယ် အမှတ် (၄) ရပ်ကွက်တွင်လည်း ပြည်သူပိုင်ဘောလုံးကွင်းနေရာကိုလည်း မိုင်းယောင်းခရိုင်အုပ်ချုပ်ရေးမှူးမှ ခရိုင်စုပေါင်းရုံးတည်ဆောက်ရန်ပြင်ဆင်နေကြောင်းလည်း သိရသည်။
“ဟိုယန်း နောငင်ဟွယ်ဘက်က ဝမ်ဗိုးသွားတဲ့ လမ်းဘက်မှာ နွေစပါးစိုက်တဲ့ လယ်ကွက်တွေကို မီးလင်းရေး ကုမ္ပဏီကို အကွက်ရိုက်ရောင်းထားတာလည်း ဘာမှ လာမလုပ်သေးဘူး၊ အဲ့မှာလည်း မြေလွတ်တွေရှိတယ် အဲ့မှာ သွားမလုပ်ဘဲ ရပ်ကွက် (၄) က ဘောလုံးကွင်းမြေနေရာမှာ ခရိုင်ရုံးလာဆောက်ဖို့ ပြင်နေတာ” ဟု ဒေသခံတစ်ဦးက ပြောသည်။
ထိုရွှေတူးဖော်မှုကြောင့် သစ်တောဖြုန်းတီးမှုဖြစ်ကာ မိုင်းယောင်းမြို့နယ်တွင် မကြုံစဖူ ရေကြီးမှုများကို စတင်ရင်ဆိုင်လာရသည်။
မိုင်းယောင်းမြို့ ဘေးပတ်ပတ်လည်တွင် စစ်ကောင်စီ၏ ခြေမြန်တပ်ရင်းများဖြစ်သည့် ခမရ – ၃၁၁/ ၃၃၄/ ၃၃၅/ ၅၇၃ နှင့် အမြောက်တပ် ၃၉၈ တပ်ရင်းတို့ရှိသကဲ့သို့ မိုင်းယုမြို့တွင် အမှတ် (၁၀၀၈) နယ်ခြား စောင့်တပ်တို့ ရှိနေသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments