Monday, March 20, 2023

တောင်ကြီးတွင် စစ်ကောင်စီ လက်အောက်ခံ PNO မှ ဦးဆောင်ပြီး KNDF နဲ့ PDF တပ်ဖွဲ့ကို အလိုမရှိကြောင်း ဆန္ဒပြ

Must read

သျှမ်းပြည် တောင်ကြီးမြို့ ကံကြီးရပ်ကွက် တပေါင်းကွင်းတွင် စစ်ကောင်စီ လက်အောက်ခံ ပြည်သူ့စစ်တပ်ဖွဲ့ (PNO/PNA) မှ ဦးဆောင်ပြီး နမ့်နိန်းကျေးရွာအတွင်း သတ်ဖြတ်မှု နှင့် ပတ်သက်၍ ပြည်သူ့ကာကွယ်ရေးတပ်ဖွဲ့ KNDF နှင့် PDF တို့ကို အလိုမရှိ ဆန္ဒဖော်ထုတ်ခဲ့ကြောင်း စုံစမ်းသိရှိရသည်။

ပအိုဝ်းတိုင်းရင်းသားများ ဆန္ဒထုတ်ဖော်

ယနေ့ (မတ်လ ၁၅ ရက်) မနက် ၉ နာရီမှ စပြီး တပေါင်းကွင်းတွင် စစ်ကောင်စီ လက်အောက်ခံ ပြည်သူ့စစ်တပ်ဖွဲ့ (PNO/PNA) မှ ဦးဆောင်ပြီး ပြည်သူများထံ “တစ်အိမ်ကို တစ်ယောက် မတက်မနေရ “ ခြိမ်းခြောက် ပြောဆိုပြီး နမ့်နိန်းကျေးရွာအတွင်း သတ်ဖြတ်မှု နှင့် ပတ်သက်၍ ပြည်သူ့ကာကွယ်ရေးတပ်ဖွဲ့ KNDF နှင့် PDF တို့ကို အလိုမရှိကြောင်း ဆန္ဒပြပွဲ တရပ်ကျင်းပပြုလုပ်ခဲ့သည်။

“ ဒီ ပင်ပုံ၊ တောင်မဲသင်း၊ လုံးပျဉ်၊ နမ့်နိန်းရွာက ဖြစ်စဉ်အားလုံးက မြန်မာ့တပ်မတော်မှလည်း မဟုတ်ဘူး။ ဒီဖြစ်စဉ်အားလုံးက PNA လည်းမဟုတ်ဘူး။ အဲ့ဒီတော့ အကြမ်းဖက်သမားဖြစ်တဲ့ KNDF ကနေ စခဲ့တဲ့ လုပ်ငန်းအားလုံးတွေ ဖြစ်တယ် “ ဟု ပင်လောင်းမြို့နယ် ဦးဇင်းတစ်ပါးက မိန့်ကြားပါသည်။

ပြီးခဲ့သည့် (မတ်လ ၁၁ ရက်) နမ့်နိန်းကျေးရွာအတွင်း သံဃာတော် ၃ ပါး အပါအဝင် အရပ်သား ၂၈ ဦးကို အစုလိုက်အပြုံလိုက် သတ်ခံရမှု ဖြစ်စဉ်အပေါ် KNDF နှင့် PDF လက်ချက်ဖြစ်ကြောင်း စစ်ကောင်စီ လက်အောက်ခံတွေက စွပ်စွဲပြီး ကန့်ကွက်ဆန္ဒပြပွဲ တစ်ရပ်ကို ပြုလုပ်ခြင်းဖြစ်သည်။

ပအိုဝ်းတိုင်းရင်းသားများ ဆန္ဒထုတ်ဖော်

အဆိုပါ ဆန္ဒပြပွဲ နှင့် ပတ်သက်ပြီး စစ်ကောင်စီ လက်အောက်ခံ ပြည်သူ့စစ်တပ်ဖွဲ့ (PNO/ PNA) မှ ကျေးရွာရှိ ဒေသခံများကို တစ်အိမ်လျှင်တစ်ဦး မတက်မနေရ ခေါ်ဆောင်ခဲ့ကြောင်း မတက်လျှင် ကျပ်ငွေ (၅) သောင်း ဒဏ်ငွေဆောင်ရမည်ဖြစ်ကြောင်း တောင်ကြီးဒေခံ အမျိုးသားတစ်ဦးက ပြောသည်။

“ တောင်ဖက်ရွာတွေ တစ်အိမ်တစ်ယောက် မလာမနေရလို့ ဖိအားပေးနေတယ်။ နောင်ကား၊ လွယ်ကောင်း ဖက်ကလူတွေ မလာချင်ဘူး။ အတင်းခေါ်နေတယ်။ မသွားရင် တစ်အိမ် (၅) သောင်းပေးရတယ် “ ဟု ၎င်းက ပြောသည်။

ဆန္ဒပြပွဲအတွင်း ဆောင်ပုဒ်များမှာ “ သတင်းမှန် ဖုံးကွယ်ရေးသား ဖော်ပြသော မီဒီယာများ အလိုမရှိ” “ ပအိုဝ်းဒေသအတွင်း ကျူးကျော်စစ်တလင်း ဖန်တီးမှု အလိုမရှိ” KNDF နှင့် အကြမ်းဖက် PDF အပေါင်းအပါများ ပအိုဝ်းဒေသမှ အမြန်ဆုံးဆုတ်ခွာရေး.. ဒို့အရေး ဒို့အရေး ဒို့အရေး “ ဟုဆိုပြီး ရေးသား ဆန္ဒထုတ်ဖော်ကြသည်။

ပအိုဝ်းတိုင်းရင်းသားများ ဆန္ဒထုတ်ဖော်

ထို့အပြင် ပင်လောင်းမြို့နယ် နမ့်နိန်းကျေးရွာအတွင်း သတ်ဖြတ်မှု နှင့် ပတ်သက်၍ ပအိုဝ်းတိုင်းရင်းသားများစုပေါင်းပြီး ဆန္ဒပြပွဲကျင်းပမှုအပေါ် စစ်ကောင်စီတပ်ဖွဲ့မှ လူမျိုး၊ ဘာသာ၊ သာသနာကို မှိုင်းတိုက်နေခြင်း ဖြစ်ကြောင်း အသက် ၂၀ နှစ်အရွယ် ခွန်ရှိုင်း (အမည်လွှဲ) က ပြောသည်။

“ ကျနော်တို့ ပအိုဝ်းလူမျိုးတွေက ပိန်းကိုပိန်းတာပါ။ အခုထိ ကျွန်စိတ် မပျောက်သေးဘူး။ ကျနော်တို့ လူငယ်တွေ အခွင့်အရေး မရှိဘူး။ လူငယ်တွေပြောရင်လည်း လူငယ်နေရာမှာ လူငယ်လိုနေ ဆိုတာကြီးဘဲ။ ကျနော်တို့ လူမျိုးတွေ စစ်တပ်က မှိုင်းတိုက်ထားတဲ့ လူမျိုး၊ ဘာသာ၊ သာသနာ ကနေ မလွတ်မြောက်နိုင်သေးဘူး “ ဟု ၎င်းက ပြောသည်။

ပြီးခဲ့သည့် (ဖေဖော်ဝါ ၂၄ ရက်) မှစပြီး စစ်ကောင်စီတပ်ဖွဲ့၊ ပအိုဝ်းပြည်သူ့စစ် PNA တပ်ဖွဲ့နှင့် ပြည်သူ့ကာကွယ်ရေးတပ်ဖွဲ့ PDF ပူးပေါင်းတပ်ဖွဲ့တို့ တိုက်ပွဲ ဆက်လက်ဖြစ်ပွားခဲ့ခြင်းကြောင့် ကျေးရွာ (၆) ရွာ နှင့် ဒေသခံ ပြည်သူ (၆,၀၀၀) ဝန်းကျင် ထွက်ပြေးတိမ်းရှောင်နေရကြောင်း သိရသည်။

စစ်တပ်က အာဏာသိမ်းပြီး ၂ နှစ်ကျော် ကာလအတွင်းမှာ ပြည်သူ (၃,၁၂၄) ဦး သတ်ဖြတ်ခံထားရပြီး (၂၀,၃၅၉) ဦးမှာ ဖမ်းဆီးခံနေရကြောင်း နိုင်ငံရေး အကျဉ်းသားများ ကူညီစောင့်ရှောင်ရေးအသင်း AAPP မှ ယမန်နေ့ (မတ်လ ၁၄ ရက်) ရက်စွဲ၏ ထုတ်ပြန်ချက်အရ သိရသည်။

Leave a Comments

- Advertisement -spot_img

Latest article